ಭಾನುವಾರ, ಏಪ್ರಿಲ್ 11, 2021
26 °C

ಅಕ್ರಮ ಗಣಿ ವರದಿ: ಗೋವಾ ಸ್ಪೀಕರ್ ಸ್ವೀಕಾರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಪಣಜಿ (ಪಿಟಿಐ): ಅಕ್ರಮ ಗಣಿಗಾರಿಕೆ ಕುರಿತಂತೆ ಗೋವಾ ವಿಧಾನಸಭೆಯ`ಸಾರ್ವಜನಿಕ ಲೆಕ್ಕಪತ್ರ ಸಮಿತಿ~ (ಪಿಎಸಿ) ನೀಡಿರುವ ವಿವಾದಾತ್ಮಕ  ವರದಿಯನ್ನು ಸ್ಪೀಕರ್ ರಾಜೇಂದ್ರ ಅರಳೇಕರ್ ಸ್ವೀಕರಿಸಿದ್ದಾರೆ.

ಅರಳೇಕರ್ ಅವರಿಗೂ ಮೊದಲು ಸ್ಪೀಕರ್ ಆಗಿದ್ದ ಪ್ರತಾಪಸಿಂಗ್ ರಾಣೆ ಅವರು ಈ ವರದಿಯನ್ನು ಒಪ್ಪಿರಲಿಲ್ಲ.



ವಿಧಾನಸಭೆಯಲ್ಲಿ ಈ ವರದಿ ಮಂಡನೆಯಾಗುವುದಕ್ಕೂ ಮೊದಲೇ ವರದಿಯ ಅಂಶಗಳು ಮಾಧ್ಯಮಕ್ಕೆ ಸೋರಿಕೆ ಆಗಿದ್ದವು. ಆದ್ದರಿಂದ ವರದಿಯ ವಿಶ್ವಾಸಾರ್ಹತೆ ಬಗ್ಗೆ ಪ್ರತಾಪಸಿಂಗ್ ರಾಣೆ   ಅನುಮಾನ ವ್ಯಕ್ತಪಡಿಸಿದ್ದರು.

`ಪಿಎಸಿ~  ಸದಸ್ಯರಾಗಿದ್ದ ಕಾಂಗ್ರೆಸ್ ಮತ್ತು ಮಹಾರಾಷ್ಟ್ರವಾದಿ ಗೋಮಾಂತಕ ಪಕ್ಷಗಳಿಗೆ ನಿಷ್ಠರು ಎನ್ನಲಾದ ನಾಲ್ವರು ಸದಸ್ಯರು ಈ ವರದಿಗೆ ಸಹಿ ಹಾಕಲು ನಿರಾಕರಿಸಿದ್ದರು. ಈ ಕಾರಣಗಳಿಂದಾಗಿ ವರದಿ  ವಿವಾದಾತ್ಮಕವಾಗಿದೆ.



ಈ ವರದಿಯು ಮಾಜಿ ಮುಖ್ಯಮಂತ್ರಿ ದಿಗಂಬರ ಕಾಮತ್ ಸೇರಿದಂತೆ ಅನೇಕ ಕಾಂಗ್ರೆಸ್ ಮುಖಂಡರನ್ನು ಅಕ್ರಮ ಗಣಿಗಾರಿಕೆಯಲ್ಲಿ ಬೊಟ್ಟು ಮಾಡಿದೆ. ನಾಲ್ಕು ಸಾವಿರ ಕೋಟಿ ರೂಪಾಯಿಗಳ ಅಕ್ರಮ ಗಣಿಗಾರಿಕೆ ನಡೆದಿದೆ ಎಂದು ಆಗ ವಿರೋಧ ಪಕ್ಷದ ನಾಯಕರಾಗಿದ್ದ ಹಾಲಿ ಮುಖ್ಯಮಂತ್ರಿ ಮನೋಹರ್ ಪಾರಿಕರ್ ನೇತೃತ್ವದ `ಪಿಎಸಿ~ ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

`ಪಿಎಸಿ ನೀಡಿರುವ ವರದಿಯನ್ನು ಪರಿಶೀಲಿಸಿಯೇ ಅಂಗೀಕರಿಸಿದ್ದೇನೆ. ಇದನ್ನು ಸರ್ಕಾರಕ್ಕೆ ಸಲ್ಲಿಸಲಾಗುವುದು. ವರದಿಯ ಆಧಾರದ ಮೇಲೆ ಕ್ರಮ ಕೈಗೊಳ್ಳುವ ವಿಚಾರ ಸರ್ಕಾರಕ್ಕೆ ಬಿಟ್ಟಿದ್ದು~ ಎಂದು ಅರಳೇಕರ್ ತಿಳಿಸಿದ್ದಾರೆ.

ಗೋವಾ ಅಕ್ರಮ ಗಣಿಗಾರಿಕೆ ಹಗರಣ ಕುರಿತಂತೆ ತನಿಖೆ ನಡೆಸಲು ಕೇಂದ್ರ ಗಣಿ ಸಚಿವಾಲಯ ರಚಿಸಿದ್ದ ನ್ಯಾಯಮೂರ್ತಿ ಎಂ.ಬಿ. ಷಾ ಆಯೋಗ ಕೂಡ `ಪಿಎಸಿ~ ವರದಿಯನ್ನು ಗಮನಿಸಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.