ಶನಿವಾರ, ಮಾರ್ಚ್ 6, 2021
24 °C

ಕಲಾಕೃತಿಗಳ ಬಣ್ಣಗಳೇ ಮಾತಾದಾಗ...

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಕಲಾಕೃತಿಗಳ ಬಣ್ಣಗಳೇ ಮಾತಾದಾಗ...

ಬೆಂಗಳೂರು: ಅಲ್ಲಿನ ಕಲಾಕೃತಿಗಳನ್ನು ನೋಡಿ ನೆರೆದಿದ್ದವರ ಕಣ್ಣುಗಳೆಲ್ಲ ಆನಂದ ಭಾಷ್ಪದಿಂದ ತುಂಬಿ ಹೋಗಿ­ದ್ದವು. ಏಕೆಂದರೆ, ಅತ್ಯಾಕರ್ಷಕ ವರ್ಣ ಸಂಯೋಜನೆಯನ್ನು ಹೊಂದಿದ್ದ ಅಲ್ಲಿನ ಒಂದೊಂದು ಕಲಾಕೃತಿಯೂ ಒಬ್ಬೊಬ್ಬ ಅಂಗವಿಕಲ ಕಲಾ ಸಾಧಕರ ಕಥೆಯನ್ನು ಹೇಳುತ್ತಿತ್ತು. 



ಫೌಂಡೇಷನ್‌ ಫಾರ್‌ ಆರ್ಟ್‌ ಅಂಡ್‌ ಕಲ್ಚರ್‌ ಫಾರ್‌ ಡೆಫ್‌ ಸಂಘಟನೆ­ಯಿಂದ ನಗರದಲ್ಲಿ ಬುಧವಾರ ಏರ್ಪ­ಡಿಸಿದ್ದ ಮಹಿಳಾ ದಿನಾಚರಣೆ ಕಾರ್ಯ­ಕ್ರಮ ಅತ್ಯಂತ ಹೃದಯಸ್ಪರ್ಶಿ­ಯಾ­ಗಿತ್ತು. ಯಾವ ಕುಂಚಬ್ರಹ್ಮರ ಕಲಾ­ಕೃತಿ­ಗ­ಳಿಗೂ ಕಡಿಮೆ ಇಲ್ಲದಂತೆ ಅಂಗವಿಕಲರ ಕೃತಿಗಳು ಚಿತ್ರ ಕಾವ್ಯವಾಗಿ ಗೋಚರಿ­ಸುತ್ತಿದ್ದವು.



ನಾಡಿನ ಅಪೂರ್ವ ಚೇತನಗಳ ಈ ಸಾಧನೆಯನ್ನು ಕಣ್ಣಾರೆ ಕಂಡ ಹಿರಿಯ ಸಾಹಿತಿ ಕೋ. ಚೆನ್ನಬಸಪ್ಪ ಅವರ ಕಣ್ಣುಗಳು ಸಹ ಹನಿಗೂಡಿದವು. ಮಾತ­ನಾ­ಡುವಾಗ ಅವರ ಕಂಠ ಗದ್ಗಿತವಾ­ಯಿತು. ಸಭೆಯಲ್ಲಿ ಹೆಚ್ಚಾಗಿ ವಾಕ್‌–ಶ್ರವಣ ದೋಷ ಉಳ್ಳವರೇ ಪಾಲ್ಗೊಂ­ಡಿದ್ದರು.



ವೇದಿಕೆ ಮೇಲಿದ್ದವರು ಆಡಿದ ಮಾತುಗಳನ್ನು ಆಂಗಿಕ ಅಭಿನಯದ ಮೂಲಕ ಅವರಿಗೆ ತಿಳಿಸಿ ಹೇಳಲಾ­ಗುತ್ತಿತ್ತು. ಗಣ್ಯರು ಆಡಿದ ಮಾತುಗಳು ಸಂಜ್ಞೆಗಳ ಮೂಲಕ ಅರ್ಥವಾ­ಗುತ್ತಿ­ದ್ದಂತೆ ಅವರೆಲ್ಲ ಚಪ್ಪಾಳೆ ತಟ್ಟಿ ಸಂಭ್ರ­ಮಿಸುತ್ತಿದ್ದರು. ಬಹಳ ದಿನಗಳ ಬಳಿಕ ಭೇಟಿಯಾಗಿದ್ದ ಸ್ನೇಹಿತರೆಲ್ಲ ಸಂಜ್ಞೆಗಳ ಮೂಲಕವೇ ಸಂಭಾ­ಷಿಸುತ್ತಿದ್ದರು, ಹರಟೆ ಹೊಡೆಯುತ್ತಿದ್ದರು!



ಮಹಿಳಾ ದಿನದ ಅಂಗವಾಗಿ ಒಂಬತ್ತು ಜನ ಅಂಗವಿಕಲ ಸಾಧಕಿಯ­ರನ್ನು ಸನ್ಮಾನಿಸಲಾಯಿತು.

ಬಿ.ಡಿ. ಸುಮಾ (ಅಂಧರು, ನೃತ್ಯ ಕಲಾವಿದೆ), ಎಂ.ಆರತಿ (ಪೋಲಿಯೊಪೀ­ಡಿತರು, ಹಿರಿಯ ನಾಗರಿಕರ ಆರೈಕೆ), ಮುನಿರತ್ನಮ್ಮ (ಅಂಧರು, ಉಪ­ನ್ಯಾ­ಸಕಿ), ಕೆ. ಶ್ರೀದೇವಿ (ಪೋಲಿಯೊ­ಪೀಡಿ­ತರು, ಫ್ರೆಂಚ್‌ ಸೇರಿದಂತೆ ಹಲವು ಭಾಷೆ­ಗಳ ತಜ್ಞೆ), ಎನ್‌. ಸಾವಿತ್ರಿ (ಮೂಗರು, ಚಿತ್ರಕಲಾವಿದೆ), ಸುನೀಲಾ ಹಿರೇಮಠ (ಕುಬ್ಜರು, ಅಂಗವಿಕಲರಿಗೆ ನೆರವು) ಎನ್‌.­ಮಮತಾ (ಅಂಗವಿಕ­ಲರು, ಅಬ­ಕಾರಿ ಇಲಾಖೆ ಉದ್ಯೋಗಿ), ನಾಗರತ್ನ ಭಟ್‌ (ಅಂಧರು, ಅಂಗವಿ­ಕಲರಿಗೆ ಆಪ್ತ ಸಮಾಲೋಚ­ಕರು) ಹಾಗೂ ಅನುಷಾ (ಆಟಿಸಂನಿಂದ ಬಳ­ಲು­ತ್ತಿರುವವರು, ಗಾಯಕಿ) ಅವರೇ ಸನ್ಮಾನಿತರು.

ಸನ್ಮಾನಿತರ ಪರವಾಗಿ ಮಾತನಾ­ಡಿದ ಶ್ರೀದೇವಿ, ‘ನಾವು ಅಂಗವಿಕಲರು ಎಂದು­ಕೊಳ್ಳುತ್ತಾ ಗಾಯ ಕೆರೆದುಕೊ­ಳ್ಳು­ವುದು ಏಕೆ’ ಎಂದು ಪ್ರಶ್ನಿಸಿದರು. ‘ಸಿಕ್ಕ ಅವಕಾಶ­ಗಳಲ್ಲೇ ಸಾಧನೆ ಮಾಡೋಣ. ಸ್ವಂತ ಕಾಲ ಮೇಲೆ ನಿಲ್ಲೋಣ’ ಎಂದು ಹುರಿದುಂಬಿಸಿದರು.



‘ದೇಶದ ಶೇ 5ರಷ್ಟು ಜನ ಮಾತ್ರ ಅಂಗವಿಕಲರು. ಮಿಕ್ಕ ಶೇ 95ರಷ್ಟು ಜನ ಒಟ್ಟಾಗಿ ಅವರ ಬದುಕಿನಲ್ಲಿ ಸಂತಸ ಮೂಡಿಸುವುದು ಸಾಧ್ಯವಿಲ್ಲವೇ’ ಎಂದು ಕೋ.ಚೆನ್ನಬಸಪ್ಪ ಕೇಳಿದರು. ‘ಅಂಗವಿ­ಲಕರಿಗೆ ಅನುಕಂಪದ ಅಗತ್ಯ ಇಲ್ಲ. ಅವರಿಗೆ ಆತ್ಮ ವಿಶ್ವಾಸ ತುಂಬಿಸುವ ಕೆಲಸ ಮಾಡಿದರೆ ಸಾಕು’ ಎಂದು ಹೇಳಿದರು.



ಮತ್ತೊಬ್ಬ ಮುಖ್ಯ ಅತಿಥಿ ಪ್ರಮೀಳಾ ನೇಸರ್ಗಿ, ‘ಅಂಗವಿಕಲರಿಗೆ ಚುನಾವಣೆ­ಯಲ್ಲೂ ಮೀಸಲಾತಿ ಸೌಲಭ್ಯ ಸಿಗ­ಬೇಕಿದ್ದು, ಅದಕ್ಕಾಗಿ ನಾವೆಲ್ಲ ಹೋರಾಡಬೇಕಿದೆ’ ಎಂದು ತಿಳಿಸಿದರು.



‘ವೈಟ್‌ಫೀಲ್ಡ್‌ನಲ್ಲಿ ನಾನು ಕಲಾ ಗ್ಯಾಲರಿಯೊಂದನ್ನು ನಿರ್ಮಿಸುತ್ತಿದ್ದು, ಅದ­ರಲ್ಲಿ ಅಂಗವಿಕಲರಿಗಾಗಿಯೇ ವಿಶೇಷ ವಿಭಾಗ ತೆರೆಯಲಿದ್ದೇನೆ’ ಎಂದು ಭರವಸೆ ನೀಡಿದರು. ಹಿರಿಯ ಕಲಾವಿದೆ ಲಕ್ಷ್ಮಿ ಚಂದ್ರಶೇಖರ್, ಚಿತ್ರ ನಿರ್ದೇಶಕ ಸುನಿ, ಸಂಘಟನೆಯ ಎಸ್‌. ಉಮೇಶ್‌ ಮತ್ತು ಎಸ್‌.ಗಿರಿಜಾ ಹಾಜರಿದ್ದರು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.