ಪಟ್ಟದಕಲ್ಲು; ಛಾವಣಿ ಇಲ್ಲದ ಆಸ್ಪತ್ರೆ!

7
ಹೊಸ ಕಟ್ಟಡ ನಿರ್ಮಾಣಕ್ಕೆ ಅನುಮತಿ ನೀಡದ ಭಾರತೀಯ ಪುರಾತತ್ವ ಇಲಾಖೆ

ಪಟ್ಟದಕಲ್ಲು; ಛಾವಣಿ ಇಲ್ಲದ ಆಸ್ಪತ್ರೆ!

Published:
Updated:
Deccan Herald

ಪಟ್ಟದಕಲ್ಲು (ಬಾದಾಮಿ): ವಿಶ್ವ ಪಾರಂಪರಿಕ ತಾಣ ಸ್ಥಾನಮಾನದ, ದೇಶ– ವಿದೇಶಗಳಿಂದ ನಿತ್ಯ ಸಾವಿರಾರು ಮಂದಿ ಪ್ರವಾಸಿಗರು ಬರುವ ಪಟ್ಟದಕಲ್ಲು ಗ್ರಾಮದ ಪ್ರಾಥಮಿಕ ಆರೋಗ್ಯ ಕೇಂದ್ರ (ಪಿಎಚ್‌ಸಿ) ಮಾತ್ರ ಶಿಥಿಲಾವಸ್ಥೆಯಲ್ಲಿದೆ.

ಹೊಸ ಕಟ್ಟಡ ನಿರ್ಮಾಣಕ್ಕೆ ಅಥವಾ ಕಟ್ಟಡ ದುರಸ್ತಿಗೊಳಿಸಲು ಭಾರತೀಯ ಪುರಾತತ್ವ ಇಲಾಖೆ (ಎಎಸ್‌ಐ) ಅನುಮತಿ ನೀಡುತ್ತಿಲ್ಲ. ಹೀಗಾಗಿ, ಯಾವುದೇ ಸಂದರ್ಭದಲ್ಲಿ ಕುಸಿದು ಬೀಳುವ ಅಪಾಯದಲ್ಲಿರುವ ಪಾಳು ಕಟ್ಟಡದಲ್ಲಿಯೇ ರೋಗಿಗಳಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ಹೆರಿಗೆ ವಾರ್ಡಿಗೆ ಹೋಗುವ ಹಜಾರದ ಚಾವಣಿಯ ಹೆಂಚುಗಳು ಮೈಮೇಲೆ ಬೀಳುವಂತಿವೆ. ಕಂಬಗಳು ಬಾಗಿವೆ. ವೈದ್ಯರ ವಿಶ್ರಾಂತಿ ಕೊಠಡಿಯ ಹೆಂಚುಗಳು ಹಾರಿ ಹೋಗಿವೆ. ಹೆಂಚು ಒಡೆದಿರುವ ಕಾರಣ ಆಸ್ಪತ್ರೆಯೊಳಗೆ ಸದಾ ಸೂರ್ಯನ ಬೆಳಕು ಇಣುಕುತ್ತಿದೆ.

ವೈದ್ಯರ ಮನೆ ಮತ್ತು ಸಿಬ್ಬಂದಿಯ ಐದು ಮನೆಗಳ ಹೆಂಚು ಸಂಪೂರ್ಣವಾಗಿ ಕಿತ್ತು ಅಸ್ಥಿಪಂಜರದಂತೆ ಗೋಚರಿಸುತ್ತವೆ. ಒಂದು ಮನೆಯಲ್ಲಿ ಸಿಬ್ಬಂದಿ ವಾಸವಾಗಿದ್ದಾರೆ. ಸ್ಥಳಕ್ಕೆ ತೆರಳಿದ ‘ಪ್ರಜಾವಾಣಿ’ಯನ್ನು ಇಲಿಗಳ ಗುಂಪು ಸ್ವಾಗತಿಸಿತು. ಮೀಟರ್ ಮತ್ತು ವಿದ್ಯುತ್ ತಂತಿಗಳು ಗೋಡೆಯಲ್ಲಿ ಜೋತು ಬಿದ್ದಿವೆ. ಶವಾಗಾರದಲ್ಲಿ ಒಳಗೆ ಬೆಳದು ನಿಂತ ಆಲದಮರವೇ ಶವ ಪರೀಕ್ಷೆ ನಡೆಸುವವರಿಗೆ ನೆರಳು ನೀಡುತ್ತಿದೆ.

‘ಭಯದ ವಾತಾವರಣದಲ್ಲಿ ನಾವು ಬದುಕುತ್ತಿದ್ದೇವೆ’ ಎಂದು ಅಲ್ಲಿ ವಾಸವಿರುವ ಆಸ್ಪತ್ರೆಯ ಸಿಬ್ಬಂದಿ ಹೇಳಿದರು.

‘ಈ ವರ್ಸ ಸಿದ್ದರಾಮಯ್ಯ ಆರಿಸಿ ಬಂದಾರ, ಇಲ್ಲಿ ಅವರು ಕಣ್ಣ ತಗದು ನೋಡಿದ್ರ ಬೇಷ್ ಆಕ್ಕೈತ್ರಿ’ ಎಂದು ಆಸ್ಪತ್ರೆಗೆ ಬಂದಿದ್ದ ಗ್ರಾಮದ ವೃದ್ಧೆ ಬಸಮ್ಮ ಹೇಳಿದರು.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !