ಈ ನಗರಿಗಿದು ಎರಡನೇ ಭೇಟಿ

ಮಂಗಳವಾರ, ಜೂಲೈ 23, 2019
20 °C

ಈ ನಗರಿಗಿದು ಎರಡನೇ ಭೇಟಿ

Published:
Updated:

“ಅಪ್ಪ ಹೇಳಿದ್ದರು- `ನಿನ್ನೊಳಗಿನಿಂದ ಯಾವ ಪ್ರೇರಣೆ ಬರುತ್ತದೆಯೋ ಹಾಗೇ ನಡೆದುಕೊ~. ಆ ಮಾರ್ಗದರ್ಶನದಂತೆಯೇ ಬದುಕು, ವೃತ್ತಿ ಮತ್ತು ಬದುಕು ಎರಡರಲ್ಲಿಯೂ ನಡೆದುಕೊಳ್ಳುತ್ತಿದ್ದೇನೆ” ಎಂದು ಹೇಳಿದ ಒರಟು ಮುಖದ ಆ ಸುಂದರಾಂಗನ ಕಣ್ಣುಗಳಲ್ಲಿ ಯಾವ ಭಾವವಿತ್ತೆಂದು ಕಾಣಲಿಲ್ಲ. ಅದಕ್ಕೆ ಕಪ್ಪು ಕನ್ನಡಕ ಅಡ್ಡಿಪಡಿಸಿತ್ತು.



ಮುಖದ ಚಹರೆ ಥೇಟ್ ಅಮ್ಮನದೇ. ನಿಲುವು, ಮೈಕಟ್ಟಿನಲ್ಲಿ ಮಾತ್ರ ಅಪ್ಪನ ಹೋಲಿಕೆ.  `ದೋಬಿ ಘಾಟ್~ ಚಿತ್ರದ ಮೂಲಕ  `ಸ್ಮಿತಾ ಪಾಟೀಲ್ ಛಾಯೆ~ ಎಂಬಂತೆ  ಗುರುತಿಸಿಕೊಂಡ ಈ ನಟ ಪ್ರತೀಕ್ ಬಬ್ಬರ್. ಸ್ಮಿತಾ ಪಾಟೀಲ್- ರಾಜ್ ಬಬ್ಬರ್ ದಂಪತಿಯ ಪುತ್ರ.



ಅಪರೂಪಕ್ಕೆ ಉದ್ಯಾನ ನಗರಿಗೆ ಬಂದ ಅವರ ಕೈಗಳಲ್ಲಿ ವಾಹನ ಶುಚಿಗೊಳಿಸುವ ದೊಡ್ಡ ಯಂತ್ರದ ನೀರಿನ ಕೊಳವೆ. ಮೂರ‌್ನಾಲ್ಕು ಅಶ್ವಶಕ್ತಿ ವೇಗದಲ್ಲಿ ಚಿಮ್ಮುತ್ತಿದ್ದ ನೀರಿನ ರಭಸಕ್ಕೆ ಅಲ್ಲಿದ್ದ ವಾಹನಗಳ ಮೇಲಿನ ಕೆಮ್ಮಣ್ಣು (ಕೃತಕವಾಗಿ ಮೆತ್ತಿದ್ದು) ಕೊಚ್ಚಿಕೊಂಡು ಹೋಗುತ್ತಿತ್ತು.



`ದೋಬಿಘಾಟ್~ ಎಂಬ `ಶುಚಿ~ಗೆ ಸಂಬಂಧಿಸಿದ ಸಿನಿಮಾದಲ್ಲಿ ಮುಖ ತೋರಿಸಿದವರಿಗೆ ಈಗ ಸಿಕ್ಕಿದ್ದೂ `ಶುಚಿ~ಗೆ ಸಂಬಂಧಿಸಿದ ಉತ್ಪನ್ನಗಳಿಗೆ ಪ್ರಚಾರ ರಾಯಭಾರಿಯಾಗುವ ಅವಕಾಶ.



`ಬಾಷ್~ ಬ್ರಿಟನ್‌ನಲ್ಲಿ ಸಂಶೋಧನೆ-ಅಭಿವೃದ್ಧಿ ಕೈಗೊಂಡದ್ದು, ಯೂರೋಪ್‌ನಲ್ಲಿ ತಯಾರಿಸಿದ ಕೈಗಾರಿಕೆ ಮತ್ತು ವಾಹನ ಶುಚಿಗೊಳಿಸುವ ನಾಲ್ಕು ಯಂತ್ರಗಳನ್ನು ಭಾರತದಲ್ಲಿ- ಮೊದಲಿಗೆ ಬೆಂಗಳೂರಿನಲ್ಲಿ- ಬಿಡುಗಡೆ ಮಾಡಲು ಮುಂದಾಯಿತು. ಅದು ಪ್ರಚಾರ ರಾಯಭಾರಿಯಾಗಿ ಆರಿಸಿಕೊಂಡದ್ದು ಪ್ರತೀಕ್ ಅವರನ್ನು.



ಉದ್ಯಾನ ನಗರಿಯಲ್ಲಿ ಶುಕ್ರವಾರ ಮಾತಿಗೆ ಸಿಕ್ಕ ಪ್ರತೀಕ್, 2008ರಲ್ಲಿ `ಜಾನೆ ತು ಯಾ ಜಾನೆ ನಾ~, 2011ರಲ್ಲಿ ಅಮೀರ್‌ಖಾನ್ ಪತ್ನಿ ಕಿರಣ್ ರಾವ್ ಚೊಚ್ಚಲ ನಿರ್ದೇಶನದ ಚಿತ್ರ `ದೋಬಿಘಾಟ್~ ಸೇರಿದಂತೆ ಐದಾರು ಸಿನಿಮಾಗಳಲ್ಲಿ ಪ್ರತಿಭೆ ತೋರಿದ್ದರು.

`ಯೂ ನೋ... ನಾನೀಗ ಕಿರುತೆರೆಗೂ ಪ್ರವೇಶಿಸಿದ್ದೇನೆ. ನಾನು ನಡೆಸಿಕೊಡುವ ಕಾರ್ಯಕ್ರಮವೊಂದು ಎಂಟಿವಿಯಲ್ಲಿ ಜುಲೈ 15ರಿಂದ ಪ್ರಸಾರಗೊಳ್ಳಲಿದೆ~.



ಅದು ಯಾವ ಬಗೆ ಕಾರ್ಯಕ್ರಮ? ಮನರಂಜನೆಯೋ, ಸಾಹಸ ಕ್ರೀಡೆಯದೋ ಎಂಬ ಪ್ರಶ್ನೆಗೆ, `ಇನ್ನೆರೆಡು ದಿನ ಕಾಯ್ದು ನೋಡಿ~.. ಎಂಬುದು ಅವರ ಉತ್ತರವಾಗಿತ್ತು.

`ಹಾ... ಐಸಾಕ್- ಪ್ಯಾರ್ ಕಿ  ನಿಶಾನಿ ನನ್ನ ಬರಲಿರುವ ಚಿತ್ರ. ಈಗ ನೋಡಿ, ಬಾಷ್ ಉತ್ಪನ್ನದ ಜತೆ ಮರ್ದಾಂಗಿ ಕಿ ನಿಶಾನಿ.. ಆಗಿದೆ~ ಎಂದವರೇ ಹಹ್ಹಹ್ಹಾ ಎಂದು ಥೇಟ್ ಅಪ್ಪನದೇ ಶೈಲಿಯಲ್ಲಿ ಮುಖ ಮೇಲೆತ್ತಿ ನಕ್ಕರು.



`ಬೆಂಗಳೂರಿಗೆ ಇದು ನನ್ನ ಎರಡನೇ ಭೇಟಿ. ಮೊದಲೊಮ್ಮೆ ಅಮ್ಮನ ಜತೆ ಬಂದಿದ್ದೆ. ಅಮ್ಮನ ಸ್ನೇಹಿತರ ಮನೆ ಕಾರ್ಯಕ್ರಮವಿತ್ತು. ಆಗ ನಾನಿನ್ನೂ ಪುಟ್ಟ ಬಾಲಕ. ಈ ನಗರಿ ಬಗ್ಗೆ ಏನೂ ಗೊತ್ತಿರದ ವಯಸ್ಸು. ಈಗ ಬಾಷ್ ಕಂಪೆನಿ ಕರೆತಂದಿದೆ. ಬೆಂಗಳೂರು ಹೇಗಿದೆ ನೋಡೋಣ ಎಂದರೆ ಸಮಯವೇ ಇಲ್ಲ~ ಎಂದು ಲೊಚಗುಟ್ಟಿದರು. ಅಷ್ಟರಲ್ಲೇ ಆತನ ಮ್ಯಾನೇಜರ್, `ಸರ್ ಫ್ಲೈಟ್‌ಗೆ ಟೈಮಾಯ್ತು~ ಎಂದರು.



ಛಾಯಾಗ್ರಾಹಕರ ಬಲವಂತಕ್ಕೆ ಕೆಲವು ಫೋಟೊಗಳಿಗೆ ಪೋಸ್ ನೀಡಿದರಷ್ಟೆ. ಎಡಗೈಯಲ್ಲಿ ದಟ್ಟವಾಗಿ ಹರಡಿದ್ದ ಹಚ್ಚೆಯೂ ಕ್ಯಾಮೆರಾದಲ್ಲಿ ಸೆರೆಯಾಯಿತು.

ಸೂರ್ಯನ ಮಗ್ಗಲಲ್ಲೇ ಪುಟ್ಟ ಪಕ್ಷಿ ಹಾರುತ್ತಿರುವ ಚಿತ್ರ ಹಸಿರು-ಕೆಂಪು ಬಣ್ಣದಲ್ಲಿ ಮರಿ ಬಬ್ಬರ್ ಕೈಯಲ್ಲಿ ಹಚ್ಚೆಯಾಗಿತ್ತು.

 

ಕ್ಯಾಮೆರಾಗಳ ಕ್ಲಿಕ್.. ಕ್ಲಿಕ್... ಸದ್ದು ಅಡಗುವ ಮುನ್ನವೇ ತರಾತುರಿಯಲ್ಲಿ ಎಲ್ಲರಿಗೂ ಬೈ ಹೇಳಿದ. ಇನ್ನೂ ಹೆಚ್ಚಿನ ಸಂದರ್ಶನ ಬಯಸಿದ್ದ ಚಾನೆಲ್ ವರದಿಗಾರ್ತಿಯರು ಪ್ರತೀಕ್ ಮ್ಯಾನೇಜರ್‌ಗೆ ಶಾಪ ಹಾಕುತ್ತಾ ಗೊಣಗಿಕೊಂಡೇ ನಿರ್ಗಮಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry