₹87 ಲಕ್ಷ ಮೌಲ್ಯದ ಚಿನ್ನಾಭರಣ ಕಳವು: ಮನೆಗೆಲಸದಾಕೆ ಬಂಧನ

ಹೊಸಕೋಟೆ: ಕೆಲಸ ಮಾಡುತ್ತಿದ್ದ ಮನೆಯಲ್ಲಿ ₹87 ಲಕ್ಷ ಮೌಲ್ಯದ ಚಿನ್ನಾಭರಣ ಕಳ್ಳತನ ಮಾಡಿದ್ದ ಮನೆಗೆಲಸದ ಮಹಿಳೆಯನ್ನು ಹೊಸಕೋಟೆ ಪೊಲೀಸರು ಬಂಧಿಸಿ, 793 ಗ್ರಾಂ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ.

ಹಿರಿಯೂರಿನ ಶಕುಂತಲಾ ಬಂಧಿತ ಆರೋಪಿ. ಆವಲಹಳ್ಳಿ ಪೊಲೀಸ್‌ ಠಾಣೆ ವ್ಯಾಪ್ತಿಯ ನಿಂಬೇಕಾಯಿಪುರದ ಪೃಕ್ಷಾ ಸಿಲ್ವನಾ ವಿಲ್ಲಾದಲ್ಲಿ ಸುಮಂತ್‌ ಎಂಬುವವರ ಮನೆಯಲ್ಲಿ ಈಕೆ ಕೆಲಸ ಮಾಡುತ್ತಿದ್ದರು. ಮನೆಯ ಮಾಲೀಕರು ಊರಿಗೆ ಹೋದಾಗ ಚಿನ್ನದ ಒಡವೆ ಕದ್ದು, ಪರಾರಿಯಾಗಿದ್ದರು.

ಸುಮಂತ್‌ ದೂರು ಆಧರಿಸಿ ಶಂಕುತಲಾ ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಕದ್ದ ಒಡವೆಗಳನ್ನು ಹಿರಿಯೂರಿನ ತನ್ನ ಮನೆಯಲ್ಲಿ ಇರಿಸಿರುವುದಾಗಿ ತಿಳಿಸಿದಳು ಎಂದು ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಎಸ್‌.ಪಿ ಮಲ್ಲಿಕಾರ್ಜುನ ಬಾಲದಂಡಿ ಭಾನುವಾರ
ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

ವೈದ್ಯಕೀಯ ವಿದ್ಯಾರ್ಥಿ ಮೇಲೆ ಹಲ್ಲೆ: ಕಿತಗನೂರಿನ ಈಸ್ಟ್ ಪಾಯಿಂಟ್‌ ಕಾಲೇಜಿನ ವೈದ್ಯಕೀಯ ವಿದ್ಯಾರ್ಥಿ ನಂದಿಗಮ್‌ ಎಂಬುವರ ಮೇಲೆ ಹಲ್ಲೆ ನಡೆಸಿ, ಬೆದರಿಸಿ ಹಣ, ಮೊಬೈಲ್, ಬೈಕ್‌ ಕದ್ದು ಪರಾರಿಯಾಗಿದ್ದ ಕಿತ್ತಗನೂರು ಗ್ರಾಮದ ಶ್ರೀಕಾಂತ್‌ ಎಂಬುವವರನ್ನು ಆವಲಹಳ್ಳಿ ಪೊಲೀಸರು ಬಂಧಿಸಲಾಗಿದೆ.