Factcheck: ಕೋವ್ಯಾಕ್ಸ್ ಒಪ್ಪಂದದಂತೆ ಭಾರತಕ್ಕೆ ವಿದೇಶಗಳಿಂದ ಬಂದ ಲಸಿಕೆ ಎಷ್ಟು?

‘ಕೋವ್ಯಾಕ್ಸ್‌ ಒಪ್ಪಂದದ ಪ್ರಕಾರ ಭಾರತವು ವಿದೇಶಗಳಿಗೆ 198 ಲಕ್ಷ ಡೋಸ್ ಕೋವಿಡ್ ಲಸಿಕೆ ರಫ್ತು ಮಾಡಿದೆ. ಇದಕ್ಕೆ ಪ್ರತಿಯಾಗಿ ಕೋವ್ಯಾಕ್ಸ್ ಮೂಲಕ 97 ದಶಲಕ್ಷ (9.7 ಕೋಟಿ) ಡೋಸ್‌ ಕೋವಿಡ್‌ ಲಸಿಕೆ ವಿದೇಶಗಳಿಂದ ಭಾರತಕ್ಕೆ ಬಂದಿದೆ’ ಎಂದು ಪೋಸ್ಟ್‌ಕಾರ್ಡ್ ಕನ್ನಡ ತನ್ನ ಫೇಸ್‌ಬುಕ್ ಪುಟದಲ್ಲಿ ಪೋಸ್ಟರ್‌ ಪ್ರಕಟಿಸಿದೆ.

ಕೋವ್ಯಾಕ್ಸ್‌ ಒಪ್ಪಂದದ ಅಡಿ 2021ರ ಏಪ್ರಿಲ್‌ 16ರ ಅಂತ್ಯಕ್ಕೆ ಭಾರತವು ವಿವಿಧ ದೇಶಗಳಿಗೆ 1.98 ಕೋಟಿ ಡೋಸ್‌ಗಳಷ್ಟು ಕೋವಿಶೀಲ್ಡ್ ಲಸಿಕೆಯನ್ನು ಪೂರೈಕೆ ಮಾಡಿದೆ. ಕೋವ್ಯಾಕ್ಸ್‌ ಒಪ್ಪಂದದಲ್ಲಿ ಆಸ್ಟ್ರಾಜೆನೆಕಾದ ಕೋವಿಶೀಲ್ಡ್ ಮತ್ತು ಫೈಝರ್- ಬಯೋಎನ್‌ಟೆಕ್‌ನ ಲಸಿಕೆಯನ್ನು ಮಾತ್ರ ಪೂರೈಕೆ ಮಾಡಲಾಗುತ್ತಿದೆ. ಈ ಒಪ್ಪಂದದ ಅಡಿ ಭಾರತಕ್ಕೆ ಬೇರೆ ಯಾವ ದೇಶವೂ ಲಸಿಕೆಯನ್ನು ಪೂರೈಕೆ ಮಾಡಿಲ್ಲ. ರಷ್ಯಾದ ಸ್ಪುಟ್ನಿಕ್-ವಿ ಲಸಿಕೆ ಕೋವ್ಯಾಕ್ಸ್‌ ಒಪ್ಪಂದದಲ್ಲಿ ಇಲ್ಲ. ಇದಕ್ಕೆ ಸಂಬಂಧಿಸಿದಂತೆ ಪೋಸ್ಟ್‌ಕಾರ್ಡ್ ಕನ್ನಡ ತನ್ನ ಫೇಸ್‌ಬುಕ್‌ ಪುಟದಲ್ಲಿ ಸುಳ್ಳು ಮಾಹಿತಿ ಹಂಚಿಕೊಂಡಿದೆ.