ಮಂಗಳವಾರ, ಅಕ್ಟೋಬರ್ 22, 2019
26 °C

ಕೂಡುಂಕುಳಂ: ಮಾಹಿತಿ ವಿನಿಮಯ ಅಸಾಧ್ಯ- ಶ್ರೀಕುಮಾರ್ ಬ್ಯಾನರ್ಜಿ

Published:
Updated:

ಭುವನೇಶ್ವರ: `ತಮಿಳುನಾಡಿನ ಕೂಡುಂಕುಳಂ ಅಣು ಸ್ಥಾವರ ವಿರೋಧಿಸಿ ಪ್ರತಿಭಟನೆ ನಡೆಸುತ್ತಿರುವವರಿಗೆ ಪರಮಾಣು ಸುರಕ್ಷೆಗಿಂತ ಹೆಚ್ಚಾಗಿ ಸರ್ಕಾರದ ವರ್ಗೀಕೃತ ಮಾಹಿತಿಯೇ ಮುಖ್ಯವಾದಂತಿದೆ.



ಪ್ರತಿಭಟನಾಕಾರರು, ಕೂಡುಂಕುಳಂ ಯೋಜನೆಗೆ ಸಂಬಂಧಿಸಿದಂತೆ ಭಾರತ ಹಾಗೂ ರಷ್ಯಾ ನಡುವಿನ ಒಪ್ಪಂದದ ಪ್ರತಿಗಳನ್ನು ಹಾಗೂ ಮಾಹಿತಿಗಳನ್ನು  ಕೇಳುತ್ತಿದ್ದಾರೆ. ಆದರೆ ಇವುಗಳನ್ನು ವಿನಿಮಯ ಮಾಡಿಕೊಳ್ಳಲಾಗದು~ ಎಂದು ಪರಮಾಣು ಇಂಧನ ಆಯೋಗದ ಅಧ್ಯಕ್ಷ ಶ್ರೀಕುಮಾರ್ ಬ್ಯಾನರ್ಜಿ ಹೇಳಿದ್ದಾರೆ.



ಪರಮಾಣು ಸುರಕ್ಷೆಗೆ ಆಯೋಗವು ಸಾಕಷ್ಟು ಮಹತ್ವ ನೀಡಿದೆ. ಅಲ್ಲದೆ ಈ ವಿಷಯಕ್ಕೆ ಸಂಬಂಧಿಸಿದಂತೆ ಚರ್ಚೆಗೂ ಸಿದ್ಧವಿದೆ. ಆದರೆ ಕೆಲವೊಂದು ಮಾಹಿತಿಗಳು ಸರ್ಕಾರದೊಳಗೇ ಇರುವಂಥವು. ಅವುಗಳನ್ನು ಯಾವುದೇ ಕಾರಣಕ್ಕೂ ವಿನಿಮಯ ಮಾಡಿಕೊಳ್ಳಲು ಸಾಧ್ಯವಿಲ್ಲ ಎಂದು ಬ್ಯಾನರ್ಜಿ ಸ್ಪಷ್ಟಪಡಿಸಿದರು.



ಪ್ರಧಾನಿ ಮನಮೋಹನ್ ಸಿಂಗ್ ಅವರು ರಚಿಸಿರುವ 15 ಸದಸ್ಯರನ್ನೊಳಗೊಂಡ ತಜ್ಞರ ಸಮಿತಿ ಕೂಡ ಈ ಮಾಹಿತಿ ನೀಡಲು ಸಾಧ್ಯವಿಲ್ಲ ಎಂದು ಹೇಳಿದೆ. ಅಲ್ಲದೆ ಸಮಿತಿಯು ಕೂಡುಂಕುಳಂ ಸುರಕ್ಷೆ ಹಾಗೂ ಸಂಭವನೀಯ ಆರೋಗ್ಯ ಪರಿಣಾಮಗಳ ಬಗ್ಗೆ ಸ್ಥಳೀಯರು ಮತ್ತು ಸರ್ಕಾರದ ಪ್ರತಿನಿಧಿಗಳ ಜತೆ ಸಮಾಲೋಚನೆ ನಡೆಸಿದೆ. ಆದರೆ ಇದೀಗ ಪ್ರತಿಭಟನಾಕಾರರು ಯೋಜನೆಗೆ ಸಂಬಂಧಿಸಿದಂತೆ ಸರ್ಕಾರದ ವರ್ಗೀಕೃತ ಮಾಹಿತಿಯ ಮೇಲೆ ಕಣ್ಣಿಟ್ಟಂತಿದೆ ಎಂದು ಬ್ಯಾನರ್ಜಿ ಆರೋಪಿಸಿದರು.



40 ವರ್ಷಗಳ ಹಿಂದೆ ತಾರಾಪುರ ಮರಳು ದಿಣ್ಣೆಯಾಗಿತ್ತು. ಇಲ್ಲಿ ಹುಲ್ಲು ಕೂಡ ಬೆಳೆಯುತ್ತಿರಲಿಲ್ಲ. ಆದರೆ ಪರಮಾಣು ಸ್ಥಾವರದಿಂದಾಗಿ ಅದು ಉಪನಗರವಾಗಿ ಮಾತ್ರವಲ್ಲ; ಕೈಗಾರಿಕಾ ನಗರ ಎಂಬ ಅಭಿದಾನಕ್ಕೂ ಪಾತ್ರವಾಗಿದೆ ಎಂದು ಹೇಳುವ ಮೂಲಕ ಬ್ಯಾನರ್ಜಿ ಕೂಡುಂಕುಳಂ ಯೋಜನೆಯ ಮಹತ್ವವನ್ನು ಬಿಚ್ಚಿಟ್ಟರು.

ಕೂಡುಂಕುಳಂ ಪ್ರತಿಭಟನಾಕಾರರು ಹಾಗೂ ಸಮಿತಿ ಮಧ್ಯೆ ಮುಂದಿನ ಸುತ್ತಿನ ಮಾತುಕತೆ ಇದೇ ತಿಂಗಳ 14-15 ರಂದು ನಡೆಯಲಿದೆ.

 

ಚುನಾವಣಾ ಫಲಿತಾಂಶ 2019 | ಹರಿಯಾಣ ಮತ್ತು ಮಹಾರಾಷ್ಟ್ರ ವಿಧಾನಸಭೆ 2019 ಚುನಾವಣೆಗೆ ಸಂಬಂಧಿಸಿದ ಸಮಗ್ರ ಸುದ್ದಿ, ಮಾಹಿತಿ, ವಿಶ್ಲೇಷಣೆ ಇಲ್ಲಿ ಲಭ್ಯ.

ಮಹಾರಾಷ್ಟ್ರ ವಿಧಾನಸಭೆಯ ಫಲಿತಾಂಶಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ

ಹರಿಯಾಣ ವಿಧಾನಸಭೆಯ ಫಲಿತಾಂಶಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ

Post Comments (+)