ಕನ್ನಡ ಕಥಾಲೋಕಕ್ಕೆ ‘ಸೀತಾಳೆ ದಂಡೆ’ಯ ಕಥೆಗಳನ್ನು ಪೋಣಿಸಿಕೊಟ್ಟ ಪತ್ರಕರ್ತೆ ಭಾರತಿ ಹೆಗಡೆ ಅವರು ದಾಖಲಿಸಿರುವ ಕೃಷಿ ಮಹಿಳೆಯರ ಅನುಭವ ಕಥನ ‘ಮಣ್ಣಿನ ಗೆಳತಿ’. ನಾಡಿನ ವಿವಿಧ ಭಾಗಗಳ 38 ‘ಮಣ್ಣಿನ ಗೆಳತಿಯರು’ ಇಲ್ಲಿ ಒಂದೆಡೆ ಸೇರಿದ್ದಾರೆ. ತಮ್ಮ ಹೊಲವನ್ನು ಕೃಷಿ ವಿಜ್ಞಾನದ ಪ್ರಯೋಗಾಲಯವನ್ನಾಗಿ ಪರಿವರ್ತಿಸಿದ ಒಬ್ಬೊಬ್ಬ ಸಾಧಕಿಯ ಯಶೋಗಾಥೆಯೂ ಬೆರಗು ಮೂಡಿಸುತ್ತದೆ. ಮಣ್ಣಲ್ಲಿ ನಾವೂ ಕೈಯಾಡಿಸಲು ಹೋಗುವಂತೆ ಪ್ರೇರೇಪಿಸುತ್ತದೆ. ಸಂದರ್ಶನ ರೂಪದ ಇಲ್ಲಿನ ಲೇಖನಗಳ ನಾಯಕಿಯರೆಲ್ಲ ಸಹಜ, ಸುಸ್ಥಿರ, ಸಾವಯವ ಕೃಷಿಯಲ್ಲಿ ಆಸಕ್ತರು. ಕೃಷಿಯ ಹಲವು ಸಮಸ್ಯೆಗಳಿಗೆ ವಿಶ್ವವಿದ್ಯಾಲಯಗಳ ತಜ್ಞರಿಗೂ ಹೊಳೆಯದ ಹಲವು ಆಸಕ್ತಿಕರ ಉಪಾಯಗಳು ಇಲ್ಲಿ ಮೇಳೈಸಿವೆ.
