ಮುಸ್ಲಿಂ ಸ್ತ್ರೀಸುನ್ನತಿ ನಿಷೇಧಕ್ಕೆ ಅರ್ಜಿ:ಕೇಂದ್ರಕ್ಕೆ ಸುಪ್ರೀಂಕೋರ್ಟ್ ನೋಟಿಸ್‌

ನವದೆಹಲಿ: ಮುಸಲ್ಮಾನರಲ್ಲಿ ಅದರಲ್ಲೂ ವಿಶೇಷವಾಗಿ ದಾವೂದಿ ಬೊಹ್ರಾ ಪಂಗಡದಲ್ಲಿ ಜಾರಿಯಲ್ಲಿರುವ ಸ್ತ್ರೀ ಸುನ್ನತಿ ನಿಷೇಧಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಲು ಸುಪ್ರೀಂಕೋರ್ಟ್‌ ಶುಕ್ರವಾರ ಸಮ್ಮತಿ ನೀಡಿದೆ. 

ಈ ಕುರಿತು ಸ್ವಯಂಸೇವಾ ಸಂಸ್ಥೆಯೊಂದು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಬಿ.ವಿ.ನಾಗರತ್ನ, ಆರ್‌.ಮಹಾದೇವನ್‌ ನೇತೃತ್ವದ ನ್ಯಾಯಪೀಠವು ಕೇಂದ್ರ ಸರ್ಕಾರಕ್ಕೆ ನೋಟಿಸ್‌ ಜಾರಿ ಮಾಡಿದೆ. 

ಚಾಲ್ತಿಯಲ್ಲಿರುವ ಈ ಪದ್ಧತಿಯು ಇಸ್ಲಾಂನ ಭಾಗವಲ್ಲ, ಮಕ್ಕಳ ಹಕ್ಕುಗಳನ್ನು ಉಲ್ಲಂಘಿಸುತ್ತದೆ ಎಂದು ಎನ್‌ಜಿಒ ಚೇತನಾ ವೆಲ್ಫೇರ್‌ ಸೊಸೈಟಿಯು ತನ್ನ ಅರ್ಜಿಯಲ್ಲಿ ತಿಳಿಸಿತ್ತು.

‘ಈ ಪ‍ದ್ಧತಿಯನ್ನು ನಿರ್ದಿಷ್ಟವಾಗಿ ನಿಷೇಧಿಸುವ ಯಾವುದೇ ಸ್ವಾತಂತ್ರ್ಯ ಕಾನೂನು ಜಾರಿಯಲ್ಲಿಲ್ಲ. ಈ ಕೃತ್ಯವು ಬಿಎನ್‌ಎಸ್‌ ಕಲಂ 113, 118(1) ಹಾಗೂ 118(3)ರ ಅಡಿ ಕೂಡ ಅಪರಾಧವಾಗಿದೆ. ಫೋಕ್ಸೊ ಕಾಯ್ದೆ ಪ್ರಕಾರ, ಅಪ್ರಾಪ್ತರ ಜನನಾಂಗವನ್ನು ವೈದ್ಯಕೀಯ ಕಾರಣ ಹೊರತುಪಡಿಸಿ ಮುಟ್ಟುವುದು ಕೂಡ ಅಪರಾಧವಾಗಿದೆ. ವಿಶ್ವ ಆರೋಗ್ಯ ಸಂಸ್ಥೆ ಪ್ರಕಾರವೂ, ಎಫ್‌ಜಿಎಂ ಎಂಬುದು ಹೆಣ್ಣು ಮಕ್ಕಳು ಹಾಗೂ ಮಹಿಳೆಯರ ಮಾನವ ಹಕ್ಕುಗಳ ಘೋರ ಉಲ್ಲಂಘನೆಯಾಗಿದೆ’ ಎಂದು ಅರ್ಜಿಯಲ್ಲಿ ತಿಳಿಸಿದೆ.