ಬಾಲಕಿಗೆ ಆರ್ಥಿಕ ನೆರವು

ನಂಜನಗೂಡು: ನಗರದ ವಿದ್ಯಾನಗರ ಬಡಾವಣೆಯಲ್ಲಿ ಈಚೆಗೆ ಹುಚ್ಚುನಾಯಿ ದಾಳಿಗೆ ತುತ್ತಾಗಿ, ಗಾಯಗೊಂಡು ಶಸ್ತ್ರಚಿಕಿತ್ಸೆಗೊಳಗಾದ 7 ವರ್ಷದ ಬಾಲಕಿ ವಿಧಿಶಾಳಿಗೆ ನಗರದ ಪತಂಜಲಿ ಯೋಗ ಶಿಕ್ಷಣ ಸಮಿತಿ ವತಿಯಿಂದ ಸೋಮವಾರ ಆರ್ಥಿಕ ನೆರವು ನೀಡಲಾಯಿತು.

ಸಮಿತಿ ಸದಸ್ಯರು ನೀಡಿದ ದೇಣಿಗೆ ₹ 35,101ನ್ನು ಸಮಿತಿ ಅಧ್ಯಕ್ಷ ಆರ್.ವಿ.ರೇವಣ್ಣ ಬಾಲಕಿಗೆ ಹಸ್ತಾಂತರಿಸಿದರು.

ಹುಚ್ಚುನಾಯಿ ದಾಳಿಗೆ ತುತ್ತಾಗಿದ್ದ ವಿಧಿಶಾಳ ಎಡಭಾಗದ ಕೆನ್ನೆಯ ಭಾಗ ಗಂಭೀರವಾಗಿ ಗಾಯಗೊಂಡಿತ್ತು. ಪ್ಲಾಸ್ಟಿಕ್ ಸರ್ಜರಿಗೆ ಒಳಗಾಗಿದ್ದಳು. ವಿಧಿಶಾ ತಂದೆ ಪ್ರದೀಪ್ ಮಗಳಿಗೆ ಚಿಕಿತ್ಸೆ ಕೊಡಿಸಲಿಕ್ಕಾಗಿ ಹಣ ಹೊಂದಿಸಲು ಸಾಲ ಮಾಡಿದ್ದು, ಸಮಿತಿ ಗಮನಕ್ಕೆ ಬಂದಿದ್ದರಿಂದ ಈ ಆರ್ಥಿಕ ನೆರವು ನೀಡಲಾಗಿದೆ ಎಂದು ಸಮಿತಿ ಅಧ್ಯಕ್ಷ ರೇವಣ್ಣ ತಿಳಿಸಿದರು.

ಸಮಿತಿಯ ಗಣೇಶ್‍ಮೂರ್ತಿ, ಯೋಗ ಗುರು ಪ್ರಕಾಶ್, ಯೋಗ ಶಿಕ್ಷಕರಾದ ಚಂದ್ರಶೇಖರ್, ನಾಗೇಂದ್ರ ಇದ್ದರು.