ಗದಗ: ಅವಳಿ ನಗರಗಳಾದ ಗದಗ ಬೆಟಗೇರಿಯಲ್ಲಿ ಮಂಗಳವಾರ ಮಧ್ಯಾಹ್ನ ಒಂದು ಗಂಟೆಗೂ ಹೆಚ್ಚು ಸಮಯ ಸಾಧಾರಣ ಮಳೆ ಸುರಿಯಿತು.
ಮಂಗಳವಾರ ಬೆಳಿಗ್ಗೆಯಿಂದಲೂ ಬಿಸಿಲು ಮೋಡಗಳ ನಡುವೆ ಚಿಣ್ಣಾಟ ನಡೆದಿತ್ತು. ನಗರದಲ್ಲಿ ಬೆಳಿಗ್ಗೆ ಮೋಡ ಕವಿದ ವಾತಾವರಣವಿತ್ತು. ಮಧ್ಯಾಹ್ನ 12ರ ನಂತರ ಬಿಸಿಲಿನ ವಾತಾವರಣ ಕಂಡುಬಂತು. ಬಳಿಕ ಆಗಸದಲ್ಲಿ ಮತ್ತೇ ಮೋಡಗಳು ಮೇಳೈಸಿದವು. ವಾತಾವರಣದಲ್ಲಿ ಬದಲಾವಣೆ ಆಗಿ ಮಧ್ಯಾಹ್ನ 2.30ರ ಸುಮಾರಿಗೆ ಮಳೆ ಆರಂಭಗೊಂಡಿತು. ಒಮ್ಮೆ ಬಿರುಸಾಗಿ, ಮತ್ತೊಮ್ಮೆ ತುಂತುರಾಗಿ ಮಳೆ ಸುರಿಯಿತು. ಒಂದು ಗಂಟೆಗೂ ಹೆಚ್ಚು ಸಮಯ ಮಳೆ ಸುರಿದಿದ್ದರಿಂದಾಗಿ ಇಳೆ ತಂಪಾಯಿತು.
ಮಂಗಳವಾರ ಸುರಿದ ಮಳೆ ಮತ್ತೊಮ್ಮೆ ನಗರದಲ್ಲಿರುವ ಚರಂಡಿಗಳ ಅವ್ಯವಸ್ಥೆಯ ದರ್ಶನ ಮಾಡಿಸಿತು. ಕಟ್ಟಿಕೊಂಡಿದ್ದ ಚರಂಡಿಗಳಲ್ಲಿ ಮಳೆ ನೀರು ಸರಾಗವಾಗಿ ಹರಿಯಲು ಸಾಧ್ಯವಾಗದ ಕಾರಣ ಅದು ಕೊಳೆಚೆಯನ್ನೆಲ್ಲಾ ರಸ್ತೆಗೆ ತಂದು ಹರವಿತು. ಸಾಕಷ್ಟು ರಸ್ತೆಗಳಲ್ಲಿ ಚರಂಡಿ ತ್ಯಾಜ್ಯ ಹರಡಿಕೊಂಡಿದ್ದು ಕಂಡುಬಂತು.
ಸಂಜೆ ನಂತರವೂ ಹನಿ ಮಳೆ ಆಗುತ್ತಿದ್ದರಿಂದ ನಗರದಲ್ಲಿ ಜನಸಂಚಾರ ಕಡಿಮೆ ಆಗಿತ್ತು. ವ್ಯಾಪಾರ ವಹಿವಾಟು ಕೂಡ ಮಂದಗತಿಯಲ್ಲಿ ಸಾಗಿತ್ತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.