ಸೋಮವಾರ, ಮೇ 17, 2021
28 °C

ಉಲ್ಲಾಸ್ ಕಶಲ್ಕರ್‌ಗೆ ಮನ್ಸೂರ್ ಪ್ರಶಸ್ತಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು :ಕೋಲ್ಕತ್ತದ ಖ್ಯಾತ ಸಂಗೀತಗಾರ ಪಂಡಿತ್ ಉಲ್ಲಾಸ್ ಕಶಲ್ಕರ್ ಅವರಿಗೆ `ಮಲ್ಲಿಕಾರ್ಜುನ ಮನ್ಸೂರ್ ಪ್ರಶಸ್ತಿ~ ನೀಡಿ ಗೌರವಿಸಲಾಯಿತು. 



 ಶನಿವಾರ ಬೆಂಗಳೂರು ಕಿಡ್ನಿ ಪ್ರತಿಷ್ಠಾನ ವತಿಯಿಂದ ಇಲ್ಲಿ ಆರಂಭವಾದ ಎರಡು ದಿನಗಳ `ಬಿಕೆಎಫ್ ಧ್ವನಿ- ಮನ್ಸೂರ್ ಸಂಗೀತೋತ್ಸವ~ದಲ್ಲಿ  ಸರ್ಕಾರದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಕೆ.ಜೈರಾಜ್ ಅವರು ಕಶಲ್ಕರ್ ಅವರಿಗೆ 50 ಸಾವಿರ ನಗದು, ಪ್ರಶಸ್ತಿ ಪತ್ರ ಮತ್ತು ಮನ್ಸೂರ್ ಅವರ ಕಂಚಿನ ಪುತ್ಥಳಿಯನ್ನು ನೀಡಿ ಆತ್ಮೀಯವಾಗಿ ಸನ್ಮಾನಿಸಿದರು.



ಜೈರಾಜ್ ಮಾತನಾಡಿ, `ಈಗಿನ ಸಂದರ್ಭದಲ್ಲಿ ಶಾಸ್ತ್ರೀಯ ಸಂಗೀತದ ವಿವಿಧ ಪ್ರಕಾರಗಳು ಕುಸಿಯುತ್ತಿವೆ. ಇಂತಹ ಸಂದರ್ಭದಲ್ಲಿ ಸಂಗೀತದ ಜ್ಞಾನ ಕೇವಲ ಮೇಲ್ಜಾತಿಗಳಿಗೆ ಸೀಮಿತವಾಗಬಾರದು.



ಏಕತಾನತೆಯನ್ನು ಮೀರಿ ಅದು ಎಲ್ಲರಿಗೂ ತಲುಪಬೇಕು. ಕರ್ನಾಟಕ ಮತ್ತು ಹಿಂದೂಸ್ತಾನಿ ಸಂಗೀತ ಪ್ರಕಾರಗಳು ಅಡೆ ತಡೆಯಿಲ್ಲದೆ ಪಸರಿಸಬೇಕು~ ಎಂದರು.



ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಕಶಲ್ಕರ್, `ಹಿಂದೂಸ್ತಾನಿ ಸಂಗೀತಕ್ಕೆ ಕರ್ನಾಟಕ ಬಹುದೊಡ್ಡ ಕೊಡುಗೆ ನೀಡಿದೆ. ಇಂತಹ ಸ್ಥಳದಲ್ಲಿ ಸನ್ಮಾನ ಸ್ವೀಕರಿಸುತ್ತಿರುವುದು ಖುಷಿ ತಂದಿದೆ~ ಎಂದರು.



`ಮನ್ಸೂರರು ಮತ್ತು ನನ್ನ ಗುರುಗಳಾದ ಗಜಾನನರಾವ್ ಜೋಷಿ ಇಬ್ಬರೂ ಒಬ್ಬರೇ ಗುರುಗಳ ಬಳಿ ಸಂಗೀತ ಕಲಿತಿದ್ದರು. ಮನ್ಸೂರರು ಕೂಡ ನನ್ನ ಗುರು ಸಮಾನರು~ ಎಂದು ಹೇಳಿದರು.



ವಿದುಷಿ ಲಲಿತ್ ಜೆ. ರಾವ್, `ಬೇರೆ ಲ್ಲಿಯೂ ಕೇಳಲು ಸಾಧ್ಯವಿಲ್ಲದ ಸಂಗೀತ ಮನ್ಸೂರರ ಆಳದಲ್ಲಿತ್ತು. ಅವರು ತಮ್ಮ ಪುತ್ರ ಅಥವಾ ಶಿಷ್ಯರು ಲಭ್ಯವಿಲ್ಲದಿದ್ದಾಗ ನನ್ನನ್ನು ಕಾರ್ಯಕ್ರಮಕ್ಕೆ ಆಹ್ವಾನಿಸುತ್ತಿ ದ್ದರು.



ರಾಗ ಯಾವುದು ಎಂದು ಕೇಳಿದರೆ ಅದಕ್ಕೂ ಉತ್ತರ ನೀಡದೆ ಸುಮ್ಮನೆ ಹಾಡು ಎನ್ನುತ್ತಿದ್ದರು. ಅದು ನನ್ನೊಳಗೆ ಆತ್ಮವಿಶ್ವಾಸ ಹೆಚ್ಚಿಸಿತು~ ಎಂದರು.



ಧ್ವನಿ ಸಂಗೀತೋತ್ಸವದ ಸಂಘಟನಾ ಸಮಿತಿಯ ಅಧ್ಯಕ್ಷ ಪಿ.ಶ್ರೀನಿವಾಸ್, ಪ್ರತಿಷ್ಠಾನದ ಟ್ರಸ್ಟಿ ಡಾ. ಪಿ.ಶ್ರೀರಾಮ್, ಮನ್ಸೂರರ ಪುತ್ರಿ ಲಕ್ಷ್ಮೀ ಪಾಟೀಲ್, ಟೆಕ್ಸಾಸ್ ಇನ್ಸ್‌ಟ್ರುಮೆಂಟ್ ಭಾರತೀಯ ಪ್ರತಿಷ್ಠಾನದ ಸಿಲ್ವಿಯಾ ಸುಬ್ಬಯ್ಯ, ಪತ್ರಕರ್ತ ಎಂ.ಕೆ. ಭಾಸ್ಕರ ರಾವ್ ಮತ್ತಿತರರು ಉಪಸ್ಥಿತರಿದ್ದರು.



`ಅನಾಹತ ನಾದಕ್ಕೆ ಸಂದ ಅಜ್ಜ~


ಮನ್ಸೂರರ ಮೊಮ್ಮಗಳು ಸೀಮಾ ಪಾಟೀಲ್ ಮಾತನಾಡಿ,`ನಮ್ಮಜ್ಜ ಲಿಂಗಪೂಜಿ ಮಾಡೋ ಹೊತ್ತಿನಾಗ ದೇವರಿಗೆ ಸಂಗೀತದ `ಚೀಜ್~ ಅರ್ಪಣೆ ಮಾಡ್ತೀನಿ ಅಂತ ಹೇಳತಿದ್ದರು. ಆಹತ ರಾಗಾನ ಪ್ರತಿಯೊಬ್ಬರೂ ಕೇಳ್ತಾರ. ಆದರ ಅನಾಹತ ನಾದ ಸಂತರು, ಋಷಿಗಳಿಗೆ ಮಾತ್ರ. ಅನಾಹತ ರಾಗದಾಗ ಹಾಡ್ತ ಹಾಡ್ತ ನಮ್ಮಜ್ಜ ಅದೇ ನಾದಕ್ಕ ಸಂದರು~ ಎಂದು ಭಾವುಕರಾಗಿ ನುಡಿದರು.



“ಪಂಡಿತ್ ಭೀಮಸೇನ ಜೋಷಿ ಅವರು ಅಜ್ಜನ ಬಗ್ಗೆ ಮಾತನಾಡ್ತ `ನಾವು ಜನಸಾಮಾನ್ಯರಿಗಾಗಿ ಹಾಡ್ತೇವಿ. ಆದರ ಮನ್ಸೂರರು ದೇವರಿಗೆ, ವಿಮರ್ಶಕರಿಗೆ ಹಾಡ್ತಾರ~ ಅನ್ನುತ್ತಿದ್ದರು. ಮರಾಠಿ ಸಾಹಿತಿ ಪು.ಲ. ದೇಶಪಾಂಡೆ ಅವರು `ಸಂಗೀತದಲ್ಲೇ ವಾಸ್ತವ್ಯ ಮಾಡಿದ ವ್ಯಕ್ತಿ ಮನ್ಸೂರ~ ಎಂದಿದ್ದಾರೆ. ವಚನ, ತತ್ವಪದಗಳನ್ನ ಹಿಂದೂಸ್ತಾನಿ ಸಂಗೀತದೊಳಗ ಹಾಡಿದ ಅಜ್ಜ, ಸವಾಲೊಂದನ್ನು ಸ್ವೀಕರಿಸಿ `ಪೋಗದಿರಲೋ ರಂಗ~ ಕೃತೀನ ಕರ್ನಾಟಕ ಸಂಗೀತದಲ್ಲಿ ಪ್ರಸ್ತುತ ಪಡಿಸಿದ್ದರು~ ಎಂದು ಹೇಳಿದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.