ADVERTISEMENT

ಕವಿತೆ: ಒಂದು ಮಳೆಯನ್ನು ಏನೆಲ್ಲಾ ಮಾಡಬಹುದು

ಮಂಜುಳಾ ಹಿರೇಮಠ
Published 9 ಜನವರಿ 2021, 19:31 IST
Last Updated 9 ಜನವರಿ 2021, 19:31 IST
ಕಲೆ: ಸಂಜೀವ್‌ ಕಾಳೆ
ಕಲೆ: ಸಂಜೀವ್‌ ಕಾಳೆ   

ಮಳೆಯನ್ನು
ಹಾಡುವುದು ಎಂದರೆ
ಕೊನೆ - ಮೊದಲಿರದ
ಒಂದು ಹರಿವನ್ನು
ನುಡಿಸುವುದು ಎಂದರ್ಥ

ಮಳೆಯನ್ನು
ನುಡಿಸುವುದು ಎಂದರೆ
ಕತ್ತರಿಸಿಹೋದ ಬೆರಳುಗಳಿಂದ
ಆಕಾಶದ ವೀಣೆಯನ್ನು
ನೇವರಿಸುವುದು ಎಂದರ್ಥ

ಮಳೆಯನ್ನು
ನೇವರಿಸುವುದು ಎಂದರೆ
ಅವಳು ಅವಳೊಂದಿಗೆ
ಸಿಡಿದೇಳುವ ಹೃದಯವನ್ನು
ಬಿಡಿಸುವುದು ಎಂದರ್ಥ

ADVERTISEMENT

ಮಳೆಯನ್ನು
ಬಿಡಿಸುವುದು ಎಂದರೆ
ಕಂಬನಿ ತೊಟ್ಟಿಕ್ಕಿ ಹರಡಿದ
ತುಟಿಗಳಿಂದ ಅಕ್ಷರಗಳನ್ನು
ನೆನಪಿಸಿಕೊಳ್ಳುವುದು ಎಂದರ್ಥ

ಮಳೆಯನ್ನು
ನೆನಪಿಸಿಕೊಳ್ಳುವುದು ಎಂದರೆ
ಒಂದು ಕೊಡೆಯಿಂದ
ನಿಲ್ಲಿಸಲು ಸಾಧ್ಯವಾಗುವವರೆಗೆ
ತಡೆದು ಮಣಿಸುವುದು ಎಂದರ್ಥ

ಮಳೆಯನ್ನು
ತಡೆಯುವುದು ಎಂದರೆ
ಇಷ್ಟವಿರುವಾತನನ್ನು
ಹಠಾತ್ತನೆ ಕಂಡಾಗ ಹಿಡಿತಕ್ಕೆ
ಸಿಗದಂತಿರುವುದು ಎಂದರ್ಥ

ಮಳೆಯನ್ನು
ಕಾಣುವುದು ಎಂದರೆ
ತನ್ನದೇ ಸಮಾಧಿ ಈಕ್ಷಿಸುವ
ಪರೇತಾತ್ಮನ ಹಾಗೆ
ಮೂಕ, ಕಣ್ಣು ಮುಚ್ಚಿದ
ನೆಂದ ಶಬ್ದ ಸಾಲು ಎಂದರ್ಥ !

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.