ಸಿದ್ಧಗಂಗೆಯ ಜಾತ್ರೆ ಬರೀ ಉತ್ಸವ, ರಥೋತ್ಸವದ ಚೌಕಟ್ಟಿನಲ್ಲಿ ನಡೆಯುವುದಿಲ್ಲ. ರೈತರಿಗೆ ಮಾಹಿತಿಯ ಕಣಜವಾಗಿದೆ. ಈ ಜಾತ್ರೆಯ ಪ್ರಮುಖ ಆಕರ್ಷಣೆಯೇ ಕೃಷಿ ಮತ್ತು ಕೈಗಾರಿಕಾ ವಸ್ತು ಪ್ರದರ್ಶನ ಮತ್ತು ದನಗಳ ಪರಿಷೆ. ರಥೋತ್ಸವಕ್ಕೆ ಸುಮಾರು 10 ದಿನಗಳಿದೆ ಎನ್ನುವಾಗಲೇ ಮಠದ ಹಿಂಬದಿಯ ಬಯಲಿನಲ್ಲಿ ದನಗಳ ಪರಿಷೆ ಕೂಡುತ್ತದೆ. ಬೇಸಾಯಕ್ಕೆ ಅಗತ್ಯವಾದ ರಾಸುಗಳನ್ನು ಖರೀದಿಸಲು ಮತ್ತು ಮಾರಾಟ ಮಾಡುವ ರೈತರು ದೂರದ ಸ್ಥಳಗಳಿಂದ ಬರುವರು. ‘ಉತ್ತಮ ರಾಸು’ ಆಯ್ಕೆಗೆ ಸ್ಪರ್ಧೆಯೂ ಜರುಗುತ್ತದೆ. ಈ ಎಲ್ಲ ದೃಷ್ಟಿಯಲ್ಲಿ ನೋಡುವುದಾದರೆ ಸಿದ್ಧಗಂಗೆಯ ಜಾತ್ರೆ ‘ರೈತೋತ್ಸವ’ದ ರೀತಿ ನಡೆಯುತ್ತದೆ.