ಭೂಮಿಗೆ ಬಿದ್ದ ನಾಸಾದ 38 ವರ್ಷದ ಹಳೇ ಉಪಗ್ರಹ: ಇಲ್ಲಿದೆ ಮಾಹಿತಿ

ಕೇಪ್ ಕ್ಯಾನವೆರಲ್ (ಅಮೆರಿಕ): ಭೂಮಿಯ ಸುತ್ತ 38 ‌ ವರ್ಷಗಳ ಕಾಲ ಸುತ್ತು ಹಾಕಿದ್ದ, ನಿಷ್ಕ್ರಿಯ ಉಪಗ್ರಹವು ನಿರೀಕ್ಷೆಯಂತೇ ಭೂಮಿಗೆ ಬಿದ್ದಿದೆ ಎಂದು ನಾಸಾ ಮಂಗಳವಾರ ತಿಳಿಸಿದೆ.

1984 ರಲ್ಲಿ ಭೂ ಕಕ್ಷೆ ಸೇರಿದ್ದ ಉಪಗ್ರಹವು ಅಲಾಸ್ಕಾದಿಂದ ಕೆಲವು ನೂರು ಮೈಲುಗಳಷ್ಟು ದೂರದ ಬೇರಿಂಗ್ ಸಮುದ್ರಕ್ಕೆ ಭಾನುವಾರ ತಡರಾತ್ರಿ ಬಿದ್ದಿದೆ ಎಂದು ರಕ್ಷಣಾ ಇಲಾಖೆ ದೃಢಪಡಿಸಿತು. ಅದರ ಅವಶೇಷಗಳಿಂದ ಯಾರಿಗೂ ಹಾನಿಯಾಗಿಲ್ಲ ಎಂದು ನಾಸಾ ಸ್ಪಷ್ಟಪಡಿಸಿದೆ.

2,450 ಕಿಲೋ ಗ್ರಾಂ ತೂಕದ ಉಪಗ್ರಹವು ಭೂಮಿಗೆ ಬೀಳುತ್ತಿರುವುದಾಗಿ ನಾಸಾ ಕಳೆದ ವಾರ ಹೇಳಿತ್ತು. ಭೂಮಿಯ ವಾತಾವರಣ ಪ್ರವೇಶಿಸುತ್ತಲೇ ಉಪಗ್ರಹ ಉರಿದುಹೋಗಲಿದೆ ಎಂದು ತಿಳಿಸಿತ್ತು. ಅದರ ಕೆಲವು ತುಣುಕುಗಳು ಯಾರಿಗಾದರೂ ತೊಂದರೆ ಕೊಟ್ಟರೂ ಕೊಡಬಹುದು ಎಂದು ಮುನ್ನೆಚ್ಚರಿಕೆ ನೀಡಿತ್ತು. ಆದರೆ, ಅಂಥ ಯಾವುದೇ ಸಮಸ್ಯೆಗಳಿಲ್ಲದೇ ಉಪಗ್ರಹವು ಸಾಗರದಲ್ಲಿ ಲೀನವಾಗಿದೆ.

ಇಆರ್‌ಬಿಎಸ್‌ ಎಂದು ಕರೆಯಲಾಗುವ ‘ಅರ್ತ್‌ ರೇಡಿಯೇಷನ್‌ ಬಜೆಟ್‌ ಸ್ಯಾಟಿಲೆಟ್‌’ ಅನ್ನು 1984 ರಲ್ಲಿ ಬಾಹ್ಯಾಕಾಶ ನೌಕೆ ಚಾಲೆಂಜರ್‌ ಮೂಲಕ ನಭಕ್ಕೆ ಹಾರಿಸಲಾಗಿತ್ತು. ಅದರ ನಿರೀಕ್ಷಿತ ಜೀವಿತಾವಧಿಯು ಎರಡು ವರ್ಷಗಳಷ್ಟೇ ಆಗಿದ್ದವು. ಆದರೆ, 2005ರಲ್ಲಿ ನಿಷ್ಕ್ರಿಯವಾದ ಉಪಗ್ರಹ, ಅಲ್ಲಿಯ ವರೆಗೂ ಓಝೋನ್ ಮತ್ತು ವಾತಾವರಣದ ಇತರ ಮಾಪನಗಳನ್ನು ಮಾಡುತ್ತಲೇ ಇತ್ತು. ಭೂಮಿಯು ಸೂರ್ಯನಿಂದ ಹೀರಿಕೊಳ್ಳುವ ಶಕ್ತಿ ಮತ್ತು ಹೊರಸೂಸುವ ಶಕ್ತಿಯನ್ನು ಅಧ್ಯಯನ ಮಾಡುವ ಉಪಗ್ರಹವನ್ನು ‘ಅರ್ತ್‌ ರೇಡಿಯೇಷನ್‌ ಬಜೆಟ್‌ ಸ್ಯಾಟಿಲೆಟ್‌’ ಎನ್ನಲಾಗುತ್ತದೆ. ಅದನ್ನೇ ಈ ಉಪಗ್ರಹವೂ ಮಾಡಿತ್ತು.

1984ರಲ್ಲಿ ಈ ಉಪಗ್ರವನ್ನು ವಿಶೇಷವಾಗಿ ಕಕ್ಷೆಗೆ ಸೇರಿಸಲಾಗಿತ್ತು. ಅಮೆರಿಕದ ಮೊದಲ ಮಹಿಳಾ ಗಗನಯಾನಿ ಸ್ಯಾಲಿ ರೈಡ್ ಅವರು ಚಾಲೆಂಜರ್‌ ನೌಕೆಯ ‘ರೋಬೋಟ್ ಆರ್ಮ್’ ಎಂಬ ಸಾಧನ ಬಳಸಿ ಇಆರ್‌ಬಿಎಸ್‌ ಅನ್ನು ಕಕ್ಷೆಗೆ ಬಿಡುಗಡೆ ಮಾಡಿದ್ದರು. ಅದೇ ಕಾರ್ಯಾಚರಣೆಯಲ್ಲಿ ಅಮೆರಿಕದ ಮಹಿಳಾ ಗಗನಯಾನಿ ಕ್ಯಾಥರಿನ್ ಸುಲ್ಲಿವನ್ ಅವರು ಬಾಹ್ಯಾಕಾಶ ನಡಿಗೆಯನ್ನು ಕೈಗೊಂಡಿದ್ದರು. ಇಬ್ಬರು ಮಹಿಳಾ ಗಗನಯಾತ್ರಿಗಳು ಒಟ್ಟಿಗೆ ಬಾಹ್ಯಾಕಾಶಕ್ಕೆ ಹಾರಿದ್ದು ಅದೇ ಮೊದಲ ಬಾರಿಯೂ ಆಗಿತ್ತು.