ADVERTISEMENT

ಫೆಡರರ್‌, ಜೋಕೊವಿಕ್‌, ನಡಾಲ್‌ ಎಲ್ಲ ಟೆನ್ನಿಸ್‌ ದೇವರು: ನಿಕ್‌ ಕಿರ್ಗಿಯೊಸ್‌

ಪ್ರಜಾವಾಣಿ ವೆಬ್‌ ಡೆಸ್ಕ್‌ 
Published 2 ಜುಲೈ 2021, 7:21 IST
Last Updated 2 ಜುಲೈ 2021, 7:21 IST
ನಿಕ್‌ ಕಿರ್ಗಿಯೊಸ್‌
ನಿಕ್‌ ಕಿರ್ಗಿಯೊಸ್‌   

ಲಂಡನ್‌:ಟೆನ್ನಿಸ್‌ ಪ್ರಪಂಚಕ್ಕೆ ರೋಜರ್‌ ಫೆಡರರ್‌, ನೋವಾ ಜೋಕೊವಿಕ್‌, ರಫೆಲ್‌ ನಡಾಲ್‌ ದೇವರು ಎಂದು ಆಸ್ಟ್ರೇಲಿಯಾದ ಟೆನ್ನಿಸ್‌ ತಾರೆ ನಿಕ್‌ ಕಿರ್ಗಿಯೊಸ್‌ ಬಣ್ಣಿಸಿದ್ದಾರೆ.

ಪ್ರಸಕ್ತ ಸನ್ನಿವೇಶದಲ್ಲಿ ಕ್ರೀಡೆಯತ್ತ ಜನರನ್ನು ಸೆಳೆಯಬಲ್ಲ, ಅಭಿಮಾನಿಗಳು ಕ್ರೀಡೆಯನ್ನು ಹೆಚ್ಚು ನೋಡುವಂತೆ ಮಾಡಬಲ್ಲ ಆಟಗಾರರು ಬೇಕಾಗಿದ್ದಾರೆ. ಅಂತಹ ಆಟಗಾರರಲ್ಲಿ ನಾನೂ ಒಬ್ಬನಿರಬಹುದೆಂದು ಭಾವಿಸುತ್ತೇನೆ ಎಂದು ಅವರು ಹೇಳಿಕೊಂಡಿದ್ದಾರೆ.

ವಿಂಬಲ್ಡನ್‌ನ ಎರಡನೇ ಸುತ್ತಿನಲ್ಲಿ ಇಟಲಿಯ ಗಿಯಾನ್‌ಲುಕಾ ಮಗೆರ್‌ ಅವರನ್ನು 7-6(9/7), 6-4, 6-4 ಸೆಟ್‌ಗಳಿಂದ ಮಣಿಸಿದ ನಿಕ್‌, 'ಎಲ್ಲರಿಗೂ ಫೆಡರರ್ ಅಥವಾ ಜೋಕೊವಿಕ್‌ ಅಥವಾ ನಡಾಲ್‌ ಆಗಲು ಸಾಧ್ಯವಿಲ್ಲ. ಇವರೆಲ್ಲರೂ ಲಕ್ಷಾಂತರ ಮಂದಿಗೆ ಸ್ಪೂರ್ತಿ ನೀಡುವಂತಹ ಆಟಗಾರರು. ಇಂತಹ ಆಟಗಾರರು ದಶಕಕ್ಕೆ ಒಬ್ಬರಂತೆ ಸಿಗುತ್ತಾರೆ. ಅವರು ದೇವರುಗಳು. ನಾನೂ ಅವರನ್ನು ದೇವರ ಸ್ಥಾನದಲ್ಲಿಯೇ ನೋಡುತ್ತೇನೆ' ಎಂದಿದ್ದಾರೆ.

ADVERTISEMENT

ಟೆನ್ನಿಸ್‌ನ ಕಿರಿಕ್‌ ಪಾರ್ಟಿಯೆಂದೇ ಗುರುತಿಸಿಕೊಂಡಿರುವ 26 ವರ್ಷದ ಕಿರ್ಗಿಯೊಸ್‌ ಶನಿವಾರ ನಡೆಯಲಿರುವ ಮೂರನೇ ಸುತ್ತಿನಲ್ಲಿ ಕೆನಡಾದ ಫೆಲಿಕ್ಸ್‌ ಅಗರ್‌ ಅಲಿಯಸಿಮ್‌ ಜೊತೆ ಸೆಣೆಸಲಿದ್ದಾರೆ.

'ಆದರೆ ಪ್ರಸ್ತುತ ಇತರ ಅಭಿಮಾನಿಗಳನ್ನು ಸೆಳೆಯುವಂತಹ ಆಟಗಾರರು ಬೇಕಾಗಿದ್ದಾರೆ. ಪ್ರೇಕ್ಷಕರು ಬಯಸುವ ಅಂತಹ ಆಟಗಾರರು ಇದ್ದಾರೆ ಎಂಬುದನ್ನು ನಂಬಿದ್ದೇನೆ. ಅಂತಹ ಆಟಗಾರರ ಪೈಕಿ ನಾನೂ ಒಬ್ಬ ಎಂದೆನಿಸುತ್ತದೆ. ನಾನು ನಿಕ್‌ ಕಿರ್ಗಿಯೊಸ್‌. ನನಗೆ ನಾನೇನು ಎಂಬುದು ಗೊತ್ತಿದೆ' ಎಂದು ಸದಾ ವಿವಾದಗಳಿಂದ ಸದ್ದು ಮಾಡುತ್ತಿರುವ ನಿಕ್‌ ಹೇಳಿದ್ದಾರೆ ಎಂದು 'ಎನ್‌ಡಿಟಿವಿ' ವರದಿ ಮಾಡಿದೆ.

ಕ್ರೀಡೆ ಮತ್ತು ಕ್ರೀಡಾಸಂಪ್ರದಾಯದ ಬಗ್ಗೆ ಗೌರವ ಹೊಂದಿಲ್ಲ ಎಂದು ನಿಕ್‌ ವಿರುದ್ಧ ನಡಾಲ್‌ ಮತ್ತು ಜೋಕೊವಿಕ್‌ ಆರೋಪಿಸಿದ್ದರು. ಇದಕ್ಕೆ ಪ್ರತಿಕ್ರಿಯೆಯಾಗಿ ನಡಾಲ್‌ ಅವರನ್ನು 'ಸೂಪರ್‌ ಸಾಲ್ಟಿ' ಮತ್ತು ಜೋಕೊವಿಕ್‌ ಅವರನ್ನು 'ಅ ಟೂಲ್‌' ಎಂದಿದ್ದರು.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.