ಕನ್ನಡ ಶಾಲೆ ಉನ್ನತೀಕರಿಸಿ: ಸಿದ್ದಲಿಂಗಯ್ಯ

ಬೆಂಗಳೂರು: ‘ಕನ್ನಡ ಶಾಲೆಗಳನ್ನು  ಉನ್ನತೀಕರಣ ಮಾಡುವುದರ ಜತೆಗೆ ಶಿಕ್ಷಕರ ಕಲಿಕಾ ಕ್ರಮವನ್ನು ಬದಲಿಸುವ ಅಗತ್ಯವಿದೆ’ ಎಂದು ಹಿರಿಯ ಕವಿ ಡಾ.ಸಿದ್ದಲಿಂಗಯ್ಯ ಅಭಿಪ್ರಾಯಪಟ್ಟರು.



ಅಂಕಿತ ಪುಸ್ತಕ ಪ್ರಕಾಶನ ಹೊರ­ತಂದಿರುವ ವಿವಿಧ ಪುಸ್ತಕಗಳ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದ ಅವರು, ‘ಕನ್ನಡ ಅಥವಾ ಸರ್ಕಾರಿ ಶಾಲೆಗಳು ಎಂದರೆ ಕಳಪೆ ಎಂಬ ಭಾವನೆ ಜನರ­ಲ್ಲಿದೆ. ಇದನ್ನು ಬದಲಾಯಿಸುವ ನಿಟ್ಟಿ­ನಲ್ಲಿ ಸರ್ಕಾರ ಕನ್ನಡ ಶಾಲೆಗಳನ್ನು ಮೇಲ್ದರ್ಜೆಗೇರಿ­ಸಬೇಕು’ ಎಂದರು.



‘ಸುಪ್ರೀಂಕೋರ್ಟ್‌ ಕನ್ನಡ ಕಲಿಸಬೇಡಿ ಎಂದು ಹೇಳಿಲ್ಲ. ಮಾತೃಭಾಷೆಯೆಡೆಗೆ ಅಭಿಮಾನವನ್ನು ಬೆಳೆ­ಸುವ ನಿಟ್ಟಿನಲ್ಲಿ ಸರ್ಕಾರವೇ ಜಾಗೃತಿ ಕಾರ್ಯಕ್ರಮವನ್ನು ಮೂಡಿಸಬೇಕು. ಈ ಮೂಲಕ ಕನ್ನಡ ಭಾಷೆಯ ಅಸ್ತಿ­ತ್ವಕ್ಕೆ ಎದುರಾಗಿರುವ ಆಪತ್ತನ್ನು ನಿವಾರಿಸಬೇಕು’ ಎಂದು ಒತ್ತಾಯಿಸಿದರು.



‘ಸುಪ್ರೀಂ ಕೋರ್ಟ್‌ನ ಈ ತೀರ್ಪಿನಿಂದ ಕನ್ನಡ ಭಾಷೆಗೆ ದೊಡ್ಡ ಆತಂಕ ಎದುರಾಗಿದೆ. ತೀರ್ಪು ನೀಡುವಾಗ ಭಾಷಾ­­ವಾರು ಪ್ರಾಂತ್ಯ ರಚನೆ ಹಾಗೂ ಒಕ್ಕೂಟ ವ್ಯವಸ್ಥೆ ಪರಿಕಲ್ಪನೆಯನ್ನು ಪರಿಗಣಿಸಿಲ್ಲ. ಮಹಾತ್ಮಗಾಂಧೀಜಿ­ಯಿಂದ ಹಿಡಿದು ಶಿಕ್ಷಣತಜ್ಞರು ಮಂಡಿಸಿದ ಮಾತೃ­ಭಾಷಾ ಮಾಧ್ಯಮದ ನಿಲುವನ್ನು ಗೌರವಿಸಿಲ್ಲ. ಇದು ನಿಜಕ್ಕೂ ದುರದೃಷ್ಟ ಸಂಗತಿ’ ಎಂದು ಬೇಸರ ವ್ಯಕ್ತಪಡಿಸಿದರು.



‘ಒಂದೆಡೆ ಕನ್ನಡ ಸಾಹಿತ್ಯದೆಡೆಗೆ ಯುವ ಸಮೂಹ ತೀವ್ರ ನಿರ್ಲಕ್ಷ್ಯ ತೋರುತ್ತಿದೆ. ಇನ್ನೊಂದೆಡೆ ಐಟಿ ವಲಯ­ದಲ್ಲಿ ಹೊಸ ಓದುಗರು ಸೃಷ್ಟಿಯಾಗಿ­ದ್ದಾರೆ. ಎಲ್ಲ ಸವಾಲುಗಳನ್ನು ಮೆಟ್ಟಿ ನಿಲ್ಲುವ ದಿಕ್ಕಿನಲ್ಲಿ ಕನ್ನಡ ಸಾಹಿತ್ಯ  ಇರ­ಬೇಕಿದೆ’ ಎಂದು ತಿಳಿಸಿದರು.



ವೈದ್ಯ ಸಾಹಿತಿ ಡಾ.ನಾ. ಸೋಮೇಶ್ವರ, ‘ಹಲವು ಮಾನ­ಸಿಕ ಕ್ಲೇಶಗಳಿಗೆ ಪ್ರೀತಿಯ  ಕೊರತೆಯೇ ಕಾರಣ. ಸಮರ್ಪಕವಾಗಿ ಪ್ರೀತಿ ದೊರೆ­ಯದೇ ಹೋದರೆ ಬದುಕು ದುಸ್ತರ­ವಾಗುತ್ತದೆ. ಚಂದ್ರಶೇಖರ್‌ ಅವರು ಮಾನಸಿಕ ಸವಾಲುಗಳನ್ನು ಬಹಳವಾಗಿ ನಾಜೂಕಾಗಿ ಈ ಪುಸ್ತಕ­ದಲ್ಲಿ ಕಟ್ಟಿ­ಕೊಟ್ಟಿದ್ದಾರೆ’ ಎಂದು ಅಭಿಪ್ರಾಯಪಟ್ಟರು.



ಡಾ.ಜಿ.ಪುರುಷೋತ್ತಮ ಅವರ ‘ಮಾತಿನ ತೊಡಕು– ವಿಶ್ಲೇಷಣೆ ಮತ್ತು ಪರಿಹಾರ’, ಗಂಗಾಧರ ಬೆಳ್ಳಾರೆ ಅವರ ‘ಮೌನಗರ್ಭ’, ಡಾ.ಸಿ.ಆರ್. ಚಂದ್ರ­ಶೇಖರ್ ಅವರ ‘ಇಂದಿನ ಬದುಕಿನ ಮಾನ­ಸಿಕ ಸವಾಲುಗಳು’,  ವೈ.ಎನ್. ಗುಂಡೂರಾವ್ ಅವರು ಸಂಪಾದಿಸಿ

ರುವ ‘ರಾಮಾಯಣದ ಉಪಕಥೆಗಳು’,  ‘ಸಾಹಿತಿಗಳು ರಸಪ್ರಸಂಗಗಳು’ ಪುಸ್ತಕ­ಗಳನ್ನು ಬಿಡುಗಡೆ ಮಾಡಲಾಯಿತು.