ಮುನಿರಾಬಾದ್: ಆಸರೆ ಇಲ್ಲದ ಬದುಕಿಗೆ ‘ವಾತ್ಸಲ್ಯ’ದ ಸೂರು

ಮುನಿರಾಬಾದ್: ಸಮೀಪದ ಅಗಳಕೇರಾ ಗ್ರಾಮದ ಶಾಸ್ತ್ರಿನಗರ ಪ್ರದೇಶದ ನಿರ್ಗತಿಕ ಮಹಿಳೆ ರಾಜಾ ಬೀ ಅವರು ವಾತ್ಸಲ್ಯ ಎಂಬ ಸೂರಿನ (ವಾಸದಮನೆ) ಫಲಾನುಭವಿಯಾಗಿದ್ದು ಈಚೆಗೆ ಅವರಿಗೆ ‘ಗೃಹಪ್ರವೇಶ’ದ ಭಾಗ್ಯ ದೊರೆಯಿತು.

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯು ಗ್ರಾಮೀಣಾಭಿವೃದ್ಧಿಯ ಪರಿಕಲ್ಪನೆಯಲ್ಲಿ ತನ್ನ ಸ್ವಸಹಾಯ ಸಂಘದ ಮೂಲಕ, ನಿರ್ಗತಿಕರಿಗೆ, ವಾಸಯೋಗ್ಯ ಮನೆ ಇಲ್ಲದವರಿಗೆ ‘ವಾತ್ಸಲ್ಯ’ ಎಂಬ ಯೋಜನೆ ಜಾರಿಗೊಳಿಸಿದೆ. ಅದರಂತೆ ಗ್ರಾಮದ ಮಹಿಳೆ ರಾಜಾ ಬೀ ಅವರಿಗೆ ಮನೆ ನಿರ್ಮಿಸಿ ಕೊಡಲಾಗಿದೆ.

ಮನೆ ಹಸ್ತಾಂತರ ಸಂದರ್ಭದಲ್ಲಿ ಮಾತನಾಡಿದ ಪ್ರಾದೇಶಿಕ ನಿರ್ದೇಶಕ ಜೆ.ಚಂದ್ರಶೇಖರ ಅವರು, ‘ಯೋಜನೆಯ ವತಿಯಿಂದ ರಾಜ್ಯದಾದ್ಯಂತ 1,700 ಜನರಿಗೆ ಮಾಶಾಸನ, 750ಕ್ಕೂ ಹೆಚ್ಚಿನ ‘ವಾತ್ಸಲ್ಯ’ ಮನೆಗಳನ್ನು ನಿರ್ಮಿಸಿ ಕೊಡಲಾಗಿದೆ’ ಎಂದರು.

ಜಿಲ್ಲಾ ನಿರ್ದೇಶಕ ಪ್ರಕಾಶ್ ರಾವ್, ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಯಂಕಮ್ಮ ಕನಕರಾಯ, ಬಸವರಾಜ, ತಾಲ್ಲೂಕು ಯೋಜನಾಧಿಕಾರಿ ರಾಜೇಶ್, ಮೇಲ್ವಿಚಾರಕ ಶರೀಫ ನದಾಫ್, ಮಹಿಳಾ ಜ್ಞಾನವಿಕಾಸ ಸಮನ್ವಯಾಧಿಕಾರಿ ಲಕ್ಷ್ಮೀದೇವಿ ಹಾಗೂ ಒಕ್ಕೂಟದ ಪದಾಧಿಕಾರಿಗಳು ಇದ್ದರು.