ದೇಶಕ್ಕೆ ಆಡಲು ಆದ್ಯತೆ: ಟೆನಿಸ್‌ ಆಟಗಾರರಿಗೆ ಸಾಯ್‌ ಸೂಚನೆ

ನವದೆಹಲಿ: ಭಾರತ ಕ್ರೀಡಾ ಪ್ರಾಧಿಕಾರದ (ಸಾಯ್‌) ವಿವಿಧ ಯೋಜನೆಗಳ ಮೂಲಕ ಹಣಕಾಸು ನೆರವು ಪಡೆಯುವ ಭಾರತದ ಟೆನಿಸ್‌ ಆಟಗಾರರು ದೇಶಕ್ಕೆ ಆಡು ವುದಕ್ಕೆ ಆದ್ಯತೆ ನೀಡಬೇಕು. ದೇಶಕ್ಕೆ ಆಡಲು ಸಕಾರಣವಿಲ್ಲದೇ ನಿರಾಕರಿಸಿದರೆ ನೆರವನ್ನು ಮರಳಿ ವಸೂಲಿ ಮಾಡಲಾಗುವುದು ಎಂದು ಸಾಯ್‌ನ ಆದೇಶದಲ್ಲಿ ತಿಳಿಸಲಾಗಿದೆ.

ಹಣಕಾಸಿನ ನೆರವಿಗೆ ಪ್ರತಿಯಾಗಿ ಉತ್ತರದಾಯಿತ್ವ ಹೊಂದಿರಲು ಸಾಯ್ ಈ ಕ್ರಮಕ್ಕೆ ಮುಂದಾಗಿದೆ. ಟಾರ್ಗೆಟ್‌ ಏಷ್ಯನ್ ಗೇಮ್ಸ್‌ ಗ್ರೂಪ್‌ (ಟಿಎಜಿಜಿ– ಟ್ಯಾಗ್) ಅಡಿ ಆಯ್ಕೆಯಾದ ಆಟಗಾರರು ಇಂಥ ವಾಗ್ದಾನ ಪತ್ರಕ್ಕೆ ಸಹಿಹಾಕಬೇಕೆಂದು ತಿಳಿಸಲಾಗಿದೆ. ಅವರು ಪಡೆಯುವ ಹಣಕಾಸಿನ ನೆರವು ದೇಶದ ಕ್ರೀಡಾ ಉನ್ನತಿಗೆ ಕಾಣಿಕೆ ನೀಡಬೇಕಾದ ಹೊಣೆಗಾರಿಕೆಯನ್ನೂ ಹೊಂದಿದೆ ಎಂಬ ಒಕ್ಕಣೆಯ ಪತ್ರಕ್ಕೆ ಸಹಿ ಮಾಡುವುದನ್ನು ಕಡ್ಡಾಯಗೊಳಿಸಲಾಗಿದೆ.