ಬುಧವಾರ, ಜೂನ್ 23, 2021
28 °C

ಐಟಿಎಫ್ ಟೆನಿಸ್: ಪ್ರೇರಣಾ, ಅಂಕಿತಾ ರೈನಾಗೆ ಸೋಲು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಐಟಿಎಫ್ ಟೆನಿಸ್: ಪ್ರೇರಣಾ, ಅಂಕಿತಾ ರೈನಾಗೆ ಸೋಲು

ಬೆಂಗಳೂರು: ಭಾರತದ ಸ್ಪರ್ಧಿಗಳು ಇಲ್ಲಿ ಆರಂಭವಾದ ಕ್ಯೂನೆಟ್ ಐಟಿಎಫ್ ಟೆನಿಸ್ ಟೂರ್ನಿಯ ಮೊದಲ ಸುತ್ತಿನಲ್ಲೇ ನಿರಾಸೆ ಅನುಭವಿಸಿದರು.



ಕೆಎಸ್‌ಎಲ್‌ಟಿಎ ಕೋರ್ಟ್‌ನಲ್ಲಿ ಸೋಮವಾರ ನಡೆದ ಸಿಂಗಲ್ಸ್ ವಿಭಾಗದ ಮೊದಲ ಸುತ್ತಿನ ಪಂದ್ಯಗಳಲ್ಲಿ ಪ್ರೇರಣಾ ಭಾಂಬ್ರಿ, ರಿಷಿಕಾ ಸುಂಕರ, ನಿಧಿ ಚಿಲುಮುಲ ಮತ್ತು ಅಂಕಿತಾ ರೈನಾ ಸೋಲುಂಡರು.



ಟೂರ್ನಿಗೆ `ವೈಲ್ಡ್ ಕಾರ್ಡ್~ ಪ್ರವೇಶ ಪಡೆದಿದ್ದ ಪ್ರೇರಣಾ 3-6, 2-6 ರಲ್ಲಿ ಬೆಲ್ಜಿಯಂನ ತಮರಿನ್ ಹೆಂಡ್ಲೆರ್ ಎದುರು ಸೋತರು. ಇಲ್ಲಿ ಅಗ್ರಶ್ರೇಯಾಂಕ ಪಡೆದಿರುವ ತಮರಿನ್ ಸುಲಭ ಗೆಲುವು ತಮ್ಮದಾಗಿಸಿಕೊಂಡರು.

ಆರಂಭದಲ್ಲಿ ಎದುರಾಳಿಗೆ ಅಲ್ಪ ಪೈಪೋಟಿ ಒಡ್ಡಿದ ಪ್ರೇರಣಾ ಬಳಿಕ ಪಂದ್ಯದ ಮೇಲಿನ ಹಿಡಿತ ಕೈಬಿಟ್ಟರು.

ಅರ್ಹತಾ ಹಂತದಲ್ಲಿ ಗೆದ್ದು ಬಂದಿದ್ದ ರಿಷಿಕಾ 6-1, 3-6, 2-6 ರಲ್ಲಿ ಇಟಲಿಯ ನಿಕೋಲ್ ಕ್ಲೆರಿಕೊ ಎದುರು ಪರಾಭವಗೊಂಡರು. ಮೊದಲ ಸೆಟ್ ಜಯಿಸಿದ್ದ ಭಾರತದ ಆಟಗಾರ್ತಿ ಅಚ್ಚರಿಯ ಫಲಿತಾಂಶದ ನಿರೀಕ್ಷೆಯಲ್ಲಿದ್ದರು. ಆದರೆ ಮರುಹೋರಾಟ ನಡೆಸಿದ ನಿಕೋಲ್ ಮುಂದಿನ ಎರಡೂ ಸೆಟ್‌ಗಳನ್ನು ತಮ್ಮದಾಗಿಸಿಕೊಂಡು ಎರಡನೇ ಸುತ್ತಿಗೆ ಮುನ್ನಡೆದರು.



ಐದನೇ ಶ್ರೇಯಾಂಕದ ಆಟಗಾರ್ತಿ ಸ್ಲೊವೇಕಿಯದ ತದೆಜಾ ಮಜೆರಿಕ್ 7-6, 6-4 ರಲ್ಲಿ ಅಂಕಿತಾ ಅವರನ್ನು ಮಣಿಸಿದರು.



ಆಸ್ಟ್ರಿಯದ ಮೆಲಾನಿ ಕ್ಲಾಫ್ನೆರ್ 6-0, 6-1 ರಲ್ಲಿ ನಿಧಿ ವಿರುದ್ಧ ಸುಲಭ ಜಯ ಪಡೆದರು. ಭಾರತದ ಆಟಗಾರ್ತಿ ಕೇವಲ ಒಂದು ಪಾಯಿಂಟ್ ಗೆಲ್ಲುವಲ್ಲಿ ಮಾತ್ರ ಯಶ ಕಂಡರು. ಮೆಲಾನಿ ವೇಗದ ಸರ್ವ್ ಹಾಗೂ ಆಕರ್ಷಕ ರಿಟರ್ನ್‌ಗಳ ಮೂಲಕ ಮಿಂಚಿದರು.



ಮೊದಲ ಸುತ್ತಿನ ಇತರ ಪಂದ್ಯಗಳಲ್ಲಿ ಕ್ರೊಯೇಷ್ಯದ ಡೋನಾ ವೆಕಿಕ್ 7-5, 6-4 ರಲ್ಲಿ ಸರ್ಬಿಯದ ತಮಾರ ಕ್ಯುರೋವಿಕ್ ಎದುರೂ, 2ನೇ ಶ್ರೇಯಾಂಕದ ಆಟಗಾರ್ತಿ ಜಪಾನ್‌ನ ಅಕಿಕೊ ಒಮಾಯೆ 7-5, 6-2 ರಲ್ಲಿ ಇಸ್ರೇಲ್‌ನ ಡೆನಿಜ್ ಕಜನಾಯುಕ್ ಮೇಲೂ ಗೆಲುವು ಪಡೆದರು. ಮೆಲಿಸ್ ಸೆಜೆರ್ 6-1, 6-4 ರಲ್ಲಿ ದಲಿಲಾ ಜಕುಪೊವಿಕ್ ವಿರುದ್ಧ ಗೆದ್ದರೆ, ಅಂಜಾ ಪ್ರಿಸ್ಲನ್ 7-5, 6-3 ರಲ್ಲಿ ಸ್ಟೆಫಾನಿ ಸಿಮೋನ್ ಅವರನ್ನು ಸೋಲಿಸಿದರು.



ಸ್ಫೂರ್ತಿ, ಶರ್ಮದಾಗೆ ಸೋಲು: ಸ್ಥಳೀಯ ಪ್ರತಿಭೆಗಳಾದ ಸ್ಫೂರ್ತಿ ಶಿವಲಿಂಗಯ್ಯ ಮತ್ತು ಶರ್ಮದಾ ಬಾಲು ಇದೇ ಟೂರ್ನಿಯ ಡಬಲ್ಸ್ ವಿಭಾಗದ ಮೊದಲ ಸುತ್ತಿನಲ್ಲೇ ಸೋಲು ಅನುಭವಿಸಿದರು. ಇಸ್ರೆಲ್‌ನ ಡೆನಿಜ್ ಕಜನಾಯುಕ್ ಮತ್ತು ಚೀನಾದ ಯಾ ಜಾವೊ ಜೋಡಿ 7-5, 6-3 ರಲ್ಲಿ ಸ್ಫೂರ್ತಿ ಹಾಗೂ ಜರ್ಮನಿಯ ಮಿಶೆಲಾ ಫ್ರಾಲಿಕಾ ಎದುರು ಗೆದ್ದರು.



ಕೊರಿಯಾದ ಸುಂಗ್ ಹಿ ಹಾನ್ ಮತ್ತು ಇಸ್ರೇಲ್‌ನ ಕರೆನ್ ಶ್ಲೋಮೊ 6-3, 7-6 ರಲ್ಲಿ ಶರ್ಮದಾ ಹಾಗೂ ಟರ್ಕಿಯ ಸೆದಾ ಅರಂತೆಕಿನ್ ಅವರನ್ನು ಮಣಿಸಿದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.