ನಮ್ಮ ಬದುಕಿನಲ್ಲಿ ಗಾಂಧಿ

7

ನಮ್ಮ ಬದುಕಿನಲ್ಲಿ ಗಾಂಧಿ

Published:
Updated:

ಸಪ್ತ ಪಾತಕಗಳಿಂದ ದೂರ

ಮಹಾತ್ಮ ಗಾಂಧೀಜಿ ಅವರು ವ್ಯಕ್ತಿಯಲ್ಲ ಶಕ್ತಿ. ಅವರು ನೀಡಿದ ಸಂದೇಶಗಳು ಸರಳವಾಗಿದ್ದು, ಪ್ರತಿಯೊಬ್ಬರೂ ಪಾಲಿಸಬಹುದಾದಂತಹವು. ಸಮಾಜದಲ್ಲಿನ ಸಮಸ್ಯೆಗಳ ಕಾರಣಗಳನ್ನು ಗುರುತಿಸಿದ್ದ ಅವರು ಸಪ್ತ ಪಾತಕಗಳಿಂದ ದೂರವಿರಬೇಕು ಎಂದಿದ್ದರು. ಅವೆಂದರೆ, ದುಡಿಮೆ ಇಲ್ಲದ ಸಂಪತ್ತು, ಆತ್ಮಸಾಕ್ಷಿ ಇಲ್ಲದ ಸಂತೋಷ, ಚಾರಿತ್ರ್ಯವಿಲ್ಲದ ಶಿಕ್ಷಣ, ನೀತಿ ಇಲ್ಲದ ವ್ಯಾಪಾರ, ಮಾನವೀಯತೆ ಇಲ್ಲದ ಜ್ಞಾನ, ತ್ಯಾಗವಿಲ್ಲದ ಧರ್ಮ, ತತ್ವ ರಹಿತ ರಾಜಕಾರಣ ಇರಬಾರದು ಎಂದು ಅವರು ಹೇಳಿದ್ದರು. ಬಾಪೂಜಿ ಅವರ ಈ ವಿಚಾರಗಳು ನನ್ನ ಮನಸ್ಸಿನ ಮೇಲೆ ಗಾಢ ಪ್ರಭಾವ ಬೀರಿದ್ದು, ಸರಳ ಜೀವನ ಶೈಲಿಯನ್ನು ರೂಢಿಸಿಕೊಂಡಿದ್ದೇನೆ.

- ಅಖಿಲಾ ವಿದ್ಯಾಸಂದ್ರ, ಮಾನವ ಹಕ್ಕುಗಳ ಹೋರಾಟಗಾರ್ತಿ

ಎಂದಿಗೂ ಪ್ರಸ್ತುತ ಗಾಂಧೀಜಿ... 

ಹಾಲಿವುಡ್ ನ ಎ-ಟೀಮ್ ಎಂಬ ಚಲನಚಿತ್ರದಲ್ಲಿ ಗಾಂಧೀಜಿಯವರ ಅಹಿಂಸೆಯ ತತ್ವ ಸಂದೇಶಗಳನ್ನು ಎರಡು ದಿಕ್ಕುಗಳಲ್ಲಿ ಅರ್ಥೈಸಿ ಮುನ್ನಡೆಯುವ ತಂಡದ ನೆನಪು ಸದಾ ಕಾಡುತ್ತದೆ. ಹಾಗೆಯೇ ಸ್ವಚ್ಛ ಭಾರತದ ಅಭಿಯಾನದ ಭಾಗವಾಗಿರುವ ನಾವು ಗಾಂಧೀಜಿಯವರ ನುಡಿದಂತೆ ನಡೆಯುವ, ಕಾಯಕ ಯೋಗಿಯಾಗುವ ಗುಣಗಳನ್ನು  ಅಳವಡಿಸಿಕೊಳ್ಳಬೇಕು. ಈ ನಿಟ್ಟಿನಲ್ಲಿ ನಾನೂ ಹೆಜ್ಜೆ ಇಟ್ಟಿದ್ದೇನೆ. ಮನುಕುಲಕ್ಕೆ ಗಾಂಧೀಜಿ ಮತ್ತವರ ಜೀವನ ಮೌಲ್ಯಗಳು ಸದಾ ಪ್ರಸ್ತುತ ಎಂಬುದಂತೂ ದಿಟ.

- ಪ್ರಶಾಂತ್ ಶ್ರೀನಿವಾಸ್, ಬೋಧಕ

ಗ್ರಾಮೀಣ ಜನರ ಬದುಕಿನ ಪರಿಚಯ

‘ಕೋಶ ಓದಬೇಕು, ದೇಶ ಸುತ್ತಬೇಕು’ ಎಂದು ಹಿರಿಯರು ಹೇಳುತ್ತಾರೆ. ಟೆಕಿಯಾದ ನಾನು ಮೊದಲು ಬಾವಿಯ ಕಪ್ಪೆಯಂತಿದ್ದೆ. ಬೆಂಗಳೂರಿನ ಶಾಸನಗಳ ಹುಡುಕಾಟಕ್ಕಿಳಿದಾಗ ನಗರದ ಸುತ್ತಮುತ್ತಲಿನ ಗ್ರಾಮೀಣ ಜನರ ಬದುಕಿನ ಪರಿಚಯವೂ ಆಯಿತು. ಮಹಾತ್ಮ ಗಾಂಧೀಜಿ ಅವರು ದೇಶದ ಸ್ವಾತಂತ್ರ್ಯ ಚಳವಳಿ ಪ್ರವೇಶಕ್ಕೂ ಮುನ್ನ ಒಮ್ಮೆ ದೇಶವನ್ನು ಸಂಚರಿಸಿ ಜನರ ಕಷ್ಟ, ಸುಖ, ವಸ್ತು ಸ್ಥಿತಿಯನ್ನು ಅರಿತಿದ್ದರು. ಇದೇ ಅನುಭವ ನನಗೂ ಆಗುತ್ತಿದೆ. ಶುಚಿತ್ವದ ಕೆಲಸ ಸೇರಿದಂತೆ ಯಾವುದೇ ಕೆಲಸವನ್ನೂ ಕೀಳರಿಮೆ ಇಲ್ಲದೆ ಮಾಡುತ್ತಿದ್ದ ಗಾಂಧಿ ಅವರ ಗುಣಗಳೂ ಅನುಕರಣೀಯ.

-‌ಪಿ.ಎಲ್‌. ಉದಯಕುಮಾರ್‌, ಸಾಫ್ಟ್‌ವೇರ್‌ ಎಂಜಿನಿಯರ್‌

'ಸರಳ ಸಂತ'

ಗಾಂಧಿ ನನಗೆ ಯಾವಾಗಲೂ 'ಸರಳ ಸಂತ' ನಂತೆಯೇ ಕಾಣುತ್ತಾರೆ. ಗಾಂಧಿ ತೊಟ್ಟ ಅರೆಬರೆ ಬಟ್ಟೆ ನಮ್ಮ ಭಾರತದ ಬಡತನದ ಪ್ರತಿಫಲನವೋ? ಅಥವಾ ಸರಳತೆಯ ಪ್ರತಿಕವೋ? ಗೊತ್ತಿಲ್ಲ. ಆಡಂಬರವನ್ನು ತೆಗೆದಿಟ್ಟು ಬಯಲಂತೆ ಬದುಕುವುದು ಮುಖ್ಯ ಎಂದು ತಿಳಿಸಿದ್ದು ಗಾಂಧಿ. ಹಾಗಾಗಿ ನಾನಂತೂ ಗಾಂಧಿಯ ಸರಳತೆಯನ್ನೇ ಅನುಸರಿಸುವ 'ಗಾಂಧಿ ವಾದಿ'.

- ಚಾಂದ್ ಪಾಷ. ಎನ್.ಎಸ್‌, ಗಾಂಧಿ ಅಧ್ಯಯನ ವಿಭಾಗದ ಹಳೆ ವಿದ್ಯಾರ್ಥಿ, ಬೆಂಗಳೂರು ವಿಶ್ವವಿದ್ಯಾಲಯ

ಮನಸ್ಸು ಬದಲಿಸುವ ಅಸ್ತ್ರವೇ ‘ಅಹಿಂಸೆ’ 

ಗಾಂಧೀಜಿ ಅವರು ಸ್ವಾತಂತ್ರ್ಯ ಹೋರಾಟದ ಅಖಾಡಕ್ಕೆ ಇಳಿಯುವ ಹೊತ್ತಿಗಾಗಲೇ ಬ್ರಿಟನ್‌ ವಿಜ್ಞಾನ, ತಂತ್ರಜ್ಞಾನದಲ್ಲಿ ಸಾಕಷ್ಟು ಮುಂದುವರಿದಿತ್ತು. ಯುದ್ಧ ಭೂಮಿಯಲ್ಲಿ ಮುಖಾಮುಖಿಯಾಗಿ ಅವರನ್ನು ಎದುರಿಸಿ ಸ್ವಾತಂತ್ರ್ಯ ಪಡೆಯುವುದು ಭಾರತೀಯರಿಗೆ ಸುಲಭದ ಮಾತಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಯೋಚಿಸಿದಾಗ, ಗಾಂಧೀಜಿ ಅವರ ‘ಅಹಿಂಸಾ ಚಳವಳಿ’ ಸಂದರ್ಭೋಚಿತವೂ, ಸೂಕ್ತವೂ ಆಗಿತ್ತು. ರಕ್ತಪಾತವಿಲ್ಲದೆ ಯುದ್ಧ ಗೆಲ್ಲುವ ಹಾಗೂ ಮನುಷ್ಯನ ಮನಸ್ಸನ್ನು ಬದಲಿಸಬಲ್ಲ ಶಕ್ತಿಯಿರುವ ಈ ಅಸ್ತ್ರ ನನ್ನನ್ನು ಹೆಚ್ಚು ಪ್ರಭಾವಿಸಿದೆ. ವಿದ್ಯಾರ್ಥಿಗಳಿಗೂ ಈ ವಿಚಾರಗಳನ್ನು ಮನನ ಮಾಡುವುದರಲ್ಲಿ ತಲ್ಲೀನನಾಗಿದ್ದೇನೆ.

ವೈ.ಸಿ.ಕಮಲಾ, ವಿಜ್ಞಾನ ಪ್ರಾಧ್ಯಾಪಕಿ

ಪ್ರಾಣಿ ಹಿಂಸೆಯಿಂದ ದೂರ 

ಗಾಂಧೀಜಿ ಅವರು ತಮ್ಮ ಆತ್ಮಕತೆಯಲ್ಲಿ ಬೇರೆಯವರ ತಪ್ಪನ್ನು ಚಿಕ್ಕದು ಅಂತ ಹೇಳಿ ತಮ್ಮ ತಪ್ಪನ್ನು ದೊಡ್ಡದು ಎಂಬಂತೆ ಬರೆದಿದ್ದಾರೆ. ಆದರೆ, ನಾವು ಬೇರೆಯವರ ಚಿಕ್ಕ ತಪ್ಪನ್ನೂ ದೊಡ್ಡದು ಎಂಬಂತೆ ಎತ್ತಿ ತೋರಿಸುತ್ತೇವೆ. ಗಾಂಧೀಜಿ ಅವರಿಂದ ಪ್ರಭಾವಿತಳಾಗಿ ನಾನು ಬೇರೆಯವರ ಚಿಕ್ಕ ತಪ್ಪನ್ನು ದೊಡ್ಡದಾಗಿ ನೋಡೋದಿಲ್ಲ. ಇದು ಗಾಂಧಿ ಅವರಿಂದ ಕಲಿತ ಪಾಠ. ನಮ್ಮಲ್ಲಿ ಬಹುತೇಕರಿಗೆ ಡೈರಿ ಬರೆಯುವ ಅಭ್ಯಾಸವಿಲ್ಲ. ಆದರೆ, ನಾನು ನನ್ನ ಆತ್ಮವಿಮರ್ಶೆ ಮಾಡಿಕೊಳ್ಳುವ ಸಲುವಾಗಿ ತಪ್ಪದೇ ಡೈರಿ ಬರೆಯುತ್ತೇನೆ. ಇದರಿಂದಾಗಿ ನನ್ನ ವ್ಯಕ್ತಿತ್ವ ಮತ್ತು ಕೆಲಸಗಳ ಆತ್ಮವಿಮರ್ಶೆ ಮಾಡಿಕೊಳ್ಳಲು ಸಾಧ್ಯವಾಗುತ್ತಿದೆ.

ನಮ್ಮಲ್ಲಿ ಹೋರಾಟಗಾರರು, ಪ್ರಗತಿಪರರು ಬರೀ ಮನುಷ್ಯ ಪರ ಮಾತ್ರ ಹೋರಾಟ ಮಾಡುತ್ತಾರೆ. ಆದರೆ, ಗಾಂಧೀಜಿ ಬಹುಹಿಂದೆಯೇ ಪ್ರಾಣಿಗಳ ಪರವಾಗಿಯೂ ಹೋರಾಟ ಮಾಡಿದ್ದರು. ಅವರು ಪ್ರಾಣಿಹಿಂಸಾ ವಿರೋಧಿಯಾಗಿದ್ದರು. ನಾನು ಈ ನಿಟ್ಟಿನಲ್ಲಿ ಗಾಂಧಿ ತತ್ವ ಅನುಸರಿಸುತ್ತಿದ್ದು, ಪ್ರಾಣಿಗಳ ಹಕ್ಕುಗಳ ಹೋರಾಟದಲ್ಲಿ ತೊಡಗಿಸಿಕೊಂಡಿದ್ದೇನೆ.

–ಪ್ರತಿಮಾ ನಾಯಕ್, ರಾಜ್ಯ ಸಮಿತಿ ಸದಸ್ಯೆ, ಸ್ವರಾಜ್ ಅಭಿಯಾನ

ಸುಳ್ಳು ಹೇಳೋದಿಲ್ಲ

ಗಾಂಧೀಜಿ ಸತ್ಯ ನುಡಿಯುವುದನ್ನು ಹೇಳಿಕೊಟ್ಟ ಮಹಾನ್ ವ್ಯಕ್ತಿ. ಅವರ ಬದುಕಿನುದ್ದಕ್ಕೂ ಸತ್ಯ ಮತ್ತು ಅಹಿಂಸೆಯನ್ನು ಅವರು ಚಾಚೂತಪ್ಪದೇ ಪಾಲಿಸಿಕೊಂಡು ಬಂದಿದ್ದಾರೆ. ಇದರಿಂದ ಪ್ರಭಾವಿತಳಾಗಿ ನಾನೂ ಕೂಡ ಸತ್ಯ ಹೇಳುವುದನ್ನು ಪ್ರಜ್ಞಾಪೂರ್ವಕವಾಗಿ ರೂಢಿಸಿಕೊಂಡಿದ್ದೇನೆ. ಪರಿಸ್ಥಿತಿ, ಸಂದರ್ಭಗಳು, ಒತ್ತಡಗಳು ಎಷ್ಟೇ ಇರಲಿ ಎಂದಿಗೂ ನಾನು ಸುಳ್ಳು ಹೇಳೋದಿಲ್ಲ.

ನಾಳೆಯೇ ಸತ್ತು ಹೋಗ್ತೀನಿ ಅಂತ ಭಾವಿಸಿದ ಇಂದಿನ ದಿನವನ್ನು ಚೆನ್ನಾಗಿ ಬದುಕಿ ಎಂಬುದು ಗಾಂಧೀಜಿ ಹೇಳಿದ ಮಾತು. ಈ ನಿಟ್ಟಿನಲ್ಲಿ ಅವರ ಮಾತಿನಂತೆ ಬದುಕನ್ನು ಬದುಕುತ್ತಿದ್ದೇನೆ. ಸಣ್ಣ ಸಣ್ಣ ವಿಷಯಗಳಲ್ಲೂ ಗಾಂಧೀಜಿ ಅವರಿಂದ ಕಲಿಯುವುದು ಬಹಳಷ್ಟಿದೆ.

–ಶ್ರುತಿ ಪ್ರಶಾಂತ್, ಗಾಯಕಿ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !