ಮಮತಾ ಬರೆದ ಕವನ: ಕಾರ್ಯಕಾರಣ ಸಂಬಂಧ

ಬಟ್ಟೆ ದಾರದ ಪರಿಣಾಮ
ದಾರ ಬಟ್ಟೆಯ ಅವಸ್ಥೆ
ಕಾರ್ಯದಲ್ಲಿನ ಗುಣ
ಕಾರಣದಲ್ಲಿನ ಕ್ರಿಯೆ

ಬಟ್ಟೆಯಾಗುವ ಮುನ್ನ
ದಾರ ಎಳೆಎಳೆಯ ಅವ್ಯಕ್ತ
ದಾರದ ಬಂಧನದ ಮಾದರಿ
ಬಟ್ಟೆಯ ಸಂರೂಪ ವ್ಯಕ್ತ

ಉಡಬಹುದು ಬಟ್ಟೆಯನ್ನು
ದಾರವನ್ನಲ್ಲ
ಹೆಣೆಯಬಹುದು ದಾರವನ್ನು
ಬಟ್ಟೆಯನ್ನಲ್ಲ

ಕಾರಣವಾಗುವ ದಾರದಲ್ಲಿ
ಬಟ್ಟೆಯಾಗುವ ಶಕ್ತಿ
ಕಾರ್ಯವಾಗುವ ಬಟ್ಟೆಯಲ್ಲಿ
ಕಾರಣವೆಂಬ ಅಗತ್ಯ

ದಾರಕ್ಕೂ ಬಟ್ಟೆಗೂ ಭೇದವಿಲ್ಲ
ಕಾರ್ಯಕಾರಣವೂ ಬೇರೆಯಲ್ಲ