ಕ್ಷಮೆಯಾಚಿಸಿದ ಮಾ. ಹಿರಣ್ಣಯ್ಯ

ಮೈಸೂರು: ಎಐಸಿಸಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಮತ್ತು ಮುಖ್ಯ­ಮಂತ್ರಿ ಸಿದ್ದರಾಮಯ್ಯ ಅವರ ವಿರುದ್ಧ ಹಿರಿಯ ರಂಗಕರ್ಮಿ ಮಾಸ್ಟರ್‌ ಹಿರಣ್ಣಯ್ಯ ಅವಹೇಳನಕಾರಿ ಭಾಷಣ ಮಾಡಿ­ದ್ದರಿಂದ ರೊಚ್ಚಿಗೆದ್ದ ಕಾಂಗ್ರೆಸ್‌ ಕಾರ್ಯಕರ್ತರು ಮತ್ತು ಸಿದ್ದರಾಮಯ್ಯ ಅಭಿಮಾನಿಗಳು ಸಭಾಂಗಣದ ವೇದಿಕೆ, ಕುರ್ಚಿಗಳನ್ನು ಧ್ವಂಸ ಮಾಡಿ, ಬ್ಯಾನರ್ ಹರಿದು ದಾಂದಲೆ ನಡೆಸಿದ ಘಟನೆ ಭಾನು­ವಾರ ಇಲ್ಲಿ ನಡೆಯಿತು.



ನಗರದ ನಾಗನವ ಕಲಾ ಸಾಹಿತ್ಯ ವೇದಿ­ಕೆ­ಯು ನಾದಬ್ರಹ್ಮ ಸಂಗೀತ ಸಭಾ­ದಲ್ಲಿ ಏರ್ಪಡಿಸಿದ್ದ ‘ನಾಗಾಸ್ ನವಸಿರಿ’ ಪ್ರಶಸ್ತಿ ಪ್ರದಾನ ಸಮಾರಂಭ­ದಲ್ಲಿ ಹಿರಣ್ಣಯ್ಯ ಮಾತನಾಡಿ, ‘ಸಿದ್ದರಾಮಯ್ಯ­ನವರು ಚುನಾವಣೆ­ಯಲ್ಲಿ ಗೆಲ್ಲುವವರೆಗೆ ವಿನಯದಿಂದ ನಡೆ­ದುಕೊಳ್ಳುತ್ತಿದ್ದರು. ಈಗ ಗೆದ್ದು ಬೆಲೆ ಏರಿಕೆ ಮಾಡಿ ತಮ್ಮ ನಡವಳಿಕೆ ಬದ­ಲಾಯಿಸಿಕೊಂಡಿದ್ದಾರೆ’ ಎಂದು ಹೇಳುವಾಗ ಅವಾಚ್ಯ ಶಬ್ದಗಳನ್ನು ಬಳಸಿ­ದರು. ಇದಕ್ಕೆ ಸಭಿಕರು ಚಪ್ಪಾಳೆ ತಟ್ಟುತ್ತಿ­ದ್ದಂತೆ ಹಿರಣ್ಣಯ್ಯ ಭಾಷಣ ಮುಂದುವರಿಸಿದರು.



ಮುಖ್ಯಮಂತ್ರಿ ವಿರುದ್ಧ ಮಾ.­ಹಿರಣ್ಣಯ್ಯ ಅವಹೇಳನಕಾರಿ ಭಾಷಣ ಮಾಡಿ­ದ್ದಾರೆ ಎಂಬ ವಿಷಯ ತಿಳಿಯು­ತ್ತಿದ್ದಂತೆ ಶಾಸಕ ಎಂ.ಕೆ. ಸೋಮಶೇಖರ್‌ ಅಭಿಮಾನಿ ಬಳಗದವರು ಕಾರ್ಯಕ್ರಮ ನಡೆಯುವ ಸ್ಥಳಕ್ಕೆ ಮಧ್ಯಾಹ್ನ ಬಂದರು. ಕಾರ್ಯಕ್ರಮ ನಡೆಯುತ್ತಿದ್ದ ವೇಳೆಯೇ ವೇದಿಕೆ ಏರಿದ ಕಾರ್ಯಕರ್ತರು, ಆಯೋಜಕರು ಮತ್ತು ಅತಿಥಿಗಳನ್ನು ತರಾಟೆಗೆ ತೆಗೆದುಕೊಂಡರು. ‘ಮಾ. ಹಿರಣ್ಣಯ್ಯ ಮುಖ್ಯಮಂತ್ರಿ ವಿರುದ್ಧ ಹೇಳಿಕೆ ನೀಡಬಹುದೆ? ಅವರು ಎಲ್ಲಿ­ದ್ದಾರೆ?’ ಎಂದು ವೇದಿಕೆಯಲ್ಲಿ ಕುಳಿತಿದ್ದ­ವ­­ರನ್ನು ಪ್ರಶ್ನಿಸಿದರು. ‘ಹಿರಣ್ಣಯ್ಯ ಭಾಷಣ ಮಾಡಿ ಬೆಳಿಗ್ಗೆಯೇ ಹೋಗಿ­ದ್ದಾರೆ. ಅದು ಅವರ ವೈಯಕ್ತಿಕ ಹೇಳಿಕೆ’ ಎಂದು ಪ್ರತಿಭಟನಾ­ಕಾರರನ್ನು ಸಮಾ­ಧಾನ ಮಾಡಲು ಆಯೋಜಕರು ಯತ್ನಿಸಿದರು.



ನೋಡನೋಡುತ್ತಿದ್ದಂತೆ ಪ್ರತಿಭಟನಾ­ಕಾರರು ಕೈಗೆ ಸಿಕ್ಕಿದ್ದನ್ನು ಧ್ವಂಸ ಮಾಡಿ­ದರು. ಇದರಿಂದ ವೇದಿಕೆ­ಯಲ್ಲಿದ್ದ­ವರು ಗಾಬರಿಗೊಂಡರು. ಸಭಿಕರು ಸಹ ಗಾಬ­ರಿಗೊಂಡು ಹೊರನಡೆದರು. ಆಯೋ­ಜಕರು ಮತ್ತು ಹಿರಣ್ಣಯ್ಯ ಅವರ ವಿರುದ್ಧ ಘೋಷಣೆಗಳನ್ನು ಕೂಗುತ್ತಾ ಕಾರ್ಯಕರ್ತರು ಹೊರನ­ಡೆದರು.



ಸಿ.ಎಂ ಎದುರು ಹಿರಣ್ಣಯ್ಯ ಕ್ಷಮೆ: ಮುಖ್ಯಮಂತ್ರಿ ವಿರುದ್ಧ ಅವಹೇಳನ­ಕಾರಿ ಭಾಷಣ ಮಾಡಿದ್ದಾರೆ ಎಂಬ ಸುದ್ದಿ ಖಾಸಗಿ ವಾಹಿನಿಗಳಲ್ಲಿ ಪ್ರಸಾರವಾಗುತ್ತಿದ್ದಂತೆ ಸಂಜೆ ಮಾ. ಹಿರಣ್ಣಯ್ಯ  ಶಾರದಾದೇವಿ­ನಗರದಲ್ಲಿ ಇರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಮನೆಗೆ ಖುದ್ದು ತೆರಳಿ ಕ್ಷಮೆ ಯಾಚಿಸಿದರು.



‘ಸಿದ್ದರಾಮಯ್ಯ, ನಾನು ಉತ್ತಮ ಸ್ನೇಹಿತರು. ನನ್ನ ವಯೋಮಾನದ ಸಮಸ್ಯೆಯಿಂದ ಈ ರೀತಿಯ ಮಾತು ಬಂದಿರಬಹುದು. ಆದರೆ, ಉದ್ದೇಶ­ಪೂರ್ವ­ಕವಾಗಿ ಆಡಿಲ್ಲ. ವ್ಯವಸ್ಥೆ ವಿರುದ್ಧ ನಾನು ನೂರಾರು ಭಾಷಣಗಳಲ್ಲಿ ಮಾತನಾಡಿದ್ದೇನೆ. ಆದ್ದರಿಂದ ಕಾಂಗ್ರೆಸ್್ ಕಾರ್ಯಕರ್ತರು  ಹಾಗೂ ಅವರ ಅಭಿಮಾನಿಗಳು ವಿಷಯವನ್ನು ದೊಡ್ಡದು ಮಾಡಬಾರದು. ಕೂಡಲೇ ನಾನು ನಾಡಿನ ಜನತೆಯ ಕ್ಷಮೆ ಯಾಚಿಸುತ್ತೇನೆ’ ಎಂದರು.



ಈ ವೇಳೆ ಮುಖ್ಯಮಂತ್ರಿ ಮನೆ ಹೊರಗೆ ಪ್ರತಿಭಟನೆ ಜೋರಾಗಿ ನಡೆಯುತ್ತಿತ್ತು. ಪ್ರತಿಭಟನಾಕಾರರ ಪೈಕಿ ಒಂದಿಬ್ಬರು ಮುಖಂಡರನ್ನು ಕರೆಯಿಸಿ ಎಂದು ಸಿದ್ದರಾಮಯ್ಯ  ಆಪ್ತರಿಗೆ ಸೂಚಿಸಿದರು.



ಕೃಷ್ಣರಾಜ ಕ್ಷೇತ್ರ ಬ್ಲಾಕ್‌ ಕಾಂಗ್ರೆಸ್‌ ಉಪಾಧ್ಯಕ್ಷ ಲೋಕೇಶ್‌ ಪೀಯಾ ಬರುತ್ತಿದ್ದಂತೆ ‘ಮುಖ್ಯಮಂತ್ರಿ ವಿರುದ್ಧ ಮಾತನಾಡುವ ಹಕ್ಕು ಹಿರಣ್ಣಯ್ಯ ಅವರಿಗೆ ಇಲ್ಲ’ ಎಂದು ಹಿರಣ್ಣಯ್ಯ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದರು.



ಪರಿಸ್ಥಿತಿ ವಿಕೋಪಕ್ಕೆ ಹೋಗು­ವುದನ್ನು ಅರಿತ ಸಿದ್ದರಾಮಯ್ಯ ಲೋಕೇಶ್‌ ಪೀಯಾ ಮತ್ತು ಇತರರನ್ನು ಸಮಾಧಾನ ಮಾಡಿ ಹೊರಕಳುಹಿಸಿದರು.



‘ಸಾರ್ವಜನಿಕವಾಗಿ ಭಾಷಣ ಮಾಡಲ್ಲ’

‘ಮೈಸೂರಿನಲ್ಲಿ ಸಭೆ–ಸಮಾ­ರಂಭ­­ಗಳಲ್ಲಿ ಕಾಣಿಸಿಕೊಂಡು ಹೆಚ್ಚು ಭಾಷಣ ಮಾಡುತ್ತಿದ್ದೆ. ಇದೀಗ ಮೈಸೂ­ರಿ­ನ­ಲ್ಲಿಯೇ ಭಾಷಣ ಅಂತ್ಯ ಮಾಡು­ತ್ತಿ­ದ್ದೇನೆ. ಇನ್ನು ಮುಂದೆ ಸಾರ್ವಜನಿಕ­ವಾಗಿ ಸಭೆ–ಸಮಾ­ರಂಭ­­­ಗಳಲ್ಲಿ ಕಾಣಿಸಿ­ಕೊಂಡು ಭಾಷಣ ಮಾಡುವುದಿಲ್ಲ’ ಎಂದು ಮಾ.­ಹಿರಣ್ಣಯ್ಯ ಮಾಧ್ಯಮದ ಎದುರು ಹೇಳಿದರು.



ಕ್ಷಮೆ ಯಾಚಿಸಿದ್ದು ದೊಡ್ಡ ಗುಣ: ಸಿ.ಎಂ

‘ಹಿರಣ್ಣಯ್ಯ ರಂಗಭೂಮಿಯ ಹಿರಿಯ ಕಲಾವಿದರು. ಯಾವ ಪದ ಬಳಕೆ ಮಾಡಿ ನಿಂದಿಸಿದ್ದಾರೆ ಎಂಬುದು ನನಗೆ ಗೊತ್ತಿಲ್ಲ. ಉದ್ದೇಶಪೂರ್ವಕವಾಗಿ ಹೇಳಿಲ್ಲ, ಬಾಯಿ ತಪ್ಪಿ ಮಾತನಾಡಿದ್ದೇನೆ ಎಂದು ಕ್ಷಮೆ ಯಾಚಿಸಿದ್ದಾರೆ. ಕ್ಷಮೆಗಿಂತ ದೊಡ್ಡ ಶಿಕ್ಷೆ ಬೇರೊಂದಿಲ್ಲ. ಕಾಂಗ್ರೆಸ್‌ ಕಾರ್ಯಕರ್ತರು ಮತ್ತು ಅಭಿಮಾನಿಗಳು ಪ್ರತಿಭಟನೆಯನ್ನು ಇಲ್ಲಿಗೆ ಕೈಬಿಡಬೇಕು, ಮುಂದುವರಿಸ­ಬಾರದು’ ಎಂದು ಮುಖ್ಯಮಂತ್ರಿ ಮನವಿ ಮಾಡಿದರು.

ಭಾವುಕರಾದ ಮಾ.ಹಿರಣ್ಣಯ್ಯ: ಮುಖ್ಯಮಂತ್ರಿ ಮನೆ ಎದುರು ಕಾಂಗ್ರೆಸ್‌ ಕಾರ್ಯಕರ್ತರು ಮತ್ತು ಅಭಿಮಾನಿಗಳ ಪ್ರತಿಭಟನೆ ಜೋರಾಗಿ ನಡೆಯುತ್ತಿತ್ತು. ಇದನ್ನು ಅರಿತ ಹಿರಣ್ಣಯ್ಯ ಮನೆಯಿಂದ ಹೊರಡಲು ಹಿಂದೇಟು ಹಾಕಿದರು. ಸಿದ್ದರಾಮಯ್ಯ ಖುದ್ದು ಮಾ.ಹಿರಣ್ಣಯ್ಯ ಮತ್ತು ಕುಟುಂಬದವರನ್ನು ಮನೆಯಿಂದ ಹೊರಗಡೆ ಕರೆತಂದು ಪೊಲೀಸ್‌ ಬಂದೋಬಸ್ತ್‌ನಲ್ಲಿ ಕಾರು ಹತ್ತಿಸಿದರು. ಕಾರು ಮೈಸೂರು ಗಡಿ ದಾಟುವ­ವರೆಗೂ ರಕ್ಷಣೆ ನೀಡಬೇಕು ಎಂದು ಡಿಸಿಪಿ (ಅಪರಾಧ–ಸಂಚಾರ) ಕಲಾ ಕೃಷ್ಣಸ್ವಾಮಿ ಅವರಿಗೆ ಸೂಚಿಸಿದರು. ಈ ವೇಳೆ ಭಾವುಕರಾದ ಹಿರಣ್ಣಯ್ಯ ಸಿ.ಎಂಗೆ ಕೈ ಮುಗಿದು ಹೊರಟರು. ಪೊಲೀಸ್‌ ಬಂದೋಬಸ್ತ್‌ನಲ್ಲಿ ಹಿರಣ್ಣಯ್ಯ ಬೆಂಗಳೂರಿಗೆ ತೆರಳಿದರು.