ಸೋಮವಾರ, ಏಪ್ರಿಲ್ 19, 2021
25 °C

ಕ್ರಿಮಿನಲ್ ಕೇಸ್ ಮುಟ್ಟದ ಜಗದೀಶ ಶೆಟ್ಟರ್

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಹುಬ್ಬಳ್ಳಿ: `ಕ್ರಿಮಿನಲ್ ಕೇಸ್‌ಗಳ ತಂಟೆಗೆ ಹೋಗದ ಜಗದೀಶ ಶೆಟ್ಟರ್ ಯಾವಾಗಲೂ ಸಿವಿಲ್ ಪ್ರಕರಣಗಳನ್ನೇ ಆರಿಸಿಕೊಳ್ಳುತ್ತಿದ್ದರು. ಕೆಲಸದ ಮೇಲಿನ ಶ್ರದ್ಧೆ ಹಾಗೂ ಸಮರ್ಪಣಾಭಾವ ಅವರಿಗೆ ಒಳ್ಳೆಯ ಹೆಸರು ತಂದಿತ್ತು~



-ನಿಯೋಜಿತ ಮುಖ್ಯಮಂತ್ರಿ ಜಗದೀಶ ಶೆಟ್ಟರ್ ಅವರಿಗೆ ವಕೀಲಿ ವೃತ್ತಿಯಲ್ಲಿ ಮಾರ್ಗದರ್ಶನ ಮಾಡಿದ ಹಿರಿಯರಲ್ಲಿ ಒಬ್ಬರಾದ ಬಿ.ವಿ. ಪಾವಟೆ ಹೇಳುವ ಮಾತುಗಳಿವು.



`ಶೆಟ್ಟರ್ ಕೋರ್ಟ್ ಅಂಗಳದಲ್ಲಿ ಕರಿಕೋಟು ಹಾಕಿಕೊಂಡು ಕಾಲಿಡುವ ಹೊತ್ತಿಗೆ ಅವರ ತಂದೆ ಶಿವಪ್ಪ ಹೆಸರು ಮಾಡಿದ ವಕೀಲರಾಗಿದ್ದರು. ಹೀಗಾಗಿ  ವಕೀಲಿ ವೃತ್ತಿಯಲ್ಲಿ ನೆಲೆ ಕಂಡುಕೊಳ್ಳುವುದು ಅವರಿಗೆ ಅಷ್ಟೇನೂ ಕಷ್ಟವಾಗಲಿಲ್ಲ~ ಎಂದು ಅವರು ಹೇಳುತ್ತಾರೆ.

 

`ತಂದೆ ಶಿವಪ್ಪನವರೇ ಅವರಿಗೆ ಮೊದಲ ಕಾನೂನು ಗುರುವಾಗಿದ್ದರು. ನಾವೆಲ್ಲ ಅವರ ಸ್ನೇಹಿತರಷ್ಟೇ. ಪ್ರಸಂಗ ಬಂದಾಗ ಅಭಿಪ್ರಾಯ ಹಂಚಿಕೊಳ್ಳುತ್ತಿದ್ದೆವು~ ಎಂದು ವಿವರಿಸುತ್ತಾರೆ ಪಾವಟೆ.



`ನಮ್ಮದೊಂದು ಗೆಳೆಯರ ಬಳಗ ಇತ್ತು. ಅವರೆಲ್ಲರ ಜೊತೆ ಜಗದೀಶ ಸಲಿಗೆ ಹೊಂದಿದ್ದರು. ವೃತ್ತಿ ಸಂಬಂಧವಾಗಿ ಏನಾದರೂ ಗೊಂದಲ ಉಂಟಾದಾಗ, ಕಾಯ್ದೆ ಹಾಗೂ ತರ್ಕದ ವಿಷಯ ಬಂದಾಗ ನಮ್ಮಂದಿಗೆ ಚರ್ಚಿಸುತ್ತಿದ್ದರು. ಅವರ ಅವಧಿಯಲ್ಲಿ `ಶೆಟ್ಟರ್ ಆ್ಯಂಡ್ ಅಸೋಸಿಯೇಟ್ಸ್~ ವಕೀಲರ ಕಚೇರಿ ಪ್ರವರ್ಧಮಾನಕ್ಕೆ ಬಂತು~ ಎಂದು ಅವರು ಸ್ಮರಿಸುತ್ತಾರೆ.



`ನಿತ್ಯ ಸ್ಕೂಟರ್ ಮೇಲೆ ಬರುತ್ತಿದ್ದರು. ಎಲ್ಲವನ್ನೂ ವಿನೀತವಾಗಿ ಕೇಳುತ್ತಿದ್ದರು. ಬಿಡುವಿದ್ದಾಗ ಬೇರೆ ಕುತೂಹಲಕಾರಿ ಪ್ರಕರಣಗಳ ಬಗೆಗೂ ತಿಳಿದುಕೊಳ್ಳುತ್ತಿದ್ದರು. ಹಿರಿಯರನ್ನು ಯಾವಾಗಲೂ ಪ್ರೀತಿ-ಗೌರವದಿಂದಲೇ ಮಾತನಾಡಿಸುತ್ತಿದ್ದರು. ಬಡವ-ಬಲ್ಲಿದ ಎನ್ನುವ ತಾರತಮ್ಯವನ್ನು ಅವರೆಂದೂ ಮಾಡಲಿಲ್ಲ~ ಎಂದು ಅವರು ತಿಳಿಸುತ್ತಾರೆ.



`1994ರಲ್ಲಿ ಮೊದಲ ಸಲ ಶಾಸಕರಾಗಿ ಆಯ್ಕೆ ಆಗುವವರೆಗೂ ಕೋರ್ಟ್ ಅಂಗಳದಲ್ಲಿ ಅವರು ನಿತ್ಯ ಕಾಣುತ್ತಿದ್ದರು. ಶಾಸಕರಾದ ಮೇಲೂ ಅವರು ಬಂದಿದ್ದಿದೆ. ಆಮೇಲೆ ಕಾರ್ಯದ ಒತ್ತಡದಿಂದ ಇತ್ತ ಬರುವುದು ಕಡಿಮೆಯಾಗಿದೆ~ ಎನ್ನುತ್ತಾರೆ ಅವರು.



ಶೆಟ್ಟರ್ ಅವರನ್ನು ಕಾಲೇಜು ವಿದ್ಯಾರ್ಥಿ ಆಗಿದ್ದಾಗಿನಿಂದಲೂ ಬಲ್ಲ ಹಿರಿಯ ವಕೀಲ ಆರ್.ಪಿ. ಉಗರಗೋಳ, `ಆತ ತುಂಬಾ ವಿಧೇಯ ಹುಡುಗನಾಗಿದ್ದ. ಏನೋ ಸಾಧನೆ ಮಾಡಬೇಕು ಎನ್ನುವ ಹಂಬಲವಿತ್ತು. ವಕೀಲಿ ವೃತ್ತಿಗಿಂತ ಸಾಮಾಜಿಕ ಸೇವೆಯೇ ಆತನ ಇಷ್ಟದ ಕ್ಷೇತ್ರವಾಗಿತ್ತು. ಆದ್ದರಿಂದಲೇ ಜಗದೀಶ ಕೋರ್ಟ್ ಅಂಗಳದ ಬದಲು ರಾಜಕಾರಣದಲ್ಲಿ ಬೆಳೆದ~ ಎಂದು ವಿವರಿಸುತ್ತಾರೆ.



`ಮುಖ್ಯಮಂತ್ರಿಯಾದರೂ ಜನರಿಗೆ ಸಿಗಬಲ್ಲ ವ್ಯಕ್ತಿ ಆತ. ಹಿರಿಯ ವಕೀಲರ ಮೇಲೆ ಆತನಿಗೆ ತುಂಬಾ ಅಭಿಮಾನ. ಬಿಡುವು ಸಿಕ್ಕಾಗಲೆಲ್ಲ ನಮ್ಮಲ್ಲಿಗೆ ಬಂದು ಮಾತಾಡಿಕೊಂಡು ಹೋಗುತ್ತಾನೆ. ಅಗತ್ಯ ಸಲಹೆಗಳನ್ನೂ ನಾವು ನೀಡಿದ್ದಿದೆ~ ಎಂದು ತಿಳಿಸುತ್ತಾರೆ.



`ವಕೀಲರ ಸಂಘದ ಸದಸ್ಯರಾಗಿರುವ ಅವರು, ಚುನಾವಣೆ ಇದ್ದಾಗ ತಪ್ಪದೇ ಬಂದು ಓಟು ಹಾಕುತ್ತಾರೆ~ ಎಂದು ಹೇಳಲು, ಹುಬ್ಬಳ್ಳಿ ವಕೀಲರ ಸಂಘದ ಅಧ್ಯಕ್ಷ ಹಾಗೂ ಕಾರ್ಯದರ್ಶಿ ಸೇರಿದಂತೆ ವಿವಿಧ ಹುದ್ದೆಗಳನ್ನು ಅಲಂಕರಿಸಿರುವ, ಉಗರಗೋಳ ಮರೆಯುವುದಿಲ್ಲ.



`ನಮ್ಮ ನಡುವೆ ಬೆಳೆದ ಹುಡುಗನೊಬ್ಬ ಮುಖ್ಯಮಂತ್ರಿ ಆಗುತ್ತಿರುವುದು ನಮಗೆಲ್ಲ ಖುಷಿ ತಂದಿದೆ. ಸಮಯ ಕಡಿಮೆ ಇದೆ. ಜನ ಮೆಚ್ಚುವಂತಹ ಸರ್ಕಾರ ನೀಡಬೇಕು ಎಂಬುದಷ್ಟೇ ನಮ್ಮ ಅಪೇಕ್ಷೆಯಾಗಿದೆ~ ಎಂದು ಅವರು ಸಲಹೆ ನೀಡುತ್ತಾರೆ.



ಶಿವಪ್ಪ ತಮ್ಮ ಕೊನೆಯ ದಿನಗಳತನಕ ತಪ್ಪದೇ ಕೋರ್ಟ್‌ಗೆ ಹಾಜರಾಗುತ್ತಿದ್ದರು. ವಕೀಲಿ ವೃತ್ತಿಯನ್ನು ಅವರು ಅಷ್ಟಾಗಿ ಪ್ರೀತಿಸುತ್ತಿದ್ದರು ಎಂದೂ ಅವರು ನೆನಪಿಸಿಕೊಳ್ಳುತ್ತಾರೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.