ಮೊಬೈಲ್ ಮಾರಿ!

ಮನವನು ಕೆಡಿಸುವ ಮಾಯಾ ಮೋಹಿನಿ
ನನಗೂ ಬೇಕೆಂದೆನಿಸುವುದು

ಗೂಗಲ್ ಫೇಸ್‌ಬುಕ್ ವಾಟ್ಸ್‌ಆ್ಯಪ್ ಎನ್ನುತ
ಮುಗಿಯದ ಆಸೆಯು ಚಿಗುರುವುದು

ಜಗವನು ಮರೆಸುತ ಮನವನು ಗೆಲ್ಲುತ
ನಗೆಯನು ಬೀರುತ ಹೊಳೆಯುವುದು

ನೋಡಿದ ಕೂಡಲೆ ಆಟವನಾಡಲು
ಬೇಡಿಕೆ ಬರುವುದು ಮನದಲ್ಲಿ

ನೋಡುತ ನೋಡುತ ಆಡುತಲಿರಲು
ಮೋಡಿ ಮಾಡುವುದು ಕ್ಷಣದಲ್ಲಿ

ಓದುಬರಹಗಳು ದೂರ ಉಳಿಯುವವು
ಹಾದಿ ತಪ್ಪುವುದು ದಿನಚರಿಯು

ಸಾಧನೆ ಮಾಡುವ ಗುರಿ ಅಳಿಯುವುದು
ವೇದನೆ ಮನಸಿಗೆ ಅನುದಿನವು

ಮೊಬೈಲ್ ಮಾರಿಯೆ ದೂರಕೆ ತೊಲಗು
ಮೈಮನಸುಗಳನು ಕೆಡಿಸದಿರು

ಕಲಿಯುವ ಆಸೆಯ ಕದಿಯುವ ಕಣ್ಮಣಿ
ಬಯಕೆಯ ಮನದಲಿ ತರಿಸದಿರು