ಬುಧವಾರ, ಜುಲೈ 28, 2021
21 °C

ಪುಸ್ತಕ ವಿಮರ್ಶೆ: ಭಿನ್ನವಾದ ಕಾವ್ಯ ಅಭಿವ್ಯಕ್ತಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಟಿ.ಕೆ. ಗಂಗಾಧರ ಪತ್ತಾರ ಅವರ ವ್ಯಕ್ತಿ ಚಿತ್ರಣ ಕವನಗಳ ಸಂಕಲನ ‘ಅಭಿವ್ಯಕ್ತಿ’.  ಪದ್ಯದ ಮೂಲಕ ವ್ಯಕ್ತಿಚಿತ್ರಣವನ್ನು ಕಟ್ಟಿಕೊಡುವ ಪರಿಪಾಟವಿದ್ದರೂ ಇಡೀ ಕವನ ಸಂಕಲನವೇ ವ್ಯಕ್ತಿಚಿತ್ರ ಕವನಗಳಿಂದ ಕೂಡಿದ ನಿದರ್ಶನವಿಲ್ಲ. ಈ ದೃಷ್ಟಿಯಿಂದ ಇದೊಂದು ಹೊಸ ಪ್ರಯೋಗ. ವ್ಯಕ್ತಿಗಳ ಬದುಕಿಗೆ ಸಂಬಂಧಿಸಿದ ಹಲವು ವಿವರಗಳು ಇಲ್ಲಿನ ಕವನಗಳಲ್ಲಿ ಸಿಗುತ್ತವೆ.

ವ್ಯಕ್ತಿಚಿತ್ರ ಕವನಗಳು ಇವಾದರೂ ಕೆಲವು ಸಾಧಕ ವ್ಯಕ್ತಿತ್ವಗಳನ್ನು ಹೊಸ ದೃಷ್ಟಿಕೋನದಿಂದ ನೋಡಿರುವುದರಿಂದ ಸಾಮಾಜಿಕ ಆಯಾಮಗಳೂ ಇಲ್ಲಿನ ಕವನಗಳ ಸಾಲುಗಳಲ್ಲಿ ಹರಡಿಕೊಂಡಿವೆ. ಇದಕ್ಕೆ ಉದಾಹರಣೆಯಾಗಿ ಸಂಕಲನದ ಮೊದಲ ಕವನವನ್ನೇ ನೋಡಬಹುದು. ವಿವೇಕಾನಂದರು ದೀನ ದಲಿತರ ಬಗ್ಗೆ ಹೊಂದಿದ್ದ ಕಾಳಜಿಯನ್ನು ಈ ಕವನ ಎತ್ತಿ ತೋರುತ್ತದೆ. ‘ರಾಷ್ಟ್ರವನು ಮುಸುಕಿದ್ದ ಮಾಯೆ–ಮಿಥ್ಯಾ ನಿಶೆಯ ಸತ್ಯ ಕಿರಣಗಳಿಂದ ಭುಂಜಿಸಿದ ಸೂರ್ಯ’ನಾಗಿಯೂ ವಿವೇಕಾನಂದರು ಗೋಚರಿಸಿದ್ದಾರೆ.

ಗಾಂಧಿ, ಅಂಬೇಡ್ಕರ್‌, ಬೇಂದ್ರೆ, ಕುವೆಂಪು, ಗೋವಿಂದ ಪೈ… ಹೀಗೆ ಇಲ್ಲಿ ಮೇಳೈಸಿರುವ ಸಾಧಕರ ಪಟ್ಟಿ ದೊಡ್ಡದಿದೆ. ಹಾಗೆಯೇ ಪತ್ತಾರರು ಯಾರ ಕುರಿತು ಬೇಕಾದರೂ ಪದ್ಯ ಬರೆಯಬಲ್ಲರು ಎನ್ನುವುದಕ್ಕೂ ಉದಾಹರಣೆಗಳು ಇಲ್ಲಿವೆ. ಇವರೆಲ್ಲ ಹೇಗೆ ಈ ಕಾವ್ಯ ಮಾಲೆಯಲ್ಲಿ ಒಂದಾದರು ಎಂಬ ಪ್ರಶ್ನೆ ಕಾಡುತ್ತದೆ. ವ್ಯಕ್ತಿಯ ಆಯ್ಕೆಯ ಮಾನದಂಡ ಕೂಡ ಮುಖ್ಯ ಎಂದು ಬರಗೂರು ರಾಮಚಂದ್ರಪ್ಪ ಅವರು ಮುನ್ನುಡಿಯಲ್ಲಿ ಹೇಳಿರುವುದು ಸರಿಯಾಗಿಯೇ ಇದೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು