ಅಹೋರಾತ್ರಿ ಕಿ.ರಂ ಕಾವ್ಯದ ಗುಂಗು

7

ಅಹೋರಾತ್ರಿ ಕಿ.ರಂ ಕಾವ್ಯದ ಗುಂಗು

Published:
Updated:
Deccan Herald

ಯಾರೇ ಸಿಕ್ಕರೂ ಅವರೊಂದಿಗೆ ಕಾವ್ಯದ ವಿಚಾರವನ್ನೇ ಚರ್ಚೆ ಮಾಡುತ್ತಿದ್ದವರು ಹಿರಿಯ ವಿಮರ್ಶಕ ಕಿ.ರಂ.ನಾಗರಾಜ. ತಮ್ಮ ಶಿಷ್ಯ ಹಾಗೂ ಆಪ್ತವಲಯದಲ್ಲೂ ಅದೇ ಚಾಳಿಯನ್ನೂ ಬಿತ್ತಿ ಬೆಳೆಸಿದ್ದು ಅವರ ಖ್ಯಾತಿ.

ಕಿ.ರಂ. ಅವರ ಜನ್ಮದಿನಾಚರಣೆ ಸಲುವಾಗಿ ಈ ವರ್ಷವೂ ‘ಕಾಡುವ ಕಿರಂ’ ಮತ್ತೆ ಬಂದಿದ್ದು, ಅಹೋರಾತ್ರಿಯ ಕಾರ್ಯಕ್ರಮಗಳಿಗೆ ವೇದಿಕೆ ಸಜ್ಜಾಗಿದೆ. ವಾಡಿಕೆಯಂತೆ ಈ ವರ್ಷವೂ ಅಹೋರಾತ್ರಿ ಕಾವ್ಯಗೋಷ್ಠಿಯನ್ನೊಳಗೊಂಡ ‘ಕಾಡುವ ಕಿರಂ’ ಕಾರ್ಯಕ್ರಮವನ್ನು ‘ಜನಸಂಸ್ಕೃತಿ’, ‘ಅವಿರತ ಪುಸ್ತಕ’, ‘ಬೆಂಗಳೂರು ಆರ್ಟ್ ಫೌಂಡೇಷನ್’ ಆಯೋಜಿಸಿವೆ.

ಕಾವ್ಯದ ಕಡುಮೋಹಿಯಾಗಿದ್ದ ಕಿ.ರಂ. ಪ್ರತಿ ತಿಂಗಳು ಯುವ ಕವಿಗಳನ್ನು ಒಂದೆಡೆ ಸೇರಿಸಿ ಕವಿಗೋಷ್ಠಿಗಳನ್ನು ಮಾಡುತ್ತಿದ್ದರು. ಕಿ.ರಂ. ಅಗಲಿದ ನಂತರವೂ ಅವರ ಪರಂಪರೆಯನ್ನು ವರ್ಷಕ್ಕೊಮ್ಮೆ ಮುಂದುವರಿಸಿಕೊಂಡು ಬರುತ್ತಿದ್ದಾರೆ ಸಂಸ ಸುರೇಶ್, ಓ.ವೆಂಕಟೇಶ್ ಹಾಗೂ ಅವಿರತ ಹರೀಶ್.

‘ಕಾಡುವ ಕಿರಂ’ನ ವಿಶೇಷವೆಂದರೆ ಅಹೋರಾತ್ರಿ ಕಾವ್ಯವಾಚನ. ಮಂಗಳವಾರ ಸಂಜೆ 6ಕ್ಕೆ ಶುರುವಾಗುವ ಈ ಕಾರ್ಯಕ್ರಮ, ಬುಧವಾರ ಬೆಳಿಗ್ಗೆ 6ರ ವರೆಗೆ ನಡೆಯಲಿದೆ. ಈ ನಡುವೆ ‘ಇರುಳಲ್ಲಿ ಕವಿತೆಗಳ ಸಾಲುದೀಪ’, ‘ನಶೆ ಏರುವ ಹೊತ್ತಲ್ಲಿ ನಿಶಾಗಾನ’, ‘ಮಧ್ಯರಾತ್ರಿಯಲ್ಲೊಂದು ಪದ್ಯಪಾನ’, ‘ನಸುಕಾಗುವ ಮುನ್ನ ನವಿರಾದ ಕವಿತೆಗಳು’ ಹಾಗೂ ‘ಹೊಸ ಬೆಳಕಲಿ ಮುಂಜಾನೆ ರಾಗ’ ಕಾವ್ಯಗೋಷ್ಠಿಗಳು ನಡೆಯಲಿವೆ.

ಕಾವ್ಯಗೋಷ್ಠಿ ಪ್ರಾರಂಭಕ್ಕೂ ಮುನ್ನ, ಸ್ಪಂದನ ಸಾಗರ ರಂಗ ತಂಡದವರು ‘ಊರ್ಮಿಳಾ’ ಏಕವ್ಯಕ್ತಿ ನಾಟಕವನ್ನು ಪ್ರದರ್ಶಿಸಲಿದ್ದಾರೆ. ಈ ನಾಟಕದ ರಚನೆ–ಎಚ್.ಎಸ್.ವೆಂಕಟೇಶಮೂರ್ತಿ ಹಾಗೂ ನಿರ್ದೇಶನ–ಶ್ರೀಪಾದ್ ಭಟ್ ಅವರದ್ದು. ಆದಾದ ಬಳಿಕ, ರಂಗಮಂಟಪದ ಕಲಾವಿದರು ರಂಗ ಸಂಗೀತ ಕಾರ್ಯಕ್ರಮ ಪ್ರಸ್ತುತಪಡಿಸಲಿದ್ದಾರೆ.

ಕಿ.ರಂ. ಪ್ರಶಸ್ತಿ ಪುರಸ್ಕಾರ ಕಾರ್ಯಕ್ರಮವು ರಾತ್ರಿ 12ಕ್ಕೆ ನಡೆಯಲಿದ್ದು, ಹೇಮಾ ಪಟ್ಟಣಶೆಟ್ಟಿ, ಕೆ.ಷರೀಫಾ, ಶಶಿಧರ್ ಭಟ್, ಹಾಡ್ಲಹಳ್ಳಿ ನಾಗರಾಜು ಹಾಗೂ ಅಪ್ಪಗೆರೆ ತಿಮ್ಮರಾಜು ಅವರಿಗೆ ಈ ಪ್ರಶಸ್ತಿ ನೀಡಲಾಗುವುದು.

ಕಾವ್ಯಗೋಷ್ಠಿ ನಡುನಡುವೆ ಜನಪದ ಗೀತೆ ಹಾಗೂ ಭಾವಗೀತೆಗಳ ಗಾಯನ. ತತ್ವಪದ ಹಾಗೂ ಚರ್ಚೆಗಳು ನಡೆಯಲಿವೆ. ಗಾಯನದ ವೇಳೆ ಕಿ.ರಂ. ಸೇರಿದಂತೆ ಹಲವು ಗಣ್ಯರ ರೇಖಾಚಿತ್ರಗಳನ್ನು ಕಲಾವಿದರು ಬಿಡಿಸಲಿದ್ದಾರೆ.

‘ಜಗತ್ತನ್ನೇ ನಮಗೆ ಅರ್ಥ ಮಾಡಿಸುತ್ತಿದ್ದ ಅಪ್ಪ, ನಮಗೆ ಎಂದಿಗೂ ಅರ್ಥವಾಗಲೇ ಇಲ್ಲ. ಮಹಾಗುರುವಿನ ರೂಪದಲ್ಲಿದ್ದ ಅವರೊಬ್ಬ ಸದ್ದಿಲ್ಲದ ಸಾಧಕ. ಕುಟುಂಬಕ್ಕಿಂತ ಶಿಷ್ಯವರ್ಗಕ್ಕೆ ಹೆಚ್ಚು ಆಪ್ತರಾಗಿದ್ದ ಮನುಷ್ಯ. ಪ್ರತಿ ಪ್ರಶ್ನೆಗೆ ಸಾಹಿತ್ಯದಲ್ಲೇ ಉತ್ತರ ಹುಡುಕುತ್ತಿದ್ದ ಶೋಧಕ’ ಎಂದು ತನ್ನ ಅಪ್ಪ ಕಿ.ರಂ.ನಾಗರಾಜ ಅವರ ಬಗ್ಗೆ ಹಿಂದೊಮ್ಮೆ ಹೇಳಿಕೊಂಡಿದ್ದರು ಅವರ ಮಗಳು ಕೆ.ಎನ್. ಸಹನಾ. ಮಗಳು ಹೇಳಿದಂತೆಯೇ ಕಿ.ರಂ. ಇದ್ದರು ಕೂಡ ಎಂಬುದು ಆಯೋಜಕರ ಮಾತು.

‘ಯುವ ಕವಿಗಳನ್ನು ಹುಟ್ಟುಹಾಕಬೇಕು ಹಾಗೂ ಅವರಿಗೆ ವೇದಿಕೆ ಕಲ್ಪಿಸಿಕೊಡಬೇಕು ಎಂಬುದು ಕಿ.ರಂ. ಅವರ ಆಸೆಯಾಗಿತ್ತು. ‘ಕಾಡುವ ಕಿರಂ’ ಮೂಲಕ ಯುವ ಸಮುದಾಯಕ್ಕೆ ಅವಕಾಶ ಕಲ್ಪಿಸಿದ್ದೇವೆ. ಕವಿಗೋಷ್ಠಿಯಲ್ಲಿ ವಾಚನವಾಗುವ ಕವಿತೆಗಳನ್ನು ಪುಸ್ತಕ ರೂಪದಲ್ಲಿ ಹೊರತರಲಾಗುತ್ತದೆ’ ಎನ್ನುತ್ತಾರೆ ಸಂಸ ಸುರೇಶ್.

ಕಾರ್ಯಕ್ರಮ ಉದ್ಘಾಟನೆ: ಕಾಳೇಗೌಡ ನಾಗವಾರ. ಕಿರಂ ಹೊಸಕವಿತೆ ಪುಸ್ತಕ ಬಿಡುಗಡೆ–ಸಿದ್ದಲಿಂಗಯ್ಯ. ಪುಸ್ತಕ ಕುರಿತು–ದಿಲಾವರ್ ರಾಮದುರ್ಗ. ಅಧ್ಯಕ್ಷತೆ–ಎಂ.ಎಸ್.ಮೂರ್ತಿ. ಅತಿಥಿಗಳು–ಜೆ.ಲೋಕೇಶ್, ಕೆ.ಎನ್.ಸಹನಾ. ಸ್ಥಳ–ರವೀಂದ್ರ ಕಲಾಕ್ಷೇತ್ರ, ಜೆ.ಸಿ.ರಸ್ತೆ. ಸಂಜೆ 6

ಬರಹ ಇಷ್ಟವಾಯಿತೆ?

  • 4

    Happy
  • 0

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !