ತಾಳಲಾಗದ ಚಳಿಗೆ ನಡುಗಿ, ಎಲೆ ಕಳಚಿ
ಬೆತ್ತಲಾಗಿ, ನಾಚಿ
ಬೆಳ್ಳಿ ಹಿಮದಲ್ಲಿ ಹಸಿರು ಪಾಚಿ ಹೊದ್ದು ನಿಂತ
ಸುದೀರ್ಘ ಮೌನದ ಸಾಲು ಮರಗಳ ಸಾಲು, ಸಾಲು;
ಇವುಗಳಡಿಯಲ್ಲಿ
ಹೊಸ ರೇಶಿಮೆ ಸೀರೆಗಳ ಸರಭರ ನಡಿಗೆ ನೆನಪಿಸುವ
ಬಣ್ಣ ಬಣ್ಣದ ಕಾರುಗಳ ನಿರಂತರ ಸಾಲು;
ಕಾಲ ಅಕಾಲದಲ್ಲಿ ಬೆಳಕಿಗಡ್ಡ ನಿಂತು
ನೆಲಕ್ಕಿಳಿದಿರುವ ಮಂಜುಮಣಿಗಳ
ಸದ್ದಿಲದ ಶ್ವೇತ ಮಣಿಮಾಲೆ;
ಆದರಿಲ್ಲಿ
ನಡೆಯುವ, ನಗುವ, ನಿಂತು ವಿರಾಮದಲ್ಲಿ
ಮಾತನಾಡುವ
ಜನ ಮಾತ್ರ ಬಲು ಅಪರೂಪ!
ಹೀಗೆಂದರೆ
ಜೀವ ಇಲ್ಲ ಎಂದಲ್ಲ;
ಬೋಳು ನೀಲಗಿರಿ ಮರಗಳ ಮೇಲೆ
ರೆಕ್ಕೆ ಪಟಪಟ ಬಡಿದು ಹಾರುತ್ತ ಬಂದು ಕೂರುತ್ತವೆ
ಪಂಚವರ್ಣದ ಗಿಳಿ, ಬಿಳಿಯ ಬಣ್ಣದ ಗಿಳಿ, ತಲೆಯ ಮೇಲೆ ಕಿರೀಟ ಹೊತ್ತ
ಬಿಳಿ, ಹಳದಿ ಬಣ್ಣದ ಗಿಳಿ;
ಕಾಗೆಯ ಹೋಲುವ ಮ್ಯಾಗ್ಪೈ; ಬೂದು ಪಾರಿವಾಳ;
ಬಿಳಿ ಪಟ್ಟೆಯ ಕಾಣಿಸುವ ಕರಿಮೈ ಕಾಗೆ;
ಚಕಿತ, ಚಂಚಲ ಮೈನಾ;
ಯಕ್ಷಗಾನದ ಕುಮ್ಮುಚೆಟ್ಟುಗಳ ನೆನಪಿಸುವ
ಥಕಥೈ ಹಾರುವ ಕಾಂಗರೂಗಳು;
ಟೆಡ್ಡಿಬೇರ್ ಹೋಲುವ, ಮೈತುಂಬ ಮೃದು ತುಪ್ಪಳದ
ವೊಂಬಾಟ್ಗಳು;
ಹೆಸರಿನ ಹಂಗಿಲ್ಲದ ಎಷ್ಟೋ ಪಕ್ಷಿ ಪ್ರಾಣಿ ಜೀವ
ಹಗಲ ಎಚ್ಚರಿಸುವಂತೆ ಕೂಗಿ, ಚೀರುತ್ತವೆ;
ತಿಳಿನೀರ ಕಾಸಾರಗಳಲ್ಲಿ
ನಿಶ್ಯಬ್ದ
ಮೀಯುತ್ತವೆ ಮೀನ ರಾಶಿ
ಕೊರವ ಚಳಿಯಲ್ಲೂ ಮಾತಿಲ್ಲದ ಜನರ ನಡುವೆಯೂ
ಜೀವ ಝಲ ಝಲ.
_________________
* ಕ್ಯಾನ್ಬೆರಾ: ಆಸ್ಟ್ರೇಲಿಯಾದ ರಾಜಧಾನಿ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.