ಎನ್.ಸಂತೋಷ್ ಹೆಗ್ಡೆ ಕರೆ ಲೋಕಾಯುಕ್ತ ವರದಿಗೆ ಒತ್ತಾಯಿಸಿ

7

ಎನ್.ಸಂತೋಷ್ ಹೆಗ್ಡೆ ಕರೆ ಲೋಕಾಯುಕ್ತ ವರದಿಗೆ ಒತ್ತಾಯಿಸಿ

Published:
Updated:
ಎನ್.ಸಂತೋಷ್ ಹೆಗ್ಡೆ ಕರೆ ಲೋಕಾಯುಕ್ತ ವರದಿಗೆ ಒತ್ತಾಯಿಸಿ

ಬೆಂಗಳೂರು: `ಅಕ್ರಮ ಗಣಿಗಾರಿಕೆ ಸಂಬಂಧ ಲೋಕಾಯುಕ್ತ ಸಲ್ಲಿಸಿರುವ ವರದಿಯನ್ನು ಅನುಷ್ಠಾನಕ್ಕೆ ತರಲು ಜನತೆ ಒತ್ತಾಯಿಸಬೇಕು~ ಎಂದು ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಎನ್.ಸಂತೋಷ್ ಹೆಗ್ಡೆ ಕರೆ ನೀಡಿದರು.



ಸೇಂಟ್‌ಮಾರ್ಕ್ಸ್ ಕೆಥೆಡ್ರಲ್ ನಗರದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ `ಭ್ರಷ್ಟಾಚಾರದಲ್ಲಿ ಇತ್ತೀಚಿನ ಆವಿಷ್ಕಾರಗಳು~ ಕುರಿತ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.



`2008ರಲ್ಲಿಯೇ ಅಕ್ರಮ ಗಣಿಗಾರಿಕೆ ಕುರಿತು ಒಂದು ವರದಿ ಸಲ್ಲಿಸಲಾಯಿತು. ಅದು ಕಾರ್ಯರೂಪಕ್ಕೆ ಬರಲಿಲ್ಲ. ಇತ್ತೀಚೆಗೆ ಸಲ್ಲಿಸಲಾದ ವರದಿ ಬಗ್ಗೆ ಅಟ್ವೊಕೇಟ್ ಜನರಲ್ ಅವರು ಇದು ಕೇವಲ ಶಿಫಾರಸು ಎಂದು ಹೇಳುತ್ತಿದ್ದಾರೆ.

 

ಸಿವಿಲ್ ಅಥವಾ ಕ್ರಿಮಿನಲ್ ಈ ಎರಡರಲ್ಲಿ ಯಾವುದೇ ನ್ಯಾಯಾಲಯ ವಿಚಾರಣೆ ಮಾಡಿದರೂ ಗಣಿ ಪ್ರಕರಣ ಶಕ್ತಿಶಾಲಿಯಾಗಿಯೇ ಉಳಿಯುತ್ತದೆ~ ಎಂದರು.



`ಅಕ್ರಮ ಗಣಿಗಾರಿಕೆಯ ಒಟ್ಟು ಮೊತ್ತ 16 ಸಾವಿರ ಕೋಟಿ. 2ಜಿ ಹಗರಣದಷ್ಟು ಇದು ದೊಡ್ಡದಲ್ಲದೇ ಇರಬಹುದು. ಆದರೆ ಇದು ಖನಿಜ ಸಂಪತ್ತನ್ನು ಶಾಶ್ವತವಾಗಿ ಬರಿದು ಮಾಡುತ್ತದೆ ಎಂಬುದು ಗಮನಿಸಬೇಕಾದ ಸಂಗತಿ~ ಎಂದು ಹೇಳಿದರು.



`ವ್ಯಕ್ತಿಯೊಬ್ಬರು `ಲೋಕ ದೋಖಾ~ ಎಂಬ ಕೃತಿ ಬರೆಯಲು ನಿರ್ಧರಿಸಿದ್ದಾರೆ. ಅಕ್ರಮ ಗಣಿಗಾರಿಕೆ ಕುರಿತು ಮಾತ್ರ ಲೋಕಾಯುಕ್ತ ವರದಿ ಸಲ್ಲಿಸಿರುವುದಕ್ಕೆ ಅವರಿಂದ ಈ ಪ್ರತಿಕ್ರಿಯೆ ಹೊರಟಿದೆ. ಎಲ್ಲಾ ಹಗರಣಗಳನ್ನು ಬಯಲಿಗೆಳೆದಿದ್ದರೆ  `ದೋಖಾ ಲೋಕ~ದ ಅನಾವರಣವಾಗುತ್ತಿತ್ತು” ಎಂದು ಮಾರ್ಮಿಕವಾಗಿ ಹೇಳಿದರು.



ಸಭಿಕರ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಅವರು, `ಸಂವಿಧಾನಾತ್ಮಕವಾಗಿಯೇ ಅಣ್ಣಾ ಭ್ರಷ್ಟಾಚಾರದ ವಿರುದ್ಧ ಹೋರಾಟ ನಡೆಸಿದ್ದಾರೆ. ಶಾಂತಿಯುತ ಪ್ರತಿಭಟನೆಗೆ ಬ್ರಿಟಿಷರೇ ಅಡ್ಡಿಪಡಿಸಲಿಲ್ಲ. ಆದರೆ ಒಂದು ಕಲ್ಲನ್ನೂ ಹೊಡೆಯದೆ ನಡೆದ ಅಣ್ಣಾ ಹೋರಾಟವನ್ನು ಹತ್ತಿಕ್ಕುವ ಯತ್ನ ನಡೆಯಿತು~ ಎಂದು ವಿಷಾದ ವ್ಯಕ್ತಪಡಿಸಿದರು.



`ಕಠೋರ ಶಿಕ್ಷೆಯಿಂದ ಭ್ರಷ್ಟಾಚಾರವನ್ನು ನಿಯಂತ್ರಿಸಲು ಸಾಧ್ಯವಿಲ್ಲ. ಚೀನಾದಲ್ಲಿ ಭ್ರಷ್ಟಾಚಾರಕ್ಕೆ ಮರಣ ದಂಡನೆಯಂತಹ ಕಠಿಣ ಕಾನೂನುಗಳಿವೆ. ಆದರೂ ಭಾರತಕ್ಕಿಂತ ಚೀನಾದಲ್ಲಿ ಹೆಚ್ಚು ಭ್ರಷ್ಟಾಚಾರ ಇದೆ~ ಎಂದರು.



ಮಾಜಿ ಸಂಸದ ಎಚ್.ಟಿ. ಸಾಂಗ್ಲಿಯಾನಾ, ಟರ್ಬೋಕಂ ಅಂತರರಾಷ್ಟ್ರೀಯ ಸಂಸ್ಥೆಯ ಡೇನಿಯಲ್ ದೇವದತ್ತ, ಸುಬ್ರಹ್ಮಣ್ಯ ಇವಾಟುರಿ, ಅವಾಂತಿ ಬೆಲೆ ಮತ್ತಿತರರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry