ಶುಕ್ರವಾರ, ಅಕ್ಟೋಬರ್ 18, 2019
27 °C

ಕ್ವಾರ್ಟರ್ ಫೈನಲ್‌ಗೆ ಸೈನಾ

Published:
Updated:

ನವದೆಹಲಿ (ಪಿಟಿಐ): ಉತ್ತಮ ಪ್ರದರ್ಶನ ಮುಂದುವರಿಸಿರುವ ಭಾರತದ ಸೈನಾ ನೆಹ್ವಾಲ್ ಸೋಲ್‌ನಲ್ಲಿ ನಡೆಯುತ್ತಿರುವ ಕೊರಿಯಾ ಓಪನ್ ಸೂಪರ್ ಸರಣಿ ಬ್ಯಾಡ್ಮಿಂಟನ್ ಟೂರ್ನಿಯ ಸಿಂಗಲ್ಸ್‌ನಲ್ಲಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ.



ಗುರುವಾರ ನಡೆದ ಎರಡನೇ ಸುತ್ತಿನ ಪಂದ್ಯದಲ್ಲಿ ಸೈನಾ 21-14, 21-10ರಲ್ಲಿ ಚೈನೀಸ್ ತೈಪಿಯಾದ ಶಾವೊ ಚೇ ಚೆಂಗ್ ಅವರನ್ನು ಮಣಿಸಿದರು. ಈ ಹೋರಾಟ 36 ನಿಮಿಷಗಳ ಕಾಲ ನಡೆಯಿತು.



ನಾಲ್ಕನೇ ಶ್ರೇಯಾಂಕ ಹೊಂದಿರುವ ಹೈದರಾಬಾದ್‌ನ ಆಟಗಾರ್ತಿ ಸೈನಾ ಮೊದಲ ಗೇಮ್‌ನಲ್ಲಿ 14-4ರಲ್ಲಿ ಮುನ್ನಡೆ ಹೊಂದಿದ್ದರು. ಆರಂಭದ ಆಟವನ್ನು ಅವರು ಕೊನೆಯವರೆಗೂ ಉಳಿಸಿಕೊಂಡರು.



ಎರಡನೇ ಗೇಮ್‌ನ ಪ್ರಾರಂಭದಲ್ಲಿ 0-3ರಲ್ಲಿ ಹಿನ್ನಡೆಯಲ್ಲಿದ್ದರು. ನಂತರ ಸತತ ನಾಲ್ಕು ಪಾಯಿಂಟ್ ಗಳಿಸಿ ಮುನ್ನಡೆಯನ್ನು 7-3ಕ್ಕೆ ಹೆಚ್ಚಿಸಿಕೊಂಡರು. ಇದಕ್ಕೆ ತಿರುಗೇಟು ನೀಡಿದ ಎದುರಾಳಿ ಆಟಗಾರ್ತಿ ಚೆಂಗ್ ಸಹ ನಾಲ್ಕು ಪಾಯಿಂಟ್ ಗಳಿಸಿ 7-7ರಲ್ಲಿ ಸಮಬಲ ಸಾಧಿಸಿದರು. ನಂತರ ಈ 11-7ರಲ್ಲಿ ಮುನ್ನಡೆ ಸಾಧಿಸಿದರು.



ಜ್ವಾಲಾ-ಅಶ್ವಿನಿ ಜೋಡಿಗೆ ನಿರಾಸೆ: ಜ್ವಾಲಾ ಗುಟ್ಟಾ ಹಾಗೂ ಅಶ್ವಿನಿ ಪೊನ್ನಪ್ಪ ಜೋಡಿ ಮಹಿಳೆಯರ ವಿಭಾಗದ ಡಬಲ್ಸ್‌ನಲ್ಲಿ ಸೋಲು ಕಂಡು ನಿರಾಸೆ ಅನುಭವಿಸಿದರು. ಈ ಜೋಡಿ 10-21, 17-21 ರಲ್ಲಿ ಅಗ್ರ ಶ್ರೇಯಾಂಕದ ಚೀನಾದ ವಾಂಗ್-ಯಾಂಗ್ ಯು ಜೋಡಿ ಎದುರು ಪರಭಾವಗೊಂಡಿತು. ಈ ಪಂದ್ಯವು 34 ನಿಮಿಷದಲ್ಲಿ ಅಂತ್ಯ ಕಂಡಿತು.



ಎಂಟರ ಘಟ್ಟಕ್ಕೆ ಜ್ವಾಲಾ-ದಿಜು: ಮಿಶ್ರ ಡಬಲ್ಸ್ ವಿಭಾಗದಲ್ಲಿ ಜ್ವಾಲಾ ಗುಟ್ಟಾ ಹಾಗೂ ವಿ. ದಿಜು ಜೋಡಿ ಎಂಟರ ಘಟ್ಟ ಪ್ರವೇಶಿಸಿತು. ಈ ಜೋಡಿ 21-7, 10-21, 21-16ರಲ್ಲಿ ದಕ್ಷಿಣ ಕೊರಿಯಾದ ಸಂಗ್ ಹುಯನ್ ಕೊ-ಹುಯಿ ವನ್ ಇಮ್ ಎದುರು ಗೆಲುವು ಪಡೆಯಿತು.

Post Comments (+)