ಕೃಷ್ಣಾ ನದಿಗೆ ಸೇತುವೆ ನಿರ್ಮಿಸಲು ಆಗ್ರಹ

ಯಾದಗಿರಿ: ದೇವರ ದರ್ಶನ ಸಿಗು­ವುದು ಸುಲಭವಲ್ಲ. ಅದಕ್ಕಾಗಿ ಕಠಿಣ ತಪಸ್ಸು ಮಾಡಬೇಕು ಎಂದೆಲ್ಲ ಹೇಳ­ಲಾಗುತ್ತದೆ. ಜಿಲ್ಲೆಯ ಗಡ್ಡೆಬಸವೇಶ್ವರ ಭಕ್ತರಿಗೆ ಮಾತ್ರ ಇದು ಅಕ್ಷರಶಃ ನಿಜ ಎನ್ನುವಂತಾಗಿದೆ.



ಜಿಲ್ಲೆಯ ಶಹಾಪುರ ತಾಲ್ಲೂಕಿನ ಕೋಡಾಲ ಗ್ರಾಮದ ಗಡ್ಡೆಬಸವೇಶ್ವರ ದೇವಸ್ಥಾನಕ್ಕೆ ತೆರಳಲು ಭಕ್ತರಿಗೆ ತೆಪ್ಪವೇ ಗತಿಯಾಗಿದೆ. ಕೃಷ್ಣಾ ನದಿ­ಯಲ್ಲಿ ಇರುವ ದೇವಸ್ಥಾನಕ್ಕೆ ಹೋಗಲು ಭಕ್ತರು ತೆಪ್ಪವನ್ನು ಅವಲಂಬಿ­ಸಬೇಕಾಗಿದೆ.



ಕೋಡಾಲ ಗ್ರಾಮದ ಪಕ್ಕದಲ್ಲಿಯೇ ಕೃಷ್ಣಾ ನದಿ ಹರಿಯುತ್ತದೆ. ಇಲ್ಲಿ ನಡುಗಡ್ಡೆಯೊಂದು ನಿರ್ಮಾಣ­ವಾಗಿದ್ದು, ಈ ನದಿಯು ಇಬ್ಭಾಗವಾಗಿ ಹರಿಯುತ್ತಿದೆ. ಈ ನಡುಗಡ್ಡೆಯಲ್ಲಿ ಪುರಾತನ ಗಡ್ಡೆಬಸವೇಶ್ವರ ದೇವಸ್ಥಾನ­ವಿದೆ. ನಡುಗಡ್ಡೆಯಲ್ಲಿ ದೇವಸ್ಥಾನ ಇರುವುದರಿಂದ ಗಡ್ಡೆ ಬಸವೇಶ್ವರ ಎಂಬ ಹೆಸರು ಬಂದಿದೆ ಎಂದು ಭಕ್ತರು ಹೇಳುತ್ತಾರೆ.



ದೇವಸ್ಥಾನದ ಎರಡು ಬದಿಯಲ್ಲಿ ಕೃಷ್ಣಾ ನದಿಯು ಭೋರ್ಗರಿಯುತ್ತದೆ. ಈ ದೇವಸ್ಥಾನಕ್ಕೆ ಬರುವ ಭಕ್ತಾದಿಗಳ ಅನುಕೂಲಕ್ಕಾಗಿ ನದಿಗೆ ಅಡ್ಡಲಾಗಿ ಸೇತುವೆ ನಿರ್ಮಾಣ ಆಗಿಲ್ಲ. ಹೀಗಾಗಿ ಭಕ್ತರೆಲ್ಲರೂ ದೇವಸ್ಥಾನಕ್ಕೆ ಹೋಗ­ಬೇಕಾದರೆ ತೆಪ್ಪವನ್ನು ಉಪಯೋಗಿ­ಸುವುದು ಅನಿವಾರ್ಯವಾಗಿದೆ. ಇದ­ರಿಂದ ಭಕ್ತರು ಅನೇಕ ಸಮಸ್ಯೆಯನ್ನು ಎದುರಿಸಬೇಕಾಗಿದೆ ಎಂದು ಗ್ರಾಮಸ್ಥರು ಹೇಳುತ್ತಾರೆ.



ಕೃಷ್ಣಾ ನದಿಯಲ್ಲಿ ಬಹಳಷ್ಟು ಮೊಸಳೆ­ಗಳಿವೆ. ಪ್ರತಿ ವರ್ಷ ಬೇಸಿಗೆ­ಯಲ್ಲಿ ಮೊಸಳೆಗಳು ದನ ಕರುಗಳಿಗೆ ಹಾಗೂ ಮನುಷ್ಯರಿಗೆ ತೊಂದರೆ ಮಾಡಿವೆ. ತೆಪ್ಪದಲ್ಲಿ ಕುಳಿತು ನದಿ­ಯನ್ನು ದಾಟುವಾಗ ಏನಾದರೂ ಅನಾಹುತವಾದರೆ, ಜೀವ ಹಾನಿಯಾ­ಗ­ಬಹುದು. ಈ ಹಿನ್ನೆಲೆಯಲ್ಲಿ ನದಿಗೆ ಸೇತುವೆ ನಿರ್ಮಾಣ ಮಾಡುವಂತೆ ಜಿಲ್ಲಾಡಳಿತಕ್ಕೆ ಅನೇಕ ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನ­ವಾಗಿಲ್ಲ ಎಂದು ಭೀಮು ಕೋಡಾಲ ಹೇಳುತ್ತಾರೆ.



ಪ್ರತಿವರ್ಷ ಫೆಬ್ರುವರಿ ತಿಂಗಳಲ್ಲಿ ಗಡ್ಡೆ ಬಸವೇಶ್ವರರ ಜಾತ್ರಾ ಮಹೋ­ತ್ಸವ ನಡೆಯುತ್ತದೆ. ಈ ಜಾತ್ರೆಗೆ ಸುತ್ತಲಿನ ಗ್ರಾಮಸ್ಥರಲ್ಲದೇ, ಪಕ್ಕದ ಜಿಲ್ಲೆಯಾದ ರಾಯಚೂರು, ಗುಲ್ಬರ್ಗ ಹಾಗೂ ನೆರೆ ರಾಜ್ಯಗ­ಳಿಂದಲೂ ಭಕ್ತರು ಬರುತ್ತಾರೆ. ನದಿಗೆ ಅಡ್ಡಲಾಗಿ ಸೇತುವೆ ಇಲ್ಲದೇ ಇರುವುದರಿಂದ ಇವರೆಲ್ಲರೂ ತೆಪ್ಪ­ದಲ್ಲಿ ಕುಳಿತು ನದಿಯನ್ನು ದಾಟಬೇಕು. ನಂತರವಷ್ಟೇ ದೇವರ ದರ್ಶನ ಮಾಡಬೇಕು ಎಂದು ಹೇಳುತ್ತಾರೆ.

ಜನಪ್ರತಿನಿಧಿಗಳು ಹಾಗೂ ಜಿಲ್ಲಾಡ­ಳಿತ ಇತ್ತ ಗಮನ ಹರಿಸಬೇಕು. ಗಡ್ಡೆ­ಬಸವೇಶ್ವರ ದೇವಸ್ಥಾನಕ್ಕೆ ಹೋಗುವ ಮಾರ್ಗದಲ್ಲಿ ಕೃಷ್ಣಾ ನದಿಗೆ ಅಡ್ಡಲಾಗಿ ಸೇತುವೆಯನ್ನು ನಿರ್ಮಾಣ ಮಾಡ­ಬೇಕು. ಇದರಿಂದ ಭಕ್ತರಿಗೆ ಅನುಕೂಲ­ವಾಗುತ್ತದೆ ಎಂದು ಆಗ್ರಹಿಸಿದ್ದಾರೆ.