ಕಲಾವಿದರ ಅಭಿನಂದನೆಗಾಗಿ ಕಲಾ ಗ್ಯಾಲರಿ ಉದ್ಘಾಟನೆ

ಬೆಂಗಳೂರು: ‘ದಕ್ಷಿಣ ಭಾರತದ ಕಲಾ­ವಿದರಿಗೆ ಕೇಂದ್ರ ಲಲಿತಕಲಾ ಅಕಾ­ಡೆಮಿಯ ವಾರ್ಷಿಕ ಕಲಾ ಪ್ರಶಸ್ತಿ ಬರು­ವುದು ಅಪರೂಪ. ದೀರ್ಘ ಕಾಲದ ನಂತರ ಈ ಪ್ರಶಸ್ತಿ ಪಡೆದ ರಾಜ್ಯದ ಕಲಾ­ವಿದ­ರನ್ನು  ಅಭಿನಂದಿಸುವ ನೆಪ­ದಲ್ಲಿ ಕಲಾ ಗ್ಯಾಲರಿ ಉದ್ಘಾಟಿಸು­ತ್ತಿ­ರು­ವುದು ಪ್ರಶಂಸ­ನೀಯ’ ಎಂದು ಹಿರಿಯ ಕಲಾವಿದ ಎಸ್‌.ಜಿ. ವಾಸುದೇವ್ ಸಂತಸ ವ್ಯಕ್ತಪಡಿಸಿದರು.



ಕೇಂದ್ರ ಲಲಿತಕಲಾ ಅಕಾಡೆಮಿಯ ೨೦೧೪ನೇ ಸಾಲಿನ ವಾರ್ಷಿಕ ಕಲಾ ಪ್ರಶಸ್ತಿ ಪಡೆದಿರುವ ರಾಜ್ಯದ ಕಲಾ­ವಿದ­ರನ್ನು ಅಭಿನಂದಿಸುವ ಸಲುವಾಗಿ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಹಾಗೂ ಕರ್ನಾಟಕ ಲಲಿತಕಲಾ ಅಕಾ­ಡೆ­ಮಿಯ ಸಹಯೋಗದಲ್ಲಿ ಶನಿ­ವಾರ ಏರ್ಪ­ಡಿಸಿದ್ದ ಕಾರ್ಯಕ್ರಮದಲ್ಲಿ  ಕನ್ನಡ ಭವನದ ‘ವರ್ಣ’ ಕಲಾ ಗ್ಯಾಲರಿ­ಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು.



‘ಕನ್ನಡ ಭವನದಲ್ಲಿರುವ ಅಕಾ­ಡೆಮಿ­ಗಳ ವಾತಾವರಣ ಕಚೇರಿ­ಯಂತಿ­ರ­ಬಾ­ರದು. ಇಲ್ಲೆಲ್ಲಾ ಕಲೆ ಮತ್ತು ಸಂಸ್ಕೃ­ತಿಯ ಅಂಶಗಳು ಪ್ರತಿಬಿಂಬಿಸಬೇಕು’ ಎಂದರು. ಕರ್ನಾಟಕ ಲಲಿತಕಲಾ ಅಕಾ­ಡೆಮಿಯ ಅಧ್ಯಕ್ಷ ಡಾ.ಎಂ.ಎಸ್. ಮೂರ್ತಿ, ‘ಸಾಂಪ್ರದಾಯಿಕ ಕಲಾ ಪ್ರಕಾರ ಮತ್ತು ಕಲಾ ಮಾಧ್ಯಮವನ್ನು ಹೊಸ ತಲೆಮಾರಿನ ಕಲಾವಿದರಿಗೆ ದಾಟಿ­ಸು­ವಲ್ಲಿ ಹಿರಿಯ ಕಲಾವಿದರು ವಿಫಲ­ರಾಗಿದ್ದೇವೆ. ಕಲೆಯ ಪರಿಕಲ್ಪನೆ­ಗಳನ್ನು ಬಳಸಿಕೊಂಡು ಸಾಹಿತ್ಯ ಜನ­ಸಾಮಾನ್ಯ­ರನ್ನು ತಲುಪಿದ್ದರೂ, ಕಲೆ ಮಾತ್ರ ಗ್ಯಾಲರಿಗಳಲ್ಲೇ ಉಳಿದಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು.



‘ತಾವು ಏನನ್ನು, ಯಾವ ಕಾರಣ­ದಿಂದ ಮತ್ತು ಯಾರಿಗಾಗಿ ಕಲಾ­ಕೃತಿ­ಗಳನ್ನು ರಚಿಸುತ್ತಿದ್ದೇವೆ ಎಂದು ಕಲಾ­ವಿದರು ಚಿಂತಿಸಿದಾಗ ಮಾತ್ರ ಕಲೆ­ಯನ್ನು ಜನರ ಬಳಿ ಕೊಂಡೊಯ್ಯಲು ಸಾಧ್ಯ’ ಎಂದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಿರ್ದೇಶಕ ಕೆ.ಎ.ದಯಾನಂದ, ‘ಕನ್ನಡ ಭವನದ ಒಳ ಆವರಣವನ್ನು ಚಿತ್ರ ಕಲಾಕೃತಿಗಳಿಂದ ಅಲಂಕರಿಸುವ ಮತ್ತು ಆವರಣದಲ್ಲಿ ಸದಾ ಸಂಗೀತ ಕೇಳಿಸುವ ವ್ಯವಸ್ಥೆ ಮಾಡಲಾಗುತ್ತದೆ’ ಎಂದರು.



ಕೇಂದ್ರ ಲಲಿತಕಲಾ ಅಕಾಡೆಮಿಯ ೨೦೧೪ನೇ ಸಾಲಿನ ವಾರ್ಷಿಕ ಕಲಾ ಪ್ರಶಸ್ತಿ ವಿಜೇತ ಕಲಾವಿದರಾದ ಮಹಮ್ಮದ್ ಅಯಾಜುದ್ದಿನ್ ಪಟೇಲ್, ಶ್ರೀನಿವಾಸ ರೆಡ್ಡಿ.ಎನ್ ಮತ್ತು ಸಂಜೀವ್ ರಾವ್ ಗುಪ್ತ ಅವ­ರನ್ನು ಕಾರ್ಯಕ್ರಮದಲ್ಲಿ ಅಭಿನಂದಿಸ­ಲಾಯಿತು. ವರ್ಣ ಗ್ಯಾಲರಿಯಲ್ಲಿ ಏರ್ಪ­ಡಿಸಿರುವ ಈ ಮೂವರು ಕಲಾವಿದರ ಕಲಾಕೃತಿಗಳ ಪ್ರದರ್ಶನವು ಮೇ ೨೬ರವರೆಗೆ ನಡೆಯಲಿದೆ.