ಪ್ರತಿಭಟನೆ ಪೊಗರಲ್ಲ, ಪ್ರತಿಪಾದನೆ

ಬೆಂಗಳೂರು:‘ಚಿಂತಕರು ಮತ್ತು ಹೋರಾಟಗಾರರ ನಡುವಿನ ಕಂದಕ ಕನ್ನಡದ ಉಳಿವಿಗೆ ಅಪಾಯ ತಂದೊಡ್ಡಲಿದೆ. ಈ ಕಂದಕವನ್ನು ಮುಚ್ಚಲು ಪರಸ್ಪರ ಕುಳಿತು ಮಾತನಾಡಬೇಕಿದೆ’ ಎಂದು ಸಾಹಿತಿ ಬರಗೂರು ರಾಮಚಂದ್ರಪ್ಪ ‌ಅಭಿಪ್ರಾಯಪಟ್ಟರು.

ನಗರದಲ್ಲಿ ಕರ್ನಾಟಕ ವಿಕಾಸ ರಂಗಮಂಗಳವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ‘ಕರ್ನಾಟಕದ ರಕ್ಷಣೆ ನಮ್ಮ ಹೊಣೆ’ ಕೃತಿ ಬಿಡುಗಡೆ ಮಾಡಿ ‌ಮಾತನಾಡಿದ ಅವರು, ‘ಹೋರಾಟ ಎನ್ನುವುದು ಮನೋಧರ್ಮ. ಅದು ಪೊಗರಲ್ಲ, ಪ್ರತಿಪಾದನೆ’ ಎಂದರು.

‘ಹೋರಾಟ ಮತ್ತು ನಮ್ರತೆಯನ್ನು ಒಗ್ಗೂಡಿಸಿಕೊಂಡ ವ್ಯಕ್ತಿತ್ವ ವ.ಚ. ಚನ್ನೇಗೌಡ ಅವರದ್ದು. ಅವರು ರಚಿಸಿದ ಈ ಕೃತಿ ಚಾರಿತ್ರಿಕ ಮಾಹಿತಿಯ ಕೈಪಿಡಿಯಂತಿದೆ. ‘ಕನ್ನಡ ಚಳವಳಿ ಬದುಕಿನ ಚಳವಳಿಯಾಗಬೇಕು’ ಮತ್ತು ‘ರಾಜ್ಯೋತ್ಸವ ಕೇವಲ ಉತ್ಸವವಾಗದೆ, ರಾಜ್ಯದ ಒಳಿತು ಕೆಡುಕುಗಳನ್ನು ಚಿಂತಿಸುವ ವೇದಿಕೆಯೂ ಆಗಬೇಕಿದೆ’ ಎನ್ನುವ ‌ಅವರ ಮಾತುಗಳು ಸತ್ಯ’ ಎಂದರು.

‘ಕನ್ನಡ ಪರ ಹೋರಾಟಗಾರರು ತಪ್ಪು ದಾರಿ ತುಳಿದಾಗ ಅವರಿಗೆ ಸರಿಯಾಗಿ ತಿಳಿಹೇಳುವ ಜವಾಬ್ದಾರಿಯನ್ನು ಚಿಂತಕರು ವಹಿಸುತ್ತಿದ್ದಾರೆಯೇ ಎನ್ನುವುದರ ಆತ್ಮಾವಲೋಕನ ಮಾಡಿಕೊಳ್ಳಬೇಕಿದೆ. ಕನ್ನಡ ಚಳವಳಿಯ ಆಶಯಗಳನ್ನು ಉಳಿಸಿಕೊಳ್ಳಲು ಬೇಕಾದಬೌದ್ಧಿಕ ನೆಲೆಯನ್ನು ಹೋರಾಟಗಾರರಿಗೆ ನೀಡಬೇಕಾದ ಜವಾಬ್ದಾರಿ ನಮ್ಮ ಮೇಲಿದೆ’ ಎಂದರು.

‘ಪ್ರಾದೇಶಿಕ ಪಕ್ಷಗಳು ನಮಗೆ ಬೇಕು ಎನ್ನುವುದು ಕನ್ನಡ ಪರ ಚಿಂತಕರ, ಚಳವಳಿಗಾರರ ಆಸೆ. ಪ್ರಾದೇಶಿಕ ಪಕ್ಷದ ಬೇಡಿಕೆ ತಪ್ಪಲ್ಲ. ಆದರೆ, ಪ್ರಾದೇಶಿಕ ಪಕ್ಷ ಎನ್ನುವುದರ ಅರಿವು ನಮಗಿದೆಯೇ? ಪ್ರಾದೇಶಿಕ ಅಸ್ಮಿತೆ, ಭಾಷೆ, ಸಂಸ್ಕೃತಿ
ಗಳನ್ನು ಒಳಗೊಂಡಿರುವ ಸೈದ್ಧಾಂತಿಕ ನಿಲುವನ್ನು ಪಡೆಯಲು ಸಾಧ್ಯವಿದ್ದರೆ ಅದನ್ನು ಪ್ರಾದೇಶಿಕ ಪಕ್ಷ ಎಂದು ಒಪ್ಪಿಕೊಳ್ಳಬಹುದು’ ಎಂದರು.

‘ರಾಷ್ಟ್ರೀಯ ಪಕ್ಷಗಳಲ್ಲೂ ಪ್ರಾದೇಶಿಕ ಪ್ರಜ್ಞೆ ಇರಬೇಕು. ಪಕ್ಷದ ಕಾರ್ಯಸೂಚಿ, ಜನ ಕೇಂದ್ರಿತವಾಗಿದ್ದರೆ ಮಾತ್ರ ಪ್ರಾದೇಶಿಕ ಪಕ್ಷವನ್ನು ಒಪ್ಪಿಕೊಳ್ಳಬಹುದು. ಆದರೆ, ಈ ದೇಶದಲ್ಲಿ ನಿಜವಾದ ಪ್ರಾದೇಶಿಕ ಪಕ್ಷಗಳು ಇಲ್ಲ’ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ಲೇಖಕ ರಾ.ನಂ. ಚಂದ್ರಶೇಖರ ಕೃತಿ ಕುರಿತು ಮಾತನಾಡಿದರು.ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಮನು ಬಳಿಗಾರ ಅಧ್ಯಕ್ಷತೆ ವಹಿಸಿದ್ದರು.