ಶನಿವಾರ, ನವೆಂಬರ್ 16, 2019
22 °C
ಶಾರೂಖ್–ಕಾಜಲ್ ಜೋಡಿ

ಮತ್ತೊಮ್ಮೆ ಶಾರುಕ್ ಜೊತೆ ನಟಿಸಬಹುದು-ಬಾಲಿವುಡ್ ನಟಿ ಕಾಜಲ್

Published:
Updated:

ಶಾರುಕ್‌ ಖಾನ್‌ ಮತ್ತು ಕಾಜೊಲ್ ಜೋಡಿಯ ಸಿನಿಮಾಗಳ ಬಗ್ಗೆ ಎಷ್ಟು ಹೇಳಿದರೂ ಕಡಿಮೆಯೇ! ‘ಬಾಜಿಗರ್‌’ ಚಿತ್ರದಿಂದ ಆರಂಭಿಸಿ ಈಚಿನ ‘ದಿಲ್‌ವಾಲೆ’ ಚಿತ್ರದವರೆಗೆ ಅವರ ಜೋಡಿ ಮಾಡಿದ ಮೋಡಿಯನ್ನು ಆ ಜೋಡಿಯ ಅಭಿಮಾನಿಗಳು ಮಾತ್ರವಲ್ಲದೆ, ಎಲ್ಲ ಸಿನಿಮಾ ಪ್ರೇಮಿಗಳೂ ಅಚ್ಚರಿಯಿಂದ ಗಮನಿಸಿರಬಹುದು.

ಈಗ, ಶಾರುಕ್‌ ಮತ್ತು ಕಾಜೊಲ್‌ ಜೋಡಿ ಇನ್ನೊಂದು ಸಿನಿಮಾ ಸೆಟ್ಟೇರಬಹುದು ಎಂಬ ಅಭಿಮಾನ ಮಿಶ್ರಿತ ಕಾತರ ಸಿನಿಮಾ ಪ್ರೇಮಿಗಳಲ್ಲಿ ಮೂಡಿದೆ. ಹಾಗೆ ಆಗಿರುವುದಕ್ಕೆ ಒಂದಿಷ್ಟು ಕಾರಣಗಳೂ ಇವೆ. ಶಾರುಕ್‌ ಅವರು 2019 ಅಥವಾ 2020ರಲ್ಲಿ ಕರಣ್‌ ಜೋಹರ್‌ ನಿರ್ದೇಶನದ ಸಿನಿಮಾವೊಂದರಲ್ಲಿ ಅಭಿನಯಿಸಲಿದ್ದಾರೆ ಎಂಬ ಸುದ್ದಿ ಬಾಲಿವುಡ್ ಅಂಗಳದಲ್ಲಿ ಸದ್ದು ಮಾಡಿದೆ.

ಅಷ್ಟೇ ಅಲ್ಲ, ಸಿನಿಮಾ ಸಂಬಂಧಿತ ಮಾಧ್ಯಮವೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಕಾಜೊಲ್ ಅವರೂ ಈ ಬಗ್ಗೆ ಒಂದು ಸುಳಿವು ನೀಡಿದ್ದಾರೆ. ‘ಕಳೆದ 25 ವರ್ಷಗಳಿಂದಲೂ ನಾನು ಮತ್ತು ಶಾರೂಖ್‌ ಆಗಾಗ ಒಟ್ಟಾಗಿ ಸಿನಿಮಾ ಮಾಡುತ್ತಿದ್ದೇವೆ. ಮುಂದಿನ ವರ್ಷಗಳಲ್ಲಿ ಇನ್ನೊಂದು ಸಿನಿಮಾ ಆಗಲೂಬಹುದು’ ಎಂಬ ಅರ್ಥದ ಮಾತನ್ನು ಕಾಜಲ್ ಆಡಿದ್ದಾರೆ.

ಅಂದಹಾಗೆ, ಕರಣ್‌ ಜೋಹರ್ ಮತ್ತು ಶಾರುಕ್‌ ಅವರ ಸ್ನೇಹ ತೀರಾ ಗಾಢ. ಹಾಗೆಯೇ, ಕರಣ್‌ ಅವರ ನಿರ್ದೇಶನದಲ್ಲಿ, ಶಾರುಕ್‌ ಅಭಿನಯದಲ್ಲಿ ಬಂದ ಕೆಲವು ಸೂಪರ್‌ ಹಿಟ್‌ ಚಿತ್ರಗಳಲ್ಲಿ ಕಾಜಲ್ ನಾಯಕಿಯ ಪಾತ್ರ ನಿಭಾಯಿಸಿದ್ದಾರೆ. ಈ ಕಾರಣಗಳಿಂದಾಗಿ, ಕರಣ್ ಜೋಹರ್ ಅವರ ಮುಂದಿನ ಸಿನಿಮಾದಲ್ಲಿ ಶಾರುಕ್‌ ಮತ್ತು ಕಾಜೊಲ್ ಒಟ್ಟಾಗಬಹುದು ಎಂಬ ಅನುಮಾನ ಗಟ್ಟಿಯಾಗಿದೆ. ‘ದಿಲ್‌ವಾಲೇ ದುಲ್ಹನಿಯಾ ಲೇ ಜಾಯೇಂಗೆ ಚಿತ್ರದ ರಾಜ್–ಸಿಮ್ರನ್ ಜೋಡಿ ಮತ್ತೆ ತೆರೆಯ ಮೇಲೆ ಒಟ್ಟಾಗಿ ಕಾಣುವಂತೆ ಆಗಲಿ’ ಎಂದು ಅಭಿಮಾನಿಗಳು ಕಾತರದಿಂದ ಕಾಯುವಂತೆ ಆಗಿದೆ.

ಶಾರುಕ್‌–ಕಾಜೊಲ್ ಸಿನಿಮಾಗಳು: ಈ ಜೋಡಿ ಒಟ್ಟಾಗಿ ಮಾಡಿದ ಮೊದಲ ಸಿನಿಮಾ ‘ಬಾಜಿಗರ್’. 1993ರಲ್ಲಿ ತೆರೆಕಂಡ ಈ ಚಿತ್ರವನ್ನು ಅಬ್ಬಾಸ್–ಮಸ್ತಾನ್ ಜೋಡಿ ನಿರ್ದೇಶಿಸಿತ್ತು. ‘ಯೇ ಕಾಲಿ ಕಾಲಿ ಆಂಖೇ’, ‘ಬಾಜಿಗರ್ ಓ ಬಾಜಿಗರ್’ ಹಾಡುಗಳು ಜನಪ್ರಿಯವಾಗಿದ್ದವು.

ಈ ಜೋಡಿಯ ‘ದಿಲ್‌ವಾಲೇ ದುಲ್ಹನಿಯಾ ಲೇ ಜಾಯೇಂಗೆ’ ಚಿತ್ರವು ಕೆಲವು ಸಾರ್ವಕಾಲಿಕ ದಾಖಲೆಗಳನ್ನು ಸೃಷ್ಟಿಸಿತು. ಆದಿತ್ಯ ಚೋಪ್ರಾ ನಿರ್ದೇಶನದ ಈ ಸಿನಿಮಾ ಮುಂಬೈನ ಮರಾಠಾ ಚಿತ್ರಮಂದಿರದಲ್ಲಿ 20 ವರ್ಷಗಳ ಕಾಲ ಪ್ರದರ್ಶನ ಕಂಡ ಹೆಗ್ಗಳಿಕೆ ಪಡೆಯಿತು. ಕರಣ್ ಜೋಹರ್ ನಿರ್ದೇಶನದ ‘ಕುಛ್‌ ಕುಛ್‌ ಹೋತಾ ಹೈ’ ಈ ಜೋಡಿಗೆ ಹೆಸರು ತಂದುಕೊಟ್ಟ ಇನ್ನೊಂದು ಸೂಪರ್‌ಹಿಟ್ ಚಿತ್ರ. ಕಾಲೇಜು ಜೀವನದಿಂದ ಆರಂಭವಾಗುವ ಈ ಚಿತ್ರದಲ್ಲಿ ಇರುವುದು ತ್ರಿಕೋನ ಪ್ರೇಮಕಥೆ. ಜತಿನ್–ಲಲಿತ್ ಸಂಗೀತ ನಿರ್ದೇಶನ ಇದ್ದ ಈ ಚಿತ್ರದ ‘ಕುಛ್‌ ಕುಛ್‌ ಹೋತಾ ಹೈ’, ‘ಲಡಕೀ ಬಡೀ ಅಂಜಾನೀ ಹೈ’ ಹಾಡುಗಳು ಎವರ್‌ಗ್ರೀನ್‌ ಎಂಬ ಖ್ಯಾತಿ ಗಳಿಸಿಕೊಂಡವು!

ಕರಣ್ ಜೋಹರ್ ನಿರ್ದೇಶನದಲ್ಲೇ ಮೂಡಿಬಂದ, ಬಹುತಾರಾಗಣದ ‘ಕಭಿ ಖುಷಿ ಕಭಿ ಗಮ್’ ಚಿತ್ರ ಕೂಡ ಶಾರುಕ್‌–ಕಾಜೊಲ್ ಜೋಡಿಯ ಮೋಡಿಯನ್ನು ವೀಕ್ಷಕರ ಹೃದಯಕ್ಕೆ ತಲುಪಿಸಿತು. ‘ಮೈ ನೇಮ್ ಈಸ್ ಖಾನ್’ ಮತ್ತು ‘ದಿಲ್‌ವಾಲೇ’ ಈ ಜೋಡಿಯ ತೀರಾ ಈಚಿನ ಸಿನಿಮಾಗಳು. ಒಟ್ಟಿನಲ್ಲಿ, ಶಾರುಕ್‌–ಕಾಜೊಲ್ ಅವರು ಅಭಿಮಾನಿಗಳ ಪಾಲಿಗೆ ಖುಷಿಯ ಬುಗ್ಗೆ ಸೃಷ್ಟಿಸಬಲ್ಲ, ‘ಅಮರ ಪ್ರೇಮಿ’ ಜೋಡಿ.

ಪ್ರತಿಕ್ರಿಯಿಸಿ (+)