ಕಲ್ಯಾಣ ಕರ್ನಾಟಕದ ಭೂಮಿಯಲ್ಲಿ ಲಾಗಾಯ್ತಿನಿಂದಲೂ ಗಜಲ್‌ ‘ಫಸಲಿ’ಗೆ ಮುಂದು. ಶಾಂತರಸರ ಕಾಲದಿಂದಲೂ ಆ ಕಾವ್ಯ ಪ್ರಕಾರ ಪರಂಪರೆಯಾಗಿ ಬೆಳೆದು ಬಂದಿದೆ. ಆ ಭಾಗದ ಹೊಸ ತಲೆಮಾರಿನ ಹಲವು ಕವಿಗಳ ಪಡೆಯೊಂದು ಈಗ ಗಜಲ್‌ ಕೃಷಿಯಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡಿದೆ. ಅದಕ್ಕೆ ಸೇರ್ಪಡೆಯಾದ ಮತ್ತೊಂದು ಹೆಸರು ಸಿದ್ಧರಾಮ ಹೊನ್ಕಲ್‌ ಅವರದು. ಸಮಾಜಶಾಸ್ತ್ರದ ಬೋಧಕರಾಗಿರುವ ಹೊನ್ಕಲ್‌ ಅವರು ಈಗಾಗಲೇ ಕಥೆಗಾರರಾಗಿಯೂ ಹೆಜ್ಜೆ ಗುರುತು ಮೂಡಿಸಿದ್ದಾರೆ. ಅವರ ಗಜಲ್‌ಗಳ ಸಂಗ್ರಹವೇ ‘ಆಕಾಶಕ್ಕೆ ಹಲವು ಬಣ್ಣಗಳು’. ಹೌದು, ಇಲ್ಲಿನ ಗಜಲ್‌ಗಳಿಗೆ ಹಲವು ಬಣ್ಣಗಳಿವೆ; ಪ್ರೀತಿ, ಪ್ರೇಮ, ನೋವು, ನಲಿವು... ಹೀಗೆ. ಸಮಾಜದ ಸಂಕಟಗಳಿಗಾಗಿ ಮಿಡಿಯುವ ಮನಸ್ಸೂ ಇಲ್ಲಿನ ಗಜಲ್‌ಗಳ ಸಾಲಿಗಿದೆ. ಗಜಲ್‌ನ ಪುಟ್ಟ ಇತಿಹಾಸವನ್ನೂ ಕೊಟ್ಟಿರುವುದು ಈ ಕೃತಿಯ ಹೆಚ್ಚುಗಾರಿಕೆ. ಗಜಲ್‌ ಜಗತ್ತಿಗೆ ಪ್ರವೇಶಿಕೆಯಾಗಿ ಆರಂಭದಲ್ಲಿ ಕೆಲವು ಲೇಖನಗಳೂ ಇವೆ.
