ದಾವಣಗೆರೆ|7 ಕಿ.ಮೀ ಉದ್ದದ ಕನ್ನಡ ಧ್ವಜದ ಮೆರವಣಿಗೆ:ಎಲ್ಲೆಡೆ ಮೊಳಗಿದ ಕನ್ನಡದ ಕಹಳೆ

ದಾವಣಗೆರೆ: ಹಳದಿ ಮತ್ತು ಕೆಂಪು ಬಣ್ಣದಿಂದ ಅಲಂಕೃತಗೊಂಡ ರಸ್ತೆ. ಸಾಲುಗಟ್ಟಿ ನಿಂತಿದ್ದ ವಿದ್ಯಾರ್ಥಿಗಳ ಕೈಯಲ್ಲಿ ನಲಿದಾಡುತ್ತಿದ್ದ ಕನ್ನಡ ಧ್ವಜ. ಕರ್ಣಾನಂದ ಉಂಟು ಮಾಡುತ್ತಿದ್ದ ಕನ್ನಡ ಗೀತೆಗಳು. ಕರ್ನಾಟಕವನ್ನು ವಿಶ್ವಮಟ್ಟಕ್ಕೆ ಏರಿಸಿದ ಮಹನೀಯರ ಸ್ತಬ್ಧಚಿತ್ರಗಳು..

ನಗರದಲ್ಲಿ ಶುಕ್ರವಾರ ಕನ್ನಡದ ಕಹಳೆ ಮೊಳಗಿತ್ತು. 70ನೇ ಕರ್ನಾಟಕ ರಾಜ್ಯೋತ್ಸವದ ಅಂಗವಾಗಿ ಅಖಿಲ ಕರ್ನಾಟಕ ಕನ್ನಡ ಚಳವಳಿ ಕೇಂದ್ರ ಸಮಿತಿ ಹಾಗೂ ಬಿ.ಎಸ್. ಚನ್ನಬಸಪ್ಪ ಆ್ಯಂಡ್ ಸನ್ಸ್‌ ಜವಳಿ ಮಳಿಗೆ ವತಿಯಿಂದ ಹಮ್ಮಿಕೊಂಡಿದ್ದ 7 ಕಿ.ಮೀ. ಉದ್ದದ ಕನ್ನಡ ಬಾವುಟದ ಮೆರವಣಿಗೆ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಯಿತು.

ಅತಿ ಉದ್ದದ ಕನ್ನಡ ಧ್ವಜದ ದಾಖಲೆಗಾಗಿ ಭವ್ಯ ಮೆರವಣಿಗೆ ಆಯೋಜಿಸಲಾಗಿತ್ತು. ಕನ್ನಡಪರ ಸಂಘಟನೆಯ ಕಾರ್ಯಕರ್ತರು ಈ ಕಾರ್ಯಕ್ಕೆ ಒಗ್ಗೂಡಿದ್ದರು. ಖಾಸಗಿ ಶಿಕ್ಷಣ ಸಂಸ್ಥೆಗಳ ಸಾವಿರಾರು ವಿದ್ಯಾರ್ಥಿಗಳು ಕೈಜೋಡಿಸಿದ್ದರು. ಬೆಳಿಗ್ಗೆಯಿಂದ ಆರಂಭವಾದ ಈ ಮೆರವಣಿಗೆ ಹತ್ತಾರು ಕಿ.ಮೀ ಸಂಚರಿಸಿ ಮಧ್ಯಾಹ್ನ ಮುಕ್ತಾಯವಾಯಿತು.

ಜಿಲ್ಲಾಧಿಕಾರಿ ಜಿ.ಎಂ. ಗಂಗಾಧರಸ್ವಾಮಿ ಅವರು ಜಯದೇವ ವೃತ್ತದಲ್ಲಿ ಭುವನೇಶ್ವರಿ ಪ್ರತಿಮೆಗೆ ಪುಷ್ಪಾರ್ಚನೆ ಮಾಡಿ ಚಾಲನೆ ನೀಡಿದರು. ಇಲ್ಲಿಂದ ಆರಂಭವಾದ ಕನ್ನಡ ಧ್ವಜದ ಮೆರವಣಿಗೆ ಹದಡಿ ರಸ್ತೆ, ವಿದ್ಯಾನಗರದ ಗಾಂಧಿ ವೃತ್ತ, ಡೆಂಟಲ್‌ ಕಾಲೇಜು ರಸ್ತೆ, ಗುಂಡಿ ಮಹಾದೇವಪ್ಪ ವೃತ್ತದ ಮೂಲಕ ಸಾಗಿ ರಿಂಗ್ ರಸ್ತೆ ತಲುಪಿತು. ಶಾರದಾಂಬ ದೇವಸ್ಥಾನ ವೃತ್ತ, ಸಂಗೊಳ್ಳಿ ರಾಯಣ್ಣ ವೃತ್ತ, ಪಿ.ಬಿ. ರಸ್ತೆ, ಎವಿಕೆ ಕಾಲೇಜು ರಸ್ತೆ ಮೂಲಕ ಜಯದೇವ ವೃತ್ತಕ್ಕೆ ಮರಳಿತು.

ಕನ್ನಡ ಬಾವುಟ ಸಾಗುವ ಮಾರ್ಗವನ್ನು ಹಳದಿ ಮತ್ತು ಕೆಂಪು ಬಣ್ಣದಿಂದ ಸಿಂಗರಿಸಲಾಗಿತ್ತು. ಪ್ರಮುಖ ವೃತ್ತಗಳಲ್ಲಿ ಮಹಾದ್ವಾರಗಳನ್ನು ನಿರ್ಮಿಸಲಾಗಿತ್ತು. ಕನ್ನಡದ ಭಾವನೆಗಳನ್ನು ಪ್ರೇರೇಪಿಸುವಂತಹ ವಾತಾವರಣ ಸೃಷ್ಟಿಯಾಗಿತ್ತು. ಕನ್ನಡ ಧ್ವಜದ ಬಣ್ಣದ ಶಾಲುಗಳು ಎಲ್ಲೆಡೆ ರಾರಾಜಿಸಿದವು.

ಕನ್ನಡ ಭಾವುಟದ ಮೆರವಣಿಗೆಗೆ ಸಾಂಸ್ಕೃತಿಕ ಕಲಾತಂಡ, ಸ್ತಬ್ಧಚಿತ್ರಗಳು ಮೆರಗು ತಂದವು. ಡೊಳ್ಳು ಕುಣಿತ, ನಂದಿ ಧ್ವಜ, ಕಹಳೆ, ವೀರಗಾಸೆ ಸೇರಿದಂತೆ ಹಲವು ಕಲಾತಂಡಗಳು ಪಾಲ್ಗೊಂಡಿದ್ದವು. ಕೊಂಡುಕುರಿ, ಅನುಭವ ಮಂಟಪ, ಬಸವಣ್ಣ, ಭುವನೇಶ್ವರಿ, ನಾಲ್ವಡಿ ಕೃಷ್ಣರಾಜ ಒಡೆಯರ್‌ ಸೇರಿ ಹಲವು ಸ್ತಬ್ಧಚಿತ್ರಗಳು ಸಾಗಿದವು.

ಮಾರ್ಗದ ಉದ್ದಕ್ಕೂ ವಿದ್ಯಾರ್ಥಿಗಳಿದ್ದರು. ನಿಗದಿತ ಸ್ಥಳಕ್ಕೆ ವಿದ್ಯಾರ್ಥಿಗಳನ್ನು ನಿಯೋಜಿಸಿ ಧ್ವಜ ಹಿಡಿಯಲು ಸೂಚಿಸಲಾಗಿತ್ತು. ಟ್ರಾಲಿಯಲ್ಲಿ ತಂದಿದ್ದ ಏಳು ಕಿ.ಮೀ ಉದ್ದದ ಧ್ವಜವನ್ನು ನಿಧಾನವಾಗಿ ವಿದ್ಯಾರ್ಥಿಗಳ ಕೈಗೆ ಹಸ್ತಾಂತರಿಸುತ್ತ ಸಾಗಲಾಯಿತು. ಕನ್ನಡ ಧ್ವಜದ ಈ ಭವ್ಯತೆಯನ್ನು ಕಣ್ತುಂಬಿಕೊಳ್ಳಲು ಪ್ರಮುಖ ರಸ್ತೆಗಳಲ್ಲಿ ಜನರು ನಿಂತಿದ್ದರು. ಮೊಬೈಲ್‌ ಹಿಡಿದು ಸೆಲ್ಫಿ ತೆಗೆದುಕೊಂಡು ಸಂಭ್ರಮಿಸಿದರು.

ಬಿ.ಎಸ್. ಚನ್ನಬಸಪ್ಪ ಆ್ಯಂಡ್ ಸನ್ಸ್ ಸಂಸ್ಥೆಯ ಮಾಲೀಕ ಬಿ.ಎಸ್. ಮೃನಾಲ್, ಅಖಿಲ ಕರ್ನಾಟಕ ಕನ್ನಡ ಚಳವಳಿ ಕೇಂದ್ರ ಸಮಿತಿಯ ಜಿಲ್ಲಾ ಘಟಕದ ಅಧ್ಯಕ್ಷ ಶಿವರತನ್, ಸಿದ್ಧಗಂಗಾ ಸಂಸ್ಥೆಯ ಮುಖ್ಯಸ್ಥೆ ಜಸ್ಟಿನ್ ಡಿಸೌಜಾ, ಕನ್ನಡಪರ ಸಂಘಟನೆಗಳ ಮುಖಂಡರಾದ ಟಿ. ಶಿವಕುಮಾರ್, ಎಂ.ಎಸ್. ರಾಮೇಗೌಡ, ಶುಭಮಂಗಳಾ, ವಾಸುದೇವ ರಾಯ್ಕರ್, ಕೆ.ಟಿ. ಗೋಪಾಲಗೌಡ, ಮಾಗಾನಹಳ್ಳಿ ಮಂಜುನಾಥ್, ಎನ್.ಟಿ. ಮಂಜುನಾಥ್, ವೀರಣ್ಣ ಹಾಜರಿದ್ದರು.