‘ಸಿಂಹ ಮಾನವ’ ಮೂರ್ತಿಯು ವಿಶ್ವದ ಅತ್ಯಂತ ಹಳೆಯ ಪ್ರಾತಿನಿಧಿಕ ಮೂರ್ತಿಗಳಲ್ಲಿ ಒಂದು. ಇದು 30 ಸೆ.ಮೀ. ಎತ್ತರ ಇದೆ. ಈ ಮೂರ್ತಿಯ ತಲೆ ಮತ್ತು ಕೈಗಳು ಸಿಂಹದ ತಲೆ, ಮುಂಗಾಲುಗಳನ್ನು ಹೋಲುತ್ತವೆ. ದೇಹದ ಇತರ ಅಂಗಗಳು ಮನುಷ್ಯನ ಅಂಗಗಳನ್ನು ಹೋಲುತ್ತವೆ.
ಇದು ಅಂದಾಜು 40 ಸಾವಿರ ವರ್ಷಗಳಷ್ಟು ಹಳೆಯದು ಎನ್ನಲಾಗಿದೆ. ಇದನ್ನು ದೊಡ್ಡ ದಂತವೊಂದನ್ನು ಬಳಸಿ ಕೆತ್ತಲಾಗಿದೆ. ಈ ಮೂರ್ತಿಯು ಚೂರುಗಳು 1939ರಲ್ಲಿ ಮೊದಲು ಪತ್ತೆಯಾದವು. ಇವು ಪತ್ತೆಯಾಗಿದ್ದು ಜರ್ಮನಿಯ ಲೋನ್‌ ಕಣಿವೆಯ ಹಾಲೆನ್‌ಸ್ಟೀನ್‌–ಸ್ಟ್ಯಾಡೆಲ್‌ ಗುಹೆಯಲ್ಲಿ. ಚೂರುಗಳು ಪತ್ತೆಯಾದ ಮೂವತ್ತು ವರ್ಷಗಳ ನಂತರ ದಂತದ ಈ ಚೂರುಗಳು ಒಂದು ಪ್ರತಿಮೆಯ ತುಂಡುಗಳು ಎಂಬುದನ್ನು ಪುರಾತತ್ವ ಶಾಸ್ತ್ರಜ್ಞರು ಕಂಡುಕೊಂಡರು. 2009ರಲ್ಲಿ ಇನ್ನಷ್ಟು ಚೂರುಗಳು ಸಿಕ್ಕವು. ಅವುಗಳನ್ನೆಲ್ಲ ಸೇರಿಸಿ ಮೂರ್ತಿಯನ್ನು ಪುನರ್‌ ರೂಪಿಸಲಾಯಿತು. ಈಗ ಇರುವ ಈ ಮೂರ್ತಿಯು ಮುನ್ನೂರಕ್ಕೂ ಹೆಚ್ಚಿನ ಚೂರುಗಳನ್ನು ಹೊಂದಿದೆ. ಹೀಗಿದ್ದರೂ ಈ ಮೂರ್ತಿಯ ಮುಂಭಾಗದ ಎಲ್ಲ ಚೂರುಗಳು ಸಿಕ್ಕಿಲ್ಲ.
ಇದು ಸಿಂಹದ ಮುಖವಾಡ ತೊಟ್ಟ ಮನುಷ್ಯನನ್ನು ಪ್ರತಿನಿಧಿಸುತ್ತದೆಯೋ ಅಥವಾ ಅರ್ಧ ಮನುಷ್ಯ ಹಾಗೂ ಇನ್ನರ್ಧ ಸಿಂಹದ ದೇಹ ಹೊಂದಿರುವ ಪೌರಾಣಿಕ ಪಾತ್ರವೊಂದನ್ನು ಪ್ರತಿನಿಧಿಸುತ್ತದೆಯೋ ಎಂಬುದು ಇನ್ನೂ ಖಚಿತವಾಗಿಲ್ಲ. ಇದನ್ನು ಜರ್ಮನಿಯ ಅಲ್ಮರ್ ವಸ್ತುಸಂಗ್ರಹಾಲಯದಲ್ಲಿ ಇರಿಸಲಾಗಿದೆ.
