ಸ್ತ್ರೀವಾದ-ಅಂಚಿನಿಂದ ಕೇಂದ್ರದೆಡೆಗೆ | ತಾತ್ವಿಕ ಚಿಂತನೆಗೆ ಉತ್ತಮ ಆಕರ ಗ್ರಂಥ

ಅಮೆರಿಕದ ಬರಹಗಾರ್ತಿ ಸ್ತ್ರೀವಾದಿ ಕಾರ್ಯಕರ್ತೆ ‘ಬೆಲ್‌ ಹುಕ್ಸ್‌’ ಅವರ ‘ಸ್ತ್ರೀವಾದ–ಅಂಚಿನಿಂದ ಕೇಂದ್ರದೆಡೆಗೆ’(Feminist Theory from Margin to Centre) ಎಂಬ ಕೃತಿಯನ್ನೂ ಶ್ರೀಮತಿಯವರು ಕನ್ನಡಕ್ಕೆ ತಂದಿದ್ದಾರೆ.

ಅಮೆರಿಕದ ಕಪ್ಪು ಜನಾಂಗದವರಾದ ಗ್ಲೋರಿಯಾ ಜೀನ್ ವಾಟ್ಕಿನ್ಸ್‌ ತಮ್ಮ ಕಾವ್ಯನಾಮವಾಗಿ, ತಮ್ಮ ಅಜ್ಜಿಯ ಹೆಸರನ್ನು ಬಳಸಿದರು. ಅಮೆರಿಕದ ಬಿಳಿ ಜನಾಂಗದ ಸ್ತ್ರೀವಾದಕ್ಕಿಂತ ಕಪ್ಪು ಜನಾಂಗದ ಸ್ತ್ರೀವಾದ ಯಾಕೆ ಮತ್ತು ಹೇಗೆ ಭಿನ್ನ ಎಂಬುದನ್ನು ಕಾರಣ, ಉದಾಹರಣೆಗಳ ಸಹಿತ ತಾತ್ವಿಕವಾಗಿ ಪ್ರತಿಪಾದಿಸಿದರು. ಕನ್ನಡದಲ್ಲೂ ದಲಿತ ಸ್ತ್ರೀವಾದಿ ಚಿಂತನೆ ಬಗ್ಗೆ ಅರವಿಂದ ಮಾಲಗತ್ತಿ ಮೊದಲಾದವರು ಈಗಾಗಲೇ ಬರೆದಿದ್ದಾರೆ. ಈ ದೃಷ್ಟಿಯಿಂದಲೂ ಬೆಲ್‌ ಹುಕ್ಸ್‌ ಅವರ ಈ ಕೃತಿ ಕನ್ನಡತಾತ್ವಿಕಚಿಂತನೆಗೆಉತ್ತಮಆಕರಗ್ರಂಥವೊಂದನ್ನು ಒದಗಿಸಿದೆ.

ಅಂಚು ಇಲ್ಲದೆ ಸಮಗ್ರವಾಗುವುದಿಲ್ಲ. ಹಾಗೆ ಸಮಗ್ರದ ಭಾಗವಾಗಿದ್ದರೂ ಚೌಕಟ್ಟಿಗೆ ತಾಗಿಕೊಂಡು ಹೊರಗೆ ನಿಲ್ಲಬೇಕಾದ ಸ್ಥಿತಿ ಅಂಚಿನಲ್ಲಿರುವವರದು ಎಂಬುದನ್ನು ಹಲವುತಾತ್ವಿಕ, ಸಾಮಾಜಿಕ ಹಾಗೂ ನೇರವಾಗಿ ಕಂಡು ಅನುಭವಿಸಿದ ಬದುಕಿನ ಉದಾಹರಣೆಗಳಿಂದ ನೀಡುವ ಮೂಲಕ ಬೆಲ್‌ ಹುಕ್ಸ್‌ ತಮ್ಮ ಸಿದ್ಧಾಂತವನ್ನು ಪ್ರತಿಪಾದಿಸುತ್ತಾರೆ. ಅಕಡೆಮಿಕ್‌ ಅಧ್ಯಯನ ರೀತಿಯಲ್ಲಿ ಹಲವು ಆಕರಗಳ ಉಲ್ಲೇಖ, ತಾರ್ಕಿಕ ವಿರೋಧಗಳ ಮೂಲಕ ಅವರು ತಮ್ಮ ವಿಚಾರಗಳನ್ನು ಮಂಡಿಸುತ್ತಾರೆ.

ಸ್ತ್ರೀವಾದವನ್ನು ಈ ಕೃತಿ ಕಪ್ಪು ಜನಾಂಗದ ದೃಷ್ಟಿಯಿಂದ ವ್ಯಾಖ್ಯಾನಿಸುತ್ತದೆ. 1984ರಲ್ಲಿ ಪ್ರಕಟವಾದ ಈ ಕೃತಿಯಲ್ಲಿ ಆತನಕದ ಸ್ತ್ರೀವಾದಿ ಸಿದ್ಧಾಂತಗಳಲ್ಲಿ ಇದ್ದ ಮಿತಿಗಳನ್ನು ಅರಿತು ಹೊಸದಿಕ್ಕುಗಳನ್ನು ಗುರುತಿಸುವ ಪ್ರಯತ್ನವಿದೆ. ಜನಾಂಗೀಯ ಹೋರಾಟಗಳ ಉಪಯುಕ್ತ ಮಾದರಿಗಳನ್ನು ಈ ಕೃತಿ ಕನ್ನಡಕ್ಕೂ ಪರಿಚಯಿಸುತ್ತದೆ. ಸ್ತ್ರೀವಾದದ ತಾತ್ವಿಕತೆಯಂತೆ, ಸ್ತ್ರೀ ಸಮಾನತೆಯ ಹೋರಾಟದ ಕಾರ್ಯಕ್ರಮಗಳಿಗೂ ಬೇಕಾದ ಹಲವು ಪ್ರಾಯೋಗಿಕ ಸೂಚನೆಗಳು ಹಾಗೂ ವಿಶ್ಲೇಷಣೆಗಳು ಈ ಕೃತಿಯ ಮಹತ್ವದ ಅಂಶಗಳಾಗಿವೆ.

ಲೈಂಗಿಕತಾವಾದಿ ದಮನಗಳಿಗೆ ಕಾರಣವಾಗುವ ಮೂರು ಮುಖ್ಯ ಸಂಗತಿಗಳೆಂದರೆ (1) ಸಾಂಸ್ಥಿಕ ಮತ್ತು ಸಾಮಾಜಿಕ ರಚನೆಗಳು, (2) ದಬ್ಬಾಳಿಕೆ, ಶೋಷಣೆ ಮತ್ತು ದಮನಗಳನ್ನು ನಡೆಸುವ ವ್ಯಕ್ತಿಗಳು (3) ಸ್ವತಃ ದಮನಗಳಿಗೆ ಒಳಗಾಗುವವರು. ಅಂತಹ ದಮನಗಳನ್ನು ಎದುರಿಸುವವರ ಮನೋಭಾವ ಮತ್ತು ಸ್ವಭಾವ ಮಹಿಳೆಯರ ರಾಜಕೀಯ ಒಗ್ಗಟ್ಟಿನ ಮಹತ್ವವನ್ನು ಚರ್ಚಿಸುತ್ತಾ, ಈ ಮೂರರಿಂದ ಬಿಡಿಸಿಕೊಳ್ಳಲು ಬೇಕಾದತಾತ್ವಿಕಸಿದ್ಧಾಂತದೊಡನೆ ಅದಕ್ಕೆ ಬೇಕಾದ ಹೋರಾಟ ಕಾರ್ಯಕ್ರಮಗಳ ಅಗತ್ಯಗಳನ್ನೂ ಚರ್ಚಿಸುತ್ತದೆ.

ಈ ಕೃತಿಯನ್ನು ಶ್ರೀಮತಿಯವರು ‘ಅನುವಾದ’ ಎಂದು ಹೆಸರಿಸದೆ ‘ಕನ್ನಡ ಓದು’ ಎಂದಿದ್ದಾರೆ. ಅನುವಾದದ ಸಾಂಪ್ರದಾಯಿಕ ವ್ಯಾಖ್ಯಾನಗಳಿಗೆ ಹೊಂದುವಂತಹ ಅನುವಾದ ಇದಲ್ಲ. ಕನ್ನಡ ಸ್ತ್ರೀವಾದದ ಅಗತ್ಯಗಳಿಗೆ ಹೊಂದುವಂತೆ ವಿಚಾರಗಳ ವಿವರಗಳೂ ಸಂಕ್ಷಿಪ್ತ ಸಂಗ್ರಹ ಗುಣವೂ ಇಲ್ಲಿದೆ. ಅನುವಾದದಲ್ಲಿ ತನಗೆ ತಾನೇ ಅನುವಾದಕ ಸ್ಪಷ್ಟಪಡಿಸಿಕೊಳ್ಳುವ ಕ್ರಮವೂ ಅಂತರ್ಗತವಾಗಿರುತ್ತದೆ. ಶ್ರೀಮತಿಯವರು ಅನುವಾದದ ಈ ಗುಣವನ್ನು ವಿಸ್ತರಿಸಿಕೊಂಡು ಕನ್ನಡದ ಅಗತ್ಯಕ್ಕೆ ತಕ್ಕಂತೆ ಮೂಲಕೃತಿಯನ್ನು ವಿವರಿಸಿದ್ದಾರೆ. ಮೂಲದ ಅನುಕರಣೆಗಿಂತಲೂ ಹೆಚ್ಚು ಕನ್ನಡ ಓದಿನಲ್ಲಿ ಸಿಗಬೇಕಾದ ವೈಚಾರಿಕ ಸ್ಪಷ್ಟನೆಗೆ ಅನುವಾದಕಿ ಒತ್ತುಕೊಟ್ಟಿದ್ದಾರೆ. ಆದ್ದರಿಂದ ಇದು ಓದಿ ಅರ್ಥೈಸಿಕೊಂಡ ರೀತಿಯ ವಿಶಿಷ್ಟ ಅನುವಾದ. ಹಾಗಾಗಿ ಇದು ಅಮೆರಿಕದ ಜನಾಂಗೀಯ ಸ್ತ್ರೀವಾದವನ್ನು ವಿವರಿಸುವ ಕನ್ನಡ ಕೃತಿಯೊಂದನ್ನು ಓದಿದ ಅನುಭವ ನೀಡುತ್ತದೆ.