ಬುಧವಾರ, ಮೇ 12, 2021
22 °C

ಕಟ್ಟಡ ಹಣ ಸಂಗ್ರಹ: ಸರ್ಕಾರದ ಅರ್ಜಿ ತಿರಸ್ಕಾರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಬಾಲಿವುಡ್ ನಟ ಧರ್ಮೇಂದ್ರ ಅವರ ಒಡೆತನದ ಕಟ್ಟಡವೊಂದರಿಂದ ಸಂಗ್ರಹವಾಗುತ್ತಿರುವ `ಅಭಿವೃದ್ಧಿ ಶುಲ್ಕ~ದಲ್ಲಿ ಶೇ 2ರಷ್ಟು ಹಣವನ್ನು ಕೆರೆ ಒತ್ತುವರಿದಾರರ ಪುನರ್ವಸತಿಗಾಗಿ ಬಿಡುಗಡೆ ಮಾಡುವಂತೆ ಕೋರಿ ಸರ್ಕಾರ ಸಲ್ಲಿಸಿದ್ದ ಮನವಿಯನ್ನು ಹೈಕೋರ್ಟ್ ಶುಕ್ರವಾರ ತಿರಸ್ಕರಿಸಿದೆ.



ಬನ್ನೇರುಘಟ್ಟ ರಸ್ತೆಯ ಕೊತ್ತನೂರು ಬಳಿ ಇರುವ 34 ಎಕರೆಗಳಷ್ಟು ವಿಶಾಲವಾಗಿರುವ ಜಮೀನಿನಲ್ಲಿ `ಸೌತ್ ಸಿಟಿ ಪ್ರಾಜೆಕ್ಟ್~ ಹೆಸರಿನಲ್ಲಿ ಧಮೇಂದ್ರ ಹಾಗೂ ಅವರ ಕುಟುಂಬದ ಒಡೆತನದಲ್ಲಿ ಇರುವ 3,000 ಫ್ಲ್ಯಾಟ್‌ಗಳ ಪ್ರಕರಣ ಇದು.



ಈ ಯೋಜನೆಯನ್ನು ಪ್ರಶ್ನಿಸಿ 1996ರಲ್ಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಲಾಗಿತ್ತು. ಆದರೆ ಆಗಲೇ ಕಟ್ಟಡ ನಿರ್ಮಾಣ ಕಾರ್ಯ ಮುಗಿದಿದ್ದ ಹಿನ್ನೆಲೆಯಲ್ಲಿ, ಜನರ ಒಳಿತಿಗೋಸ್ಕರ ಶೇ 2ರಷ್ಟು ಅಭಿವೃದ್ಧಿ ಶುಲ್ಕ ವಸೂಲಿ ಮಾಡುವಂತೆ ಆಗ ಹೈಕೋರ್ಟ್ ನಿರ್ದೇಶಿಸಿತ್ತು.



ಈ ಆದೇಶದ ಮೇರೆಗೆ ಶುಲ್ಕ ವಸೂಲಿ ಮಾಡಲಾಗುತ್ತಿದ್ದು, ಈವರೆಗೆ ಒಟ್ಟು 13.22 ಕೋಟಿ ರೂಸಂಗ್ರಹವಾಗಿದೆ. ಪುಟ್ಟೇನಹಳ್ಳಿ ಕೆರೆಯನ್ನು ಒತ್ತುವರಿ ಮಾಡಿಕೊಂಡಿರುವವರ ಪುನರ್ವಸತಿಗಾಗಿ 99 ಲಕ್ಷ ರೂಪಾಯಿಗಳ ಅಗತ್ಯ ಇದೆ ಎಂದು ಸರ್ಕಾರ ತಿಳಿಸಿತ್ತು.



ಅದಕ್ಕೆ ಹೈಕೋರ್ಟ್, `ನಾವು ಸರ್ಕಾರಕ್ಕೆ ತೆರಿಗೆ ಹಣ ನೀಡುವುದು ಏತಕ್ಕೆ, ಒತ್ತುವರಿದಾರರನ್ನು ತೆರವುಗೊಳಿಸುವುದು ಸರ್ಕಾರದ ಕರ್ತವ್ಯ. ಅವರಿಗೆ ನೆರವು ನೀಡಬೇಕಿರುವುದು ಸರ್ಕಾರ, ಯಾರ‌್ಯಾರು ಒತ್ತುವರಿದಾರರು ಇದ್ದಾರೆ ಅವರ ಬಗ್ಗೆ ನಮಗೆ ಮಾಹಿತಿ ನೀಡಿ, ಆ ಬಗ್ಗೆ ಬೇಕಿದ್ದರೆ ಆದೇಶ ಹೊರಡಿಸಬಹುದು. ಅದನ್ನು  ಬಿಟ್ಟು ಬೇರೆಯವರ ಜೇಬಿನಿಂದ ಅವರಿಗೆ ಹಣ ನೀಡುವುದು ಏತಕ್ಕೆ~ ಎಂದು ಪ್ರಶ್ನಿಸಿದ ಪೀಠ, ಮನವಿ ತಿರಸ್ಕರಿಸಿತು.

 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.