ವಾಸಿಯಾಗದ ದೀರ್ಘಕಾಲಿಕ ಕಾಯಿಲೆಗಳನ್ನು ಮನೆಯಲ್ಲಿ ಇಟ್ಟುಕೊಳ್ಳಲೇಬೇಕಾದ ಅನಿವಾರ್ಯ ಅತಿಥಿಯಂತೆ ಸ್ವೀಕರಿಸಿ, ಉಪಚರಿಸಿ, ನೆಮ್ಮದಿಯನ್ನು ಕಾಪಾಡಿಕೊಳ್ಳಬೇಕು ಎನ್ನುವುದು ಲೇಖಕರ ಹಿತನುಡಿ. ಕೃತಿಯಲ್ಲಿ ಅವರು ನೀಡಿರುವ ಸಲಹೆಗಳು ಈ ಆಶಯಕ್ಕೆ ಪೂರಕವಾಗಿವೆ. ಸಕ್ಕರೆ ಕಾಯಿಲೆ ಎಂದರೇನು, ಗ್ಲುಕೋಸ್ ಏರಿಳಿತವಾಗುವುದು ಏಕೆ, ಈ ಕಾಯಿಲೆಗೆ ಕಾರಣಗಳು ಏನು, ಇರುವ ವಿಧಗಳು ಯಾವುವು, ಮೂತ್ರಜನಕಾಂಗ, ಕಣ್ಣು, ನರಮಂಡಲದ ಮೇಲೆ ಈ ಕಾಯಿಲೆ ಬೀರುವ ಪರಿಣಾಮಗಳೇನು – ಇವೇ ಮೊದಲಾದ ಪ್ರಶ್ನೆಗಳನ್ನು ಹಾಕಿಕೊಂಡು ಸುದೀರ್ಘವಾಗಿ ಚರ್ಚಿಸಲಾಗಿದೆ. ಔಷಧಿ–ಚಿಕಿತ್ಸೆಗಳ ಕುರಿತು ವಿವರವಾದ ಮಾಹಿತಿ ಒದಗಿಸಲಾಗಿದೆ. ಯೋಗ ಮತ್ತು ವ್ಯಾಯಾಮದ ಮಹತ್ವವನ್ನೂ ತಿಳಿಸಿಕೊಡಲಾಗಿದೆ. ಪ್ರತಿಯೊಂದು ಸಮಸ್ಯೆ, ಪರಿಹಾರದ ಕುರಿತು ಸಚಿತ್ರವಾಗಿ ವಿವರಿಸಲಾಗಿದೆ. ಸಕ್ಕರೆ ಕಾಯಿಲೆ ಕುರಿತು ಮನೆಯಲ್ಲಿ ಇರಬೇಕಾದ ಕೈಪಿಡಿಯಂತೆ ಈ ಕೃತಿ ಭಾಸವಾಗುತ್ತದೆ.