ಶುಕ್ರವಾರ, ಅಕ್ಟೋಬರ್ 23, 2020
21 °C

ಕವಿತೆ: ಆಗಿ ಹೋಗುವುದು

ವಸುಂಧರಾ ಕದಲೂರು Updated:

ಅಕ್ಷರ ಗಾತ್ರ : | |

Prajavani

ಈ ಲೋಕಕ್ಕೆ ಬಂದು
ಹೋಗುವುದೆಂದರೆ...

ಒಲೆ ಉರಿ ತಾಗಿ ಕಾದ ಬಿಸಿ
ಮಡಕೆಯೊಳಗಿನ ಕುದಿ
ನೀರಿಗೆ ಬಿದ್ದ ಅಕ್ಕಿ ಕಾಳಂತೆ
ಬೆಂದು ಮೆತ್ತಗಾಗುವುದು
ಹಸಿದವರ ಹೊಟ್ಟೆಯ
ತುತ್ತಾಗುವುದು ಕೆಲವೊಮ್ಮೆ
ವ್ಯಂಜನವೆಂದು ಮೆಲುಕಾಡುವವರ
ಬಾಯಿಗೆ ಸಿಕ್ಕಿ ನುಜ್ಜಾಗುವುದು

ಈ ಲೋಕಕ್ಕೆ ಬಂದೂ
ಸುಮ್ಮಗುಳಿಯುವುದೆಂದರೆ..

ಗಂಧದ ಕೊರಡು ತೇದಂತೆ
ನವೆದು ಘಮಲು ಬಿಡುವುದು
ಕಾಡುಮಲ್ಲಿಗೆ ಉದುರಿ ಹೋದಂತೆ
ಒಣಗುವುದು ಕಡು ಕಂಪಿನ ಸಂಪಿಗೆ
ಯಾಗಿ ಸುಖ ಕೊಡುವುದು ಇಲ್ಲವೇ
ತಾಳೆ ಹೂವಾಗಿ ವಿಷದ ಹಾವಿನ
ಹೆಡೆಯ ಆಶ್ರಯದಲಿ ಉಳಿಯುವುದು

ಈ ಲೋಕಕ್ಕೆ ಬಂದೂ
ನಮ್ಮಂತೆ ಆಗಿ ಹೋಗುವುದೆಂದರೆ...

ಸದಾ ಪೂರ್ವನೆಲೆಯ ಕೆಂಪಿಗನಂತೆ
ಹಾದಿ ತಪ್ಪದ ನಡೆಯಾಗಿ, ಶಶಿಯುದರದ
ಬೆಳಕಾಗಿ, ತಿರುವುತ್ತಾ ತಿರುವುತ್ತಾ
ಬೆಟ್ಟಗುಡ್ಡ ಉದುರಿಸದೇ ಕಡಲ ನೀರು
ತುಳುಕಿಸದೇ ದುಂಡಾಗಿ ಬದುಕುಳಿವ
ಭುವಿಯ ಪಾಲಿನ ಭಾರವಾಗಿ ಕೊನೆಗೊಮ್ಮೆ
ಬೂದಿಯೋ ಮಣ್ಣೋ ಅಂತೆ ಹಗುರಾಗಿ
ಒಂದಾಗಿ ಆಗಿಹೋಗುವುದು..

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.