ಇಲಿ ನಿಯಂತ್ರಣಕ್ಕೆ ಇಲ್ಲಿದೆ ದಾರಿ

ಇಂಥ ಇಲಿ ನಿಯಂತ್ರಣಕ್ಕೆ ರೈತರು ಪಾಷಾಣ ಇಡುವ ವಿಧಾನ ಅನುಸರಿಸುತ್ತಿದ್ದಾರೆ. ಇದರಿಂದ ತಕ್ಕ ಮಟ್ಟಿಗೆ ಇಲಿ ನಿಯಂತ್ರಣವಾಗಬಹುದು. ಆದರೆ, ಈ ಪಾಷಾಣವನ್ನು ಸಾಕು ಪ್ರಾಣಿಗಳು ತಿಂದರೆ ಅಪಾಯ. ಮನೆಯಲ್ಲಿ ಚಿಕ್ಕ ಮಕ್ಕಳಿದ್ದರಂತೂ ಪಾಷಣ ಇಡುವುದಕ್ಕೇ ಭಯವಾಗುತ್ತದೆ. ಇಂಥ ಸಂದರ್ಭದಲ್ಲಿ ಕೆಲ ಸಾವಯವ ಕೃಷಿಕರು ಇಲಿ ನಿಯಂತ್ರಿಸಲು ಕೆಲವು ಉಪಾಯಗಳನ್ನು ಕಂಡುಕೊಂಡಿದ್ದಾರೆ. ಅವುಗಳ ಇಲ್ಲಿವೆ.

* ಗೊಬ್ಬರ ಗಿಡ ಗ್ಲಿರಿಸೀಡಿಯಾದ ತೊಗಟೆ ತೆಗೆದುಕೊಳ್ಳಿ. 250 ಗ್ರಾಂ ತೊಗಟೆಯನ್ನು ಒಂದು ಕೆ.ಜಿ ಅಕ್ಕಿಯೊಂದಿಗೆ ಚೆನ್ನಾಗಿ ಕುದಿಸಿ, ಅನ್ನ ತಯಾರಿಸಿ. ಇಲಿಗಳು ಓಡಾಡುವ ಸ್ಥಳದಲ್ಲಿ ಇಡಿ. ಈ ಮಿಶ್ರಣದಿಂದ ಹೊರಡುವ ಪರಿಮಳ ಇಲಿಗಳನ್ನು ಆಕರ್ಷಿಸುತ್ತದೆ. ವಾಸನೆ ಹಿಡಿದು ಬರುವ ಇಲಿಗಳು ಈ ಮಿಶ್ರಣ ತಿಂದು ಸಾಯುತ್ತವೆ. ಇದು ಬೇರೆ ಸಾಕು ಪ್ರಾಣಿಗಳು ತಿಂದರೆ ಅಪಾಯವಾಗುವುದಿಲ್ಲ..

* ಬೀಜ ರಹಿತವಾದ ಮೃದು, ಸ್ವಚ್ಛ, ಶುಭ್ರವಾದ ಹತ್ತಿ ಅರಳೆಯ ಚಿಕ್ಕ-ಚಿಕ್ಕ ತುಂಡುಗಳನ್ನು ಶೇಂಗಾ ತೈಲದಲ್ಲಿ ನೆನೆಸಿ ಇಲಿಗಳು ಓಡಾಡುವ ಸ್ಥಳದಲ್ಲಿ ಇಡಿ. ಈ ಶೇಂಗಾ ತೈಲದ ಮಧುರ ವಾಸನೆಗೆ ಇಲಿಗಳು ಆಕರ್ಷಿತವಾಗಿ ತಿಂದು ಸಾಯುತ್ತವೆ.

* ಸುಣ್ಣ, ಕಡಲೆ ಹಿಟ್ಟು ಮತ್ತು ಶೇಂಗಾ ತೈಲವನ್ನು ಸಮ ಪ್ರಮಾಣದಲ್ಲಿ ಮಿಶ್ರಣ ಮಾಡಿ ಇಲಿಗಳು ಓಡಾಡುವ ಸ್ಥಳದಲ್ಲಿ ಇಡಿ. ಶೇಂಗಾ ಎಣ್ಣೆಯ ವಾಸನಗೆ ಆಕರ್ಷಿತವಾಗುವ ಇಲಿಗಳು, ಈ ಮಿಶ್ರಣವನ್ನು ತಿನ್ನುತ್ತವೆ. ಮಿಶ್ರಣದಲ್ಲಿರುವ ಸುಣ್ಣವು ಇಲಿಯ ಹೊಟ್ಟೆ ಸೇರಿ, ಅರಳುತ್ತದೆ, ಶಾಖವನ್ನು ಬಿಡುಗಡೆಗೊಳಿಸುತ್ತದೆ. ಇದರಿಂದ ಇಲಿಯ ಹೊಟ್ಟೆಯು ಉಬ್ಬಿ ಸಾಯುತ್ತದೆ

* ಚರ್ಮಕ್ಕೆ ತುರಿಕೆ ಉಂಟು ಮಾಡುವ ನಸುಗುನ್ನಿ ಗಿಡದ ತಪ್ಪಲನ್ನು ಇಲಿಯ ಬಿಲದ ಹತ್ತಿರ ಇಡಿ. ಇಲಿಗಳು ಬಿಲದಿಂದ ಹೊರಬರುವಾಗ ಈ ತಪ್ಪಲಿನಲ್ಲಿ ಹಾಯ್ದು ಬರುತ್ತವೆ. ಆಗ, ತಪ್ಪಲು ಇಲಿಗಳ ಚರ್ಮಕ್ಕೆ ತಗಲಿ ತುರಿಕೆ ಉಂಟಾಗುತ್ತದೆ. ಇದರಿಂದ ಇಲಿಗಳಿಗೆ ಹುಚ್ಚು ಹಿಡಿದಂತಾಗಿ ಒಂದಕ್ಕೊಂದು ಕಚ್ಚಾಡಿ ಸಾಯುತ್ತವೆ.

* ತೆಂಗು ಹಾಗೂ ಅಡಿಕೆ ಮರಗಳಿಗೆ ಕಬ್ಬಿಣದ ತಗಡನ್ನು ಸುತ್ತಬೇಕು. ಇದರಿಂದ ಇಲಿಗಳಿಗೆ ಮೇಲೇರಲು ಸಾಧ್ಯವಾಗದೇ ಕಾಲು ಜರಿದು ನೆಲಕ್ಕೆ ಬೀಳುತ್ತವೆ.

* ಜಮೀನಿನಲ್ಲಿ ಬೆಕ್ಕು ಸಾಕುವ ಹವ್ಯಾಸವಿಟ್ಟುಕೊಂಡರೆ, ಇಲಿಗಳನ್ನು ನಿಯಂತ್ರಿಸಬಹುದು.

* ಇಲಿಗಳ ನಿಯಂತ್ರಿಸಲು ಮಾನವ ನಿರ್ಮಿತ ಹಲವಾರು ಬಲೆಗಳು ಮಾರುಕಟ್ಟೆಯಲ್ಲಿ ಲಭ್ಯವಿದ್ದು, ಅವನ್ನು ಜಾಗೃತಿಯಿಂದ ಬಳಸಬಹುದು.

‘ಇಲಿಗಳ ನಿಯಂತ್ರಣಕ್ಕಾಗಿ ರೈತರು ಕೇವಲ ವಿಷ-ಪ್ರಾಷಣದಂಥಹ ಒಂದೇ ಮಾರ್ಗ ಅವಲಂಬಿಸುವುದನ್ನು ಬಿಟ್ಟು, ಇಂಥ ಪ್ರಯೋಗಗಳನ್ನು ಜಾಣ್ಮೆಯಿಂದ ಜಾರಿಗೊಳಿಸಿದರೆ, ಜೈವಿಕವಾಗಿ ಇಲಿಗಳ ಹಾವಳಿ ನಿಯಂತ್ರಿಸಬಹುದಾಗಿದೆ’ ಎನ್ನುತ್ತಾರೆ ಸಾವಯವ ಕೃಷಿಕ ರುದ್ರಪ್ಪ ಜುಲಪಿ.

ಈ ಕ್ರಮಗಳನ್ನು ಮುಧೋಳ, ಜಮಖಂಡಿ, ಬೀಳಗಿ ಸೇರಿದಂತೆ ಸುತ್ತಲಿನ ಗ್ರಾಮಗಳಲ್ಲಿ ಸಾಕಷ್ಟು ರೈತರು ತಮ್ಮ ಬೆಳೆಗಳಿಗೆ ಅಳವಡಿಸಿ ನೋಡಿದ್ದಾರೆ. ಕೆಲವು ಕಡೆ ಇಲಿಗಳನ್ನು ನಿಯಂತ್ರಿಸುವಲ್ಲಿ ಯಶಸ್ವಿಯಾಗಿದ್ದೇವೆ ಎನ್ನುತ್ತಾರೆ. ಆದರೆ, ಪ್ರದೇಶವಾರು ಹವಾಗುಣ, ಮಣ್ಣು, ಬೆಳೆ ಪದ್ಧತಿ ಬದಲಾಗುತ್ತವೆ. ಹಾಗಾಗಿ ಈ ಕ್ರಮಗಳನ್ನು ಅನುಸರಿಸುವ ಅಥವಾ ಅಳವಡಿಸಿಕೊಳ್ಳುವ ಮುನ್ನ ರೈತರು ಕೃಷಿ ಇಲಾಖೆ ತಜ್ಞರ ಮಾರ್ಗದರ್ಶನ ಪಡೆಯುವುದು ಅವಶ್ಯವಾಗಿದೆ.

ಮೇಲೆ ಹೇಳಿರುವ ವಿಧಾನಗಳ ಬಗ್ಗೆ ಹೆಚ್ಚಿನ ಮಾಹಿತಿಗೆ ಮೊಬೈಲ್‌ ಸಂಖ್ಯೆ: 9945220660 ಸಂಪರ್ಕಿಸಬಹುದು.