ನಾಗರ ಪಂಚಮಿ ವಿಶೇಷ ತಿನಿಸು

7

ನಾಗರ ಪಂಚಮಿ ವಿಶೇಷ ತಿನಿಸು

Published:
Updated:
Deccan Herald

ನಾಗರ ಪಂಚಮಿ ಎಂದರೆ ಅದು ಬರೀ ಹಬ್ಬವಲ್ಲ . ಊಟ ಉಪಹಾರದ ಅಬ್ಬರ. ಅದರಲ್ಲೂ ಉತ್ತರ ಕರ್ನಾಟಕದ ಜಿಲ್ಲೆಗಳಲ್ಲಿ  ಶ್ರಾವಣದ  ಈ ಮೊದಲ ಹಬ್ಬವನ್ನು ಬರಮಾಡಿಕೊಳ್ಳುವ ಬಗೆಯೇ ವಿಶಿಷ್ಟ. ಬಗೆಬಗೆಯ ಉಂಡಿ ಮಾಡಿ, ಹಂಚಿ ತಿಂದು ಖುಷಿ ಪಡುವ ಹಬ್ಬವಿದು.

ಹುಟ್ಟಿದೂರು, ಉಂಡಾಡಿದ ಕೇರಿಯನ್ನು ಬಿಟ್ಟು ಬೆಂಗಳೂರಲ್ಲೇ ಬದುಕು ಕಟ್ಟಿಕೊಂಡಿರುವ ಉತ್ತರ ಕರ್ನಾಟಕದ ಮಂದಿ ಉಂಡಿ ಹಬ್ಬ ಪಂಚಮಿಯನ್ನು ಹೇಗೆಲ್ಲ ಆಚರಿಸುತ್ತಾರೆ ಗೊತ್ತೆ? ಮಾಡಿ ಉಣ್ಣಲಾಗದ ಉಂಡಿಗಳನ್ನೆಲ್ಲ ಅಂಗಡಿಯಿಂದ ಖರೀದಿಸಿಯಾದರೂ ತಿನ್ನುತ್ತಾರೆ. ಇಂಥವರಿಗಾಗಿಯೇ ತಿಮ್ಮಣ್ಣ ಹೊಸೂರ ಬೆಂಗಳೂರಿನಲ್ಲಿ ಉತ್ತರ ಕರ್ನಾಟಕದ ಫುಡ್ ಸ್ಟೋರ್’ ಅನ್ನು ಸ್ಥಾಪಿಸಿದ್ದಾರೆ.

 ಉತ್ತರ ಕರ್ನಾಟಕದ ವಿವಿಧ ತಿನಿಸುಗಳು ಈ ಸ್ಟೋರ್ ನಲ್ಲಿ ಸಿಗುತ್ತವೆ. ತಿಮ್ಮಣ್ಣ ಅವರು ಸುಮಾರು 20 ವರ್ಷಗಳಿಂದ  ನಗರದಲ್ಲಿ ವಾಸವಾಗಿದ್ದು ಉತ್ತರ ಕರ್ನಾಟಕದ ಸ್ಪೇಷಲ್ ತಿನಿಸುಗಳನ್ನು ಇಲ್ಲಿ ಮಾಡುತ್ತಿದ್ದಾರೆ.

ಶ್ರಾವಣ ಮಾಸದಲ್ಲಿ ಶುಕ್ಲಪಕ್ಷದ ಪಂಚಮಿಯಂದು ಆಚರಿಸಲಾಗುವ ಈ ಹಬ್ಬದಲ್ಲಿ ಉಂಡಿಯೇ ರಾಜ. ಈ ಹಬ್ಬದಲ್ಲಿ ಊಟಕ್ಕಿಂತ ಹೆಚ್ಚು ಫಳಾರಕ್ಕೆ (ಫಲಾಹಾರದ ಅಪಭ್ರಂಶ. ಆದರೆ ಇಲ್ಲಿ ಫಲಗಳಿರುವುದಿಲ್ಲ. ಉಂಡಿ ಅವಲಕ್ಕಿಗಳದ್ದೇ ಪಾರುಪತ್ಯ) ಹೆಚ್ಚಿನ ಮಹತ್ವ. ಶ್ರಾವಣ ಮಾಸದಲ್ಲಿ ಬಹುತೇಕ ಜನರು ಉಪವಾಸ ಅಥವಾ ಒಪ್ಪತ್ತು ಆಚರಿಸುತ್ತಾರೆ. ಒಂದ್ಹೊತ್ತು ಮಾತ್ರ ಊಟ ಮಾಡಿದರೆ ಇನ್ನೊಂದು ಹೊತ್ತಿಗೆ ಈ ಫಳಾರವೇ ಗತಿ. ಹಾಗಾಗಿ ಉಂಡಿ, ಚಕ್ಕುಲಿ, ಕೋಡುಬಳೆ, ಚುರುಮುರಿ ಚೂಡಾ, ಅವಲಕ್ಕಿ ತಿನ್ನಲಾದರೂ ಉಪವಾಸವಿರುವವರ ಸಂಖ್ಯೆಯೂ ಹೆಚ್ಚಾಗಿರುತ್ತದೆ.

ವಿವಿಧ ಧಾನ್ಯ , ಬೆಲ್ಲ, ತುಪ್ಪ ಬಳಸಿ ಮಾಡುವ ಉಂಡಿಗಳು ದೇಹಕ್ಕೂ ಹಿತ, ಬಾಯಿಗೂ ರುಚಿ. ತಂಬಿಟ್ಟು, ಅಳ್ಳಿನ ಉಂಡಿ, ಅರಳುಂಡಿ, ಎಳ್ಳುಂಡಿ, ಶೇಂಗಾದ ಉಂಡಿ, ನವಣೆ ಉಂಡಿ, ಬೇಸನ್ ಉಂಡಿ, ಬೂಂದಿ ಉಂಡಿ, ಅಂಟಿನ ಉಂಡಿ, ಹುರಿಗಡ್ಲಿ ಉಂಡಿ, ಅವಲಕ್ಕಿ ಉಂಡಿ, ರವೆ ಉಂಡಿ, ದಾಣಿ ಉಂಡಿ ಹೀಗೆ ವಿಧ ವಿಧವಾದ ಉಂಡಿಗಳ   ಜೊತೆಗೆ ಬಾಯಿಗೆ ಖಾರವಾದದ್ದೂ ಬೇಕಲ್ಲಾ ಹಾಗಾಗಿ ಪಾಲಕ್‌ ಚಕ್ಕುಲಿ, ರಾಗಿ ಚಕ್ಕುಲಿ, ಮತ್ತು ನಿಪ್ಪಟ್ಟು, ಅವಲಕ್ಕಿ ಚೂಡಾ, ಮಂಡಕ್ಕಿ ಚೂಡಾ, ಮುರ್ ಮುರಿ ಚೂಡಾ, ಶಂಕರ್ ಪೋಳೆ ತಯಾರಿಸುತ್ತಾರೆ  ತಿಮ್ಮಣ್ಣ. 

‘ಈಗಾಗಲೇ ಆರ್ಡರ್‌ಗಳೂ ಬರುತ್ತಿದ್ದು, ಗಾಂಧಿ ಬಜಾರ್‌ನಲ್ಲಿ ಮತ್ತು ರಾಜಾಜಿನಗರದ ಬಾಷ್ಯಂ ವೃತ್ತದಲ್ಲಿರುವ ಶಾಖೆಗಳಲ್ಲಿ ಈ ಪಂಚಮಿ ಹಬ್ಬದ ವಿಶೇಷ ತಿನಿಸುಗಳನ್ನ ನಾವು ತಯಾರಿಸುತ್ತೇವೆ. ಪ್ರತಿ ಸಲವೂ ಇಷ್ಟು ತಿನಿಸುಗಳನ್ನ ತಯಾರಿಸುತ್ತೇವೆ. ಇದಕ್ಕೆ ಬೇಕಾದ ಸಾಮಾನುಗಳನ್ನು ಉತ್ತರ ಕರ್ನಾಟಕದಿಂದಲೇ ತರುತ್ತೇವೆ. ಮತ್ತು ಇವುಗಳನ್ನು ತಯಾರಿಸಲು ಅಲ್ಲಿನ ಜನರನ್ನೇ ಇಲ್ಲಿಗೆ ಕರೆಸಿ ತಿನಿಸುಗಳನ್ನ ಮಾಡಿಸುತ್ತೇವೆ’ ಎನ್ನುತ್ತಾರೆ ಅವರು.

ಸಂಪರ್ಕ: 9448261201  

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !