ದ್ವಿತೀಯಾರ್ಧದಲ್ಲಿ ದ್ವಿಚಕ್ರ ವಾಹನ ರಫ್ತು ಸುಸ್ಥಿರ ಬೆಳವಣಿಗೆ

ನವದೆಹಲಿ: ದೇಶದ ದ್ವಿಚಕ್ರ ವಾಹನ ರಫ್ತು ವಹಿವಾಟು ಪ್ರಸಕ್ತ ಹಣಕಾಸು ವರ್ಷದ ದ್ವಿತೀಯಾರ್ಧದಲ್ಲಿ ಸುಸ್ಥಿರ ಬೆಳವಣಿಗೆ ದಾಖಲಿಸಲಿದೆ ಎಂದು ಇಂಡಿಯಾ ರೇಟಿಂಗ್ಸ್‌ ಹೇಳಿದೆ.

ಕೋವಿಡ್‌–19 ಸಾಂಕ್ರಾಮಿಕ ಹಾಗೂ ಕಚ್ಚಾ ತೈಲ ದರ ಇಳಿಕೆಯಿಂದಾಗಿ ಮೊದಲಾರ್ಧದಲ್ಲಿ ರಫ್ತು ವಹಿವಾಟಿನ ಮೇಲೆ ಪರಿಣಾಮ ಉಂಟಾಗಿತ್ತು ಎಂದು ತಿಳಿಸಿದೆ.

ಭಾರತವು ಮುಖ್ಯವಾಗಿ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಆಫ್ರಿಕಾ, ಏಷ್ಯಾ ಮತ್ತು ಲ್ಯಾಟಿನ್‌ ಅಮೆರಿಕದ ದೇಶಗಳಿಗೆ ಕ್ರಮವಾಗಿ ಶೇ 37.5, ಶೇ 22.9 ಹಾಗೂ ಶೇ 21.4ರಷ್ಟು ದ್ವಿಚಕ್ರ ವಾಹನಗಳನ್ನು ರಫ್ತು ಮಾಡಿದೆ.

ದ್ವಿಚಕ್ರ ವಾಹನ ತಯಾರಕರಾದ ಬಜಾಜ್ ಆಟೊ ಮತ್ತು ಟಿವಿಎಸ್‌ ಮೋಟರ್‌ ಕಂಪನಿಗಳು ಮೊದಲಾರ್ಧದಲ್ಲಿ ತಮ್ಮ ಒಟ್ಟಾರೆ ಮಾರಾಟದಲ್ಲಿ ಕ್ರಮವಾಗಿ ಶೇ 49 ಮತ್ತು ಶೇ 26ರಷ್ಟು ರಫ್ತು ಮಾಡಿವೆ ಎಂದು ಅದು ತಿಳಿಸಿದೆ.