ಚಕ್ರಬಡ್ಡಿ ಮನ್ನಾ ಯೋಜನೆ: ಫೆ. 29ರ ಸಾಲ ಆಧಾರ

ನವದೆಹಲಿ: ಮನ್ನಾ ಮಾಡಬೇಕಿರುವ ಚಕ್ರಬಡ್ಡಿಯ ಮೊತ್ತವನ್ನು ಲೆಕ್ಕ ಹಾಕಲು ಫೆಬ್ರುವರಿ 29ಕ್ಕೆ ಇದ್ದ ಸಾಲದ ಮೊತ್ತವನ್ನು ಪರಿಗಣಿಸಲಾಗುತ್ತದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಹೇಳಿದೆ.

₹ 2 ಕೋಟಿವರೆಗಿನ ಸಾಲದ ಆರು ತಿಂಗಳ ಅವಧಿಯ ಚಕ್ರಬಡ್ಡಿಯನ್ನು ಮನ್ನಾ ಮಾಡುವಂತೆ ಭಾರತೀಯ ರಿಸರ್ವ್‌ ಬ್ಯಾಂಕ್ (ಆರ್‌ಬಿಐ) ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು ಹಾಗೂ ಬ್ಯಾಂಕುಗಳಿಗೆ ಮಂಗಳವಾರ ಸೂಚನೆ ನೀಡಿದೆ. ಸಾಲದ ಕಂತುಗಳ ಮರುಪಾವತಿಗೆ ವಿನಾಯಿತಿ ನೀಡಿದ್ದ ಆರು ತಿಂಗಳ ಅವಧಿಯ ಚಕ್ರಬಡ್ಡಿಯ ಈ ಯೋಜನೆಯ ಅಡಿ ಮನ್ನಾ ಆಗಲಿದೆ.

ಚಕ್ರಬಡ್ಡಿಯ ಮೊತ್ತವನ್ನು ನವೆಂಬರ್ 5ರೊಳಗೆ ಮನ್ನಾ ಮಾಡಬೇಕು ಎಂದು ಸೂಚಿಸಲಾಗಿದೆ. ಮನ್ನಾ ಸೌಲಭ್ಯ ಪಡೆಯಲು ಸಾಲಗಾರರು ಅರ್ಜಿ ಸಲ್ಲಿಸಬೇಕಾದ ಅಗತ್ಯ ಇಲ್ಲ ಎಂದು ಹಣಕಾಸು ಸಚಿವಾಲಯ ಹೇಳಿದೆ.