ಕಂಬಾರ ವಿರುದ್ಧ ಟೀಕೆ: ಠಾಕ್ರೆ ಪ್ರತಿಕೃತಿ ದಹನ

7

ಕಂಬಾರ ವಿರುದ್ಧ ಟೀಕೆ: ಠಾಕ್ರೆ ಪ್ರತಿಕೃತಿ ದಹನ

Published:
Updated:
ಕಂಬಾರ ವಿರುದ್ಧ ಟೀಕೆ: ಠಾಕ್ರೆ ಪ್ರತಿಕೃತಿ ದಹನ

ಬೆಳಗಾವಿ: ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಡಾ.ಚಂದ್ರಶೇಖರ ಕಂಬಾರ ಅವರ ವಿರುದ್ಧ ಹೇಳಿಕೆ ನೀಡಿರುವ ಶಿವಸೇನಾ ಮುಖ್ಯಸ್ಥ ಬಾಳಾ ಠಾಕ್ರೆ ಅವರ ಪ್ರತಿಕೃತಿಯನ್ನು ಕರ್ನಾಟಕ ಯುವ ವೇದಿಕೆ ಕಾರ್ಯಕರ್ತರು ಗುರುವಾರ ಇಲ್ಲಿ ದಹಿಸಿದರು.



ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯಕರ್ತರು, ಠಾಕ್ರೆ ನೇತೃತ್ವದ ಶಿವಸೇನೆಯ ಮುಖವಾಣಿ `ಸಾಮ್ನಾ~ ಪತ್ರಿಕೆಯನ್ನು ಸುಟ್ಟರು.ಠಾಕ್ರೆ ವಿರುದ್ಧ ಘೋಷಣೆಗಳನ್ನು ಕೂಗಿದ ವೇದಿಕೆಯ ಅನಂತ ಬ್ಯಾಕೂಡ, ಸುರೇಖಾ ಅಳವಿ, ಕರವೇಯ ಗಣೇಶ ರೊಕಡೆ ಸೇರಿದಂತೆ ನೂರಾರು ಕಾರ್ಯಕರ್ತರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.



ಈಚೆಗೆ ಬೆಳಗಾವಿಗೆ ಭೇಟಿ ನೀಡಿದ್ದ ಡಾ. ಕಂಬಾರರು `ಇಲ್ಲಿ ಮರಾಠಿಗರ ಉಪಟಳ ಹೆಚ್ಚಿದೆ~ ಎಂದು ಹೇಳಿಕೆ ನೀಡಿದ್ದರು. ಕಂಬಾರರ ಹೇಳಿಕೆಯನ್ನು ಎಂಇಎಸ್ ಕಾರ್ಯಕರ್ತರು ಹಾಗೂ ಅವರನ್ನು ಬೆಂಬಲಿಸುತ್ತಿರುವ ಬಾಳಾ ಠಾಕ್ರೆ ಖಂಡಿಸಿದ್ದರು. ಜೊತೆಗೆ ಠಾಕ್ರೆಯವರು ಕಂಬಾರರ ವಿರುದ್ಧ ಕಟು ಟೀಕೆಯನ್ನು ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಕನ್ನಡಪರ ಸಂಘಟನೆಗಳ ಕಾರ್ಯಕರ್ತರು ಠಾಕ್ರೆ ವಿರುದ್ಧ ಗುರುವಾರ ಪ್ರತಿಭಟನೆ ನಡೆಸಿದರು.



`ಬೆಳಗಾವಿಯಲ್ಲಿ ಬೆಳೆದ ಚಂದ್ರಶೇಖರ ಕಂಬಾರ ಅವರು ಕೆಲ ಮರಾಠಿ ಭಾಷಿಕರ ಉಪಟಳದ ಬಗೆಗೆ ಹೇಳಿದ್ದರಲ್ಲಿ ತಪ್ಪೇನಿಲ್ಲ. ಅವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. ಆದರೆ ಇದಕ್ಕೆ ಬಾಳಾ ಠಾಕ್ರೆ ಪ್ರತಿಕ್ರಿಯಿಸಿದ ರೀತಿ ಸರಿಯಲ್ಲ. ಖಂಡನಾರ್ಹವಾಗಿದೆ~ ಎಂದು ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಬಸವರಾಜ ಜಗಜಂಪಿ ಪ್ರತಿಕ್ರಿಯಿಸಿದರು.

 

ಕರ್ನಾಟಕ ರಕ್ಷಣಾ ವೇದಿಕೆ ನಡೆಸುತ್ತಿರುವ ಆಮರಣಾಂತ ಉಪವಾಸ ಐದನೇ ದಿನಕ್ಕೆ ಕಾಲಿಟ್ಟಿದೆ. ಯುವ ವೇದಿಕೆಯದ್ದು ಎರಡನೇ ದಿನಕ್ಕೆ ಕಾಲಿಟ್ಟಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry