ಕೈಗಡಿಯಾರದಲ್ಲಿತ್ತು ಚಿನ್ನ!

ಮಂಗಳೂರು: ದುಬೈನಿಂದ ಕಳ್ಳಸಾಗಣೆ­ಯಾದ 1 ಕೆ.ಜಿ ಚಿನ್ನದ ಗಟ್ಟಿ ಹಾಗೂ ಕೈಗಡಿ­ಯಾರದಲ್ಲಿ ಅಡಗಿಸಿ ತಂದ 117 ಗ್ರಾಂ ಚಿನ್ನವನ್ನು ಮಂಗ­ಳೂರಿನ ಅಂತರ­ರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್‌ ಅಧಿಕಾರಿಗಳು ಬುಧವಾರ ವಶಪಡಿಸಿಕೊಂಡಿದ್ದಾರೆ.



ಚಿನ್ನ ಕಳ್ಳಸಾಗಣೆ ಮಾಡಿದ ಆರೋಪಿ ಕಾಸರಗೋಡು ಜಿಲ್ಲೆಯ ಪಲ್ಲಿಂಡ­ಕುಕ್ಕಲ್‌ನ ಮುಹಮ್ಮದ್‌ ಮುಸ್ತಾಫ ಎರಿಯಪಾಡಿ ಎಂಬಾತ­ನನ್ನು ಬಂಧಿಸ­ಲಾಗಿದೆ. ಆತನಿಂದ ವಶಪಡಿಸಿಕೊಂಡ ಚಿನ್ನದ ಒಟ್ಟು ಮೌಲ್ಯ ₨ 34.58 ಲಕ್ಷ ಎಂದು ಅಂದಾಜಿಸಲಾಗಿದೆ.



ದುಬೈನಿಂದ ಬೆಳಿಗ್ಗೆ 7.30ಕ್ಕೆ ಬಂದ ಏರ್‌ ಇಂಡಿಯ ಎಕ್ಸ್‌ಪ್ರೆಸ್‌ ಐಎಕ್ಸ್‌ 814 ವಿಮಾನದಲ್ಲಿ ಆರೋಪಿ ಪ್ರಯಾ­ಣಿಸಿದ್ದ. ಮಂಗಳೂರು ವಿಮಾನ ನಿಲ್ದಾಣ­ದಲ್ಲಿ ತಪಾಸಣೆಗೆ ಒಳಪಡಿಸಿ­ದಾಗ ಆತನ ಬಳಿ 1 ಕೆ.ಜಿ ಚಿನ್ನದ ಗಟ್ಟಿ ಪತ್ತೆಯಾಯಿತು.



ಅದಕ್ಕಾಗಿ ಯಾವುದೇ ಅಧಿಕೃತ ದಾಖಲೆಗಳನ್ನು ಹೊಂದಿರಲಿಲ್ಲ. ಆತ ಧರಿಸಿದ್ದ ಕೈಗಡಿಯಾರದಲ್ಲೂ 117 ಗ್ರಾಂ ಚಿನ್ನವನ್ನು ಅಡಗಿಸಿಟ್ಟಿದ್ದು ಕಂಡು ಬಂತು.



‘ಕೈಗಡಿಯಾರದೊಳಗೆ ಚಿನ್ನವನ್ನು ಅಡಗಿಸಿ ತಂದ ಪ್ರಕರಣ ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಪತ್ತೆಯಾಗಿ­ರುವುದು ಇದೇ ಮೊದಲು. ಅಚ್ಚರಿ ಎಂದರೆ, ಕೈಗಡಿಯಾರದ ಒಳಗಡೆ ಸಣ್ಣ ಯಂತ್ರವನ್ನು ಅಳವಡಿಸಿ, ಅದು ಸಮರ್ಪ­ಕವಾಗಿ ಸಮಯವನ್ನು ತೋರಿಸುವಂತೆ ರೂಪಿಸಲಾಗಿತ್ತು.



ಕೈಗಡಿಯಾರದ ಒಳಗಿನ ಯಂತ್ರವನ್ನು ತೆಗೆದು ಅದರ ಒಳಗೆ ಬೆಳ್ಳಿ ಲೇಪಿತ ಚಿನ್ನವನ್ನು ಅಡಗಿಸಿಟ್ಟಿದ್ದರು. ಚಿನ್ನವನ್ನು ಕಳ್ಳಸಾಗಣೆ ಮಾಡಲು ಅನು­ಕೂಲ­ವಾಗು­ವಂತೆ ಮಾರ್ಪಡಿಸು­ವಂತಹ ವ್ಯವಸ್ಥಿತ ಜಾಲ ಇಲ್ಲದೇ ಇಂತಹ ಕೃತ್ಯ ನಡೆಸಲು ನಡೆಸಲು ಅಸಾಧ್ಯ’ ಎಂದು ಕಸ್ಟಮ್ಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.