ಅಡ್ಡ ಹೆಸರಿನ ಉದ್ದುದ್ದ ರಾಮಾಯಣಗಳು!

7

ಅಡ್ಡ ಹೆಸರಿನ ಉದ್ದುದ್ದ ರಾಮಾಯಣಗಳು!

Published:
Updated:

ಲೋ ಆ ಆಂಟಿ ಎಲ್ಲೊ. ಎಷ್ಟುಹೊತ್ತು ಅಂತೆ ಬರೋದಕ್ಕೆ. ಯಾವಾಗಲೂ ಲೇಟ್‌. ಇದೇ ಕಥೆ ಆಗೋಯ್ತು ನಿಂದು. ನಾವೆಲ್ಲ ಹೋಗಿರ್ತೀವಿ ಬೇಗ್‌ ಬರೋದಕ್ಕೆ ಹೇಳು. ಹೀಗೆ ಜಯನಗರದ ಬಸ್‌ ಸ್ಟಾಪ್‌ನಲ್ಲಿ ನಿಂತು ನಾವು ನಾಲ್ವರು ಏರು ಧ್ವನಿಯಲ್ಲಿ ಮಾತನಾಡ್ತಿದ್ವಿ. ನಮ್ಮ ಮಾತನ್ನು ಕೇಳಿಸಿಕೊಂಡ ಯಾರಾದರೂ ಸರಿ ಈಗಿನ ಕಾಲದ ಹುಡುಗರು ಎಷ್ಟು ಕೆಟ್ಟುಹೋಗಿದ್ದಾರೆ ಅಂತ ಅಂದುಕೊಳ್ಳುತ್ತಿದ್ದರು. ಇಲ್ಲಾಂದರೆ, ಗ್ಯಾರಂಟಿ ಇವರು ಅಪಾಪೋಲಿಗಳು. ಬೀದಿಯಲ್ಲಿ ಹೆಂಗ್‌ ಮಾತಾಡ್ತವೆ ನೋಡಿ ಎಂದುಕೊಳ್ಳುತ್ತಿದ್ದರು. 

ಆದರೆ ನಾವೆಲ್ಲ ಹಾಗಲ್ಲ; ಒಳ್ಳೆಯ ಹುಡುಗರು. ಏನೋ ವಯೋಸಹಜತೆಯಿಂದ ವಾರೆಗಣ್ಣಿನಿಂದ ಹುಡುಗಿಯರನ್ನು ನೋಡಿದ್ದು, ಬಿಟ್ಟರೆ ಬೇರೆನೂ ಇಲ್ಲ! ಅಲ್ಲಿ ನಾವು ಮಾತನಾಡುತ್ತಿದ್ದದ್ದು ನಮ್ಮ ನಾಗೇಶ್‌ನ ಬಗ್ಗೆ (ಹೆಸರು ಬದಲಾಯಿಸಲಾಗಿದೆ). 

ಅದು ಎಸ್‌ಎಸ್‌ಎಲ್‌ಸಿಯ ಅಂತರ್‌ ಶಾಲೆ ನಾಟಕ ಸ್ಪರ್ಧೆ ಸಮಯ. ‘ಏಡ್ಸ್‌’ ನಾಟಕದ ಕಥಾವಸ್ತು. ನಾಟಕದಲ್ಲಿ ಹುಡುಗಿ ಪಾತ್ರವಿತ್ತು. ಆದರೆ, ಇಂಥ ‘ವಿಷಯ’ ಕುರಿತು ನಾಟಕ ಮಾಡಲು ಯಾವ ಹುಡುಗಿಯರು ಮುಂದೆ ಬರಲಿಲ್ಲ. ನಮ್ಮ ಮೇಷ್ಟ್ರಿಗೆ ಈ ನಾಟಕವನ್ನು ಮಾಡಿಸಲೇ ಬೇಕು ಎಂಬ ಹಟ. ಒಟ್ಟು ನಮ್ ಹುಡ್ಗರು ಪ್ರಶಸ್ತಿ ಬಾಚಲೇ ಬೇಕು ಎಂಬ ಛಲ. ಆಗ ಹುಡುಗಿ ಪಾತ್ರಕ್ಕೆ ಸಿಕ್ಕವನೇ ನಾಗೇಶ್‌! ಅವನ ಕಾಲು ಕೆ.ಜಿ ಡೊಳ್ಳು ಹೊಟ್ಟೆ, ನುಣುಪಾದ ಕೆಂಪು ಮೈ ಬಣ್ಣ, ಆಂಟಿ ಪಾತ್ರಕ್ಕೆ ಸರಿ ಹೊಂದುತ್ತಿತ್ತು. ಸರಿ, ಅವನಿಗೆ ಆಂಟಿ ಪಾತ್ರ ಹಾಕಿಸಿ, ನಾಟಕ ಆಡಿದೆವು. ಆ ನಾಟಕ ಸ್ಪರ್ಧೆಯಲ್ಲಿ ನಮ್ಮ ಶಾಲೆ ತೃತೀಯ ಪ್ರಶಸ್ತಿ ಗಳಿಸಿತು. ಆ ನೆನಪು ಎಂದಿಗೂ ಅಮರ. ಹಾಗೆಯೇ ಆ ನೆನಪಿನೊಂದಿಗೆ ಉಳಿದುಕೊಂಡಿದ್ದು, ನಾಗೇಶನನ್ನು ಆಂಟಿ ಎಂದು ಕರೆಯುವುದು ಕೂಡ !

ಇದಾಗಿ ಎಂಟರಿಂದ ಹತ್ತು ವರ್ಷಗಳಾಗಿರಬೇಕು ಇಂದಿಗೂ ಗೆಳಯರೆಲ್ಲ ಅವನನ್ನು ಆಂಟಿ ಎಂತಲೇ ಕರೆಯುತ್ತೀವಿ! ಮುದ್ದಾದ ಎರಡು ಹೆಣ್ಣು ಮಕ್ಕಳು, ಸುಖ– ಸಂಸಾರದಲ್ಲಿ ಈ ಆಂಟಿ ಎನ್ನುವ ಪದ ಕೋಲಾಹಲವನ್ನು ಸೃಷ್ಟಿಸಿದ್ದೂ ಇದೆ. ಅವರ ಮನೆಯಲ್ಲಿ ನಡೆಯುತ್ತಿದ್ದ ಕಾರ್ಯಕ್ರಮವೊಂದರಲ್ಲಿ ಅವರ ಮಾವ, ಅತ್ತೆ ಜೊತೆ ಮಾತನಾಡುವಾಗ ಬಾಯ್‌ತಪ್ಪಿನಿಂದ ‘ಲೋ ಆಂಟಿ ಬಾರೊ ಇಲ್ಲಿ’ ಎಂದು ಕರೆದು ಅವನನ್ನು ಮುಜುಗರಪಡಿಸಿ, ಕಾಲ್ಕಿತ್ತಿದ್ದೇವೆ. ಗೆಳಯರಿಗಷ್ಟೇ ಏರ್ಪಡಿಸಿದ್ದ ಔತಣಕೂಟದಲ್ಲಿ ನಾವು ಆಂಟಿ ಎಂದು ಕರೆದದ್ದನ್ನು ಅಪಾರ್ಥ ಮಾಡಿಕೊಂಡ ಹೊಸಗೆಳೆಯರು ಮತ್ತು ನಮ್ಮ ನಡುವೆ ಜಗಳವಾಗಿದ್ದೂ ಇದೆ. ಇವೆಲ್ಲ ಗೊತ್ತಿರುವ ವಿಷಯ. ಆದರೆ, ಆಂಟಿ ಅಂತ ಮೊಬೈಲ್ ಫೋನ್ ಕಾಂಟಾಕ್ಟ್‌ನಲ್ಲಿ ಹೆಸರು ಸೇವ್ ಮಾಡಿಕೊಂಡಿರುವ ಅದೆಷ್ಟು ಜನ ಇನ್ಯಾವ ಫಜೀತಿ ಅನುಭವಿಸಿದ್ದಾರೆ ಎನ್ನುವುದರ ಬಗ್ಗೆ ಸದ್ಯಕ್ಕೆ ಮಾಹಿತಿ ಇಲ್ಲ.

ಕೆಲವೊಮ್ಮೆ ಹೆಸರಿಗಿಂತಲೂ ಅಡ್ಡ ಹೆಸರೇ  ಹೆಚ್ಚು ಮುನ್ನಣೆಗಳಿಸಿರುತ್ತವೆ. ಅದು ಎಷ್ಟರ ಮಟ್ಟಿಗೆ ಎಂದರೆ ನಾವೇ ನಮ್ಮ ಹೆಸರನ್ನು ಹೇಳಿ ಪರಿಚಯಿಸಿಕೊಳ್ಳುವುದಕ್ಕಿಂತಲೂ ನಾನೊ#....# (ಅಡ್ಡ ಹೆಸರಿನಿಂದ) ಪರಿಚಯಿಸಿಕೊಳ್ಳುವಷ್ಟು!    

ನಮ್ಮ ತಂಡದಲ್ಲಿ ಇನ್ನು ಒಂದಷ್ಟು ಸ್ವಾರಸ್ಯ ಅಡ್ಡ ಹೆಸರುಗಳಿವೆ ಆದರೆ, ಅದ್ಯಾವುದು ಇಷ್ಟು ರಾದ್ಧಾಂತ ಸೃಷ್ಟಿಸಿಲ್ಲ. ಪ್ರಭುದೇವನನ್ನು ‘ಪೀಡೆ’, ‘ಪಾಪಿ’ ಅಂತೆಲ್ಲ ಕರದ್ರು ಹೇಳ್ರೊ ಅಂತಿದ್ದ! ಇನ್ನು ತಿಪ್ಪೇಶ್‌ನನ್ನು ಜೋರಾಗಿ ಲೋ ತಿಪ್ಪೆ ಎನ್ನುತ್ತಿದ್ವಿ. ಶಾಲೆಗೆ ಸೈಕಲ್‌ನಲ್ಲಿ ಬರುತ್ತಿದ್ದ ಸಂತೋಷ್‌ ‘ಸೈಕಲ್‌’ ಎಂದೇ ನಾಮಾಂಕಿತಗೊಂಡ. ಆದರೆ ಮುನಿಸಿಕೊಳ್ಳುತ್ತಿರಲಿಲ್ಲ. ಎಲ್ಲವನ್ನು ಒರೆಸಿ, ತೊಳೆದೇ ಮುಟ್ಟುತ್ತಿದ್ದ ಗೆಳಯನಿಗೆ ‘ಡೆಟಾಲ್‌’ ಹೇಗಿದ್ದೀಯ ಎಂದು ಕರೆಯುತ್ತಿದ್ದರೂ, ಆತ ಆದನ್ನು ಎಂಜಾಯ್‌ ಮಾಡುತ್ತಿದ್ದ! 

ಮೇಷ್ಟ್ರು ಕೊಟ್ಟ ಬಿರುದು!: ಅದು ಕಾಲೇಜಿನ ದಿನಗಳು ಮೇಷ್ಟ್ರು ಎಲ್ಲ ವಿದ್ಯಾರ್ಥಿಗಳ ಊರಿನ ಹೆಸರು ಕೇಳಿ ಪರಿಚಯ ಮಾಡಿಕೊಳ್ಳುತ್ತಿದ್ದರು. ಸಹಪಾಠಿಯೊಬ್ಬರು ತಮ್ಮ ಊರಿನ ಹೆಸರು ಕೊಂಡರಾಯನಪುರ ಎಂದು ಹೇಳಲು ತಡವರಿಸಿ ಕೊಂಡಿ... ಕೊಂಡಿ ಎಂದು ತಡವರಿಸಿದ. ಮೇಷ್ಟ್ರು ಅದೇನಮ್ಮ ಕೊಂಡಿ... ಕೊಂಡಿ ಅಂತೀಯಾ, ಅಂದ್ರು.  ಅಲ್ಲಿಂದ ಕೊಂಡಿ ಅಂತ ಕರೆಯುವುದು ಮಾತ್ರ ಓಡುತ್ತಲೇ ಇದೆ. ‘ಸ’ ಉಚ್ಛರಣೆ ಮಾಡಲು ಬಾರದ ಗೆಳೆಯ ‘ಸಾಕಾಹಾರಿ’ ಅಂದ. ಅದು ‘ಮಗ ಸಾಕ’ ಎಲ್ಲಿದ್ದೀಯೊ ಅನ್ನುವವರೆಗೂ ಮುಂದುವರೆದಿದೆ. 

ದೇಹಾಕೃತಿ ತಂದು ಕೊಟ್ಟ ಅಡ್ಡ ಬಿರುದು: ಕುಳ್ಳಗಿದ್ದರೆ ಕುಳ್ಳ/ಳ್ಳಿ, ಸಣ್ಣಗಿದ್ದರೆ ಪೆನ್ಸಿಲ್‌, ದಪ್ಪಗಿದ್ದರೆ ಡುಮ್ಮ. ಇದೆಲ್ಲ ಮಾಮೂಲಿ ಕೇಳಿರಬಹುದಾದ ಅಡ್ಡ ಹೆಸರು. ಇದರ ಹೊರತಾಗಿಯೂ ಒಂದಷ್ಟು ಅಡ್ಡ ಹೆಸರಿದೆ. ಹಲ್ಲು ಮಂದೆ ಬಂದಿದ್ದರೆ ತುರೆ (ತುರೆಮಣೆ ಎಂಬರ್ಥದಲ್ಲಿ) ಗುಂಗರು ಕೂದಲಿದ್ದರೆ ಕುರಿ, ಮೂಗು ವಕ್ರವಾಗಿದ್ದರೆ ಸೊಟ್ಟೆ. ಹೀಗೆ ಅಡ್ಡ ಹೆಸರಿಗೆ ಕೊನೆ ಇಲ್ಲ. 

ಸಾರ್‌ ನಾನು ಖಾಲಿ ಅನಿಲ್‌ : ಮೇಷ್ಟ್ರು ಹಾಜರಾತಿ ಕರೆಯುತ್ತಿದ್ದ ಸಮಯ ಯಾವುದೊ ಲೋಕದಲ್ಲಿ ಮುಳುಗಿ ಹೋಗಿದ್ದ ಅನಿಲ್‌ಗೆ ಎಚ್ಚರವಾಯ್ತು ಆದರೆ, ಆ ವೇಳೆಗಾಗಲೇ ಹಾಜರಾತಿ ಕರೆಯುವುದು ಮುಗಿದಿತ್ತು. ಸಾರ್‌ ನನ್ನ ಹೆಸರೇ ಕೂಗಲಿಲ್ಲ ಎಂದ ಮಹಾಶಯ. ಮೇಷ್ಟ್ರು ಏನ್ನಪ್ಪ ನಿನ್ನ ಇನ್‌ಶಿಯಲ್‌ ಎಂದ್ರು. ನಾನು ಖಾಲಿ ಅನಿಲ್‌ ಸರ್‌ ಇನ್‌ಶಿಯಲ್‌ ಇಲ್ಲ ಎಂದ ! ಅಲ್ಲಿಂದ ಅನಿಲನ ಹೆಸರಿನ ಮುಂದೆ ‘ಖಾಲಿ’ ಸೇರಿಕೊಂಡಿತು. 

ಬರಹ ಇಷ್ಟವಾಯಿತೆ?

  • 1

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !