‘ಚಲನಚಿತ್ರ ಪೊಲೀಸ್‌ ಪ್ರತಿನಿಧೀಕರಣ’ ಮೌಲ್ಯಯುತ ಕೃತಿ: ಸತ್ತೂರು ಶ್ರೀ

ಚಾಮರಾಜನಗರ: ಆಳವಾದ ಸಂಶೋಧನೆ, ಅಧ್ಯಯನ ನಡೆಸದೆ ಯಾರದ್ದೋ ಮಾಹಿತಿಯನ್ನು ನಕಲು ಮಾಡಿ ಪುಸ್ತಕ ಬರೆಯುವ, ಸಂಶೋಧನಾ ಪ್ರಬಂಧಗಳನ್ನು ಸಿದ್ಧಪಡಿಸುತ್ತಿರುವ ಕಾಲಘಟ್ಟದಲ್ಲಿ ಜಿಲ್ಲಾ ಪೊಲೀಸ್ ಪರಿಷ್ಠಾಧಿಕಾರಿ ಬಿ.ಟಿ.ಕವಿತಾ ವಸ್ತುಸ್ಥಿತಿ ಆಧರಿಸಿ ರಚಿಸಿರುವ ‘ಚಲನಚಿತ್ರ ಪೊಲೀಸ್‌ ಪ್ರತಿನಿಧೀಕರಣ’ ಕೃತಿ ಹೆಚ್ಚು ಮೌಲ್ಯಯುತವಾಗಿದೆ ಎಂದು ಸುತ್ತೂರು ಕ್ಷೇತ್ರದ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಹೇಳಿದರು.

ನಗರದ ಡಾ.ರಾಜಕುಮಾರ್ ಜಿಲ್ಲಾ ರಂಗಮಂದಿರದಲ್ಲಿ ಶುಕ್ರವಾರ ಅಸ್ತಿತ್ವ ಸಾಂಸ್ಕೃತಿಕ ವೇದಿಕೆ ಹಾಗೂ ಹೆಮ್ಮರ ಫೌಂಡೇಷನ್‌ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ‘ಚಲನಚಿತ್ರ ಪ್ರತಿನಿಧೀಕರಣ ಕೃತಿ’ ಬಿಡುಗಡೆಗೊಳಿಸಿ ಮಾತನಾಡಿದ ಶ್ರೀಗಳು ‘ಸಂಶೋಧನೆ ತಪ್ಪಿಸ್ಸಿದ್ದಂತೆ. ಆಳವಾದ ಅಧ್ಯಯನ, ಚರ್ಚೆ, ಸಂವಾದಗಳ ಅಡಿಪಾಯದಲ್ಲಿ ಸಂಶೋಧನಾ ಗ್ರಂಥಗಳು ರಚನೆಯಾಗಬೇಕು. ಆದರೆ, ಪ್ರಸ್ತುತ ಕಾಲಘಟ್ಟದಲ್ಲಿ ಕಟ್‌ ಪೇಸ್ಟ್‌ ಕೃತಿಗಳೇ ಹೆಚ್ಚಾಗಿವೆ ಎಂದು ಬೇಸರ ವ್ಯಕ್ತಪಡಿಸಿದರು.

‘ಚಲನಚಿತ್ರ ಪೊಲೀಸ್‌ ಪ್ರತಿನಿಧೀಕರಣ’ ಕೃತಿಯಲ್ಲಿ ತಿಳಿಯದ ಬಹಳಷ್ಟು ಸಂಗತಿಗಳು ಹಾಗೂ ಕುತೂಹಲಗಳನ್ನು ಓದುಗರ ಮುಂದಿರಿಸಲಾಗಿದೆ. ಸಿನಿಮಾಗಳಲ್ಲಿ ಪೊಲೀಸ್ ಇಲಾಖೆಯ ಒಳ ಹೊರಗನ್ನು ಹೇಗೆ ಚಿತ್ರಿಸಲಾಗುತ್ತಿತ್ತು ಎಂಬ ವಸ್ತುನಿಷ್ಠ ಮಾಹಿತಿಯನ್ನು ಕಟ್ಟಿಕೊಡಲಾಗಿದ್ದು ನೈಜ ಸಂಗತಿಗಳನ್ನು ತಿಳಿಸಲಾಗಿದೆ ಎಂದು ಶ್ರೀಗಳು ಹೇಳಿದರು.

ಚಲನಚಿತ್ರ ಹಾಗೂ ದೃಶ್ಯಮಾಧ್ಯಮ ಅತ್ಯಂತ ಪ್ರಭಾವಶಾಲಿಯಾಗಿದ್ದು ಜನರ ಮನಸ್ಸನ್ನು ಬದಲಿಸುವ ಶಕ್ತಿ ಹೊಂದಿವೆ. ಸಿನಿಮಾಗಳು ಜನರ ಜೀವನದ ದಿಕ್ಕನ್ನೇ ಬದಲಿಸಿರುವ ಉದಾಹರಣೆಗಳಿವೆ ಎಂದರು.

ಪ್ರತಿ ವ್ಯಕ್ತಿಯಲ್ಲಿ ವಿಭಿನ್ನ ಕೌಶಲ ಶಕ್ತಿ ಅಂತರ್ಗತವಾಗಿರುತ್ತದೆ. ನಮ್ಮೊಳಗಿರುವ ಶಕ್ತಿಯನ್ನು ಸಮರ್ಥವಾಗಿ ದುಡಿಸಿಕೊಂಡರೆ ಜೀವನದಲ್ಲಿ ಯಶಸ್ಸು ಪಡೆಯಬಹುದು ಎಂದು ಸ್ವಾಮೀಜಿ ಕಿವಿಮಾತು ಹೇಳಿದರು.

ಮೈಸೂರು ವಿವಿ ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯ ನಿರ್ದೇಶಕಿ ಪ್ರೊ.ಎನ್‌.ಕೆ.ಲೋಲಾಕ್ಷಿ ಮಾತನಾಡಿ ‘ಕೃತಿಯಲ್ಲಿರುವ ಪ್ರತಿ ಅಕ್ಷರದ ಹಿಂದೆ ಸಂಶೋಧನೆ ನಡೆಸಿರುವುದು ಎದ್ದು ಕಾಣುತ್ತದೆ. ಪೊಲೀಸ್ ವ್ಯವಸ್ಥೆ ಹಾಗೂ ಸಿನಿಮಾ ಕ್ಷೇತ್ರವನ್ನು ಸಮ್ಮಿಳಿತಗೊಳಿಸಿ ವಸ್ತುನಿಷ್ಠವಾಗಿ ಕೃತಿ ರಚಿಸಲಾಗಿದೆ. ಸಣ್ಣ ವಿಚಾರಗಳು ಮಹತ್ವ ಪಡೆದುಕೊಂಡಿವೆ ಎಂದರು.

ಯಾರೂ ನಡೆಯದ ದಾರಿಯಲ್ಲಿ ನಡೆದು ಹೊಸತನವನ್ನು ಹೆಕ್ಕಿ ತೆಗೆದು ಅಕ್ಷರ ರೂಪ ನೀಡುವುದು ನಿಜವಾದ ಸಂಶೋಧನೆಯಾಗಿದ್ದು ಅಂತಹ ಕೆಲಸವನ್ನು ಬಿ.ಟಿ.ಕವಿತಾ ಮಾಡಿದ್ದಾರೆ ಎಂದು ಶ್ಲಾಘಿಸಿದರು.

ಸಂಸ್ಕೃತಿ ಚಿಂತಕ ಶಂಕರ ದೇವನೂರು ಮಾತನಾಡಿ, ಚಲನಚಿತ್ರ ಪೊಲೀಸ್ ಪ್ರತಿನಿಧೀಕರಣ ಆಳವಾದ ಅಧ್ಯಯನ, ನಿಖರ ಹಾಗೂ ನೈಜ ಮಾಹಿತಿ ಒಳಗೊಂಡಿರುವ ಕೃತಿಯಾಗಿದೆ ಎಂದರು.

ಬದುಕು ಬೆಳಗಬೇಕು, ಬೆಳಕು ಬಯಲಾಗಬೇಕು, ಇಡೀ ಪರಿಸರವನ್ನು ಸಗಂಧಯುಕ್ತವಾಗಿಡುವ ಹೂವಿನಂತೆ ನಮ್ಮೆಲ್ಲರ ಬದುಕು ಇರಬೇಕು. ಪ್ರತಿ ಕಾರ್ಯದಲ್ಲಿ ಪ್ರಾವಿಣ್ಯತೆ ಸಾಧಿಸಿದರೆ ದೇಶ ಸಮೃದ್ಧವಾಗಲಿದೆ ಎಂದು ಕಿವಿಮಾತು ಹೇಳಿದರು. 

ಶರಣ ಪರ‍ಂ‍ಪರೆಯ ಬೇರಿನಲ್ಲಿ ಸಂವಿಧಾನದ ಆಶಯಗಳು ಅಡಗಿದ್ದು ಶರಣ ಸಂಸ್ಕೃತಿ ಪರಂಪರೆ ಗೌರವಿಸುವ ಪಾಲಿಸುವ ಪ್ರತಿಯೊಬ್ಬರೂ ಸಂವಿಧಾನವನ್ನು ಗೌರವಿಸಿದಂತೆ ಎಂದು ಶಂಕರ ದೇವನೂರು ಹೇಳಿದರು.

ಮಂಡ್ಯ ಜಿಲ್ಲೆ ಅಬಕಾರಿ ಉಪ ಆಯುಕ್ತ ಆರ್‌.ನಾಗಶಯನ ಮಾತನಾಡಿದರು.