ಭಾನುವಾರ, ಜೂನ್ 13, 2021
22 °C

ಜೀರೋನಲ್ಲಿ ಮೂರು ಪಾಲು!

ವಿ.ಎಸ್.ಸುಬ್ರಹ್ಮಣ್ಯ/ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಬಳ್ಳಾರಿ ಜಿಲ್ಲೆಯ ವಿವಿಧೆಡೆ ಅಕ್ರಮವಾಗಿ ಅದಿರು (ಜೀರೋ ಮೆಟಿರಿಯಲ್) ತೆಗೆದು ಸಾಗಿಸುತ್ತಿದ್ದವರು ಪ್ರತಿ ಟನ್‌ಗೆ 200 ರೂಪಾಯಿ `ಕಪ್ಪ~ ನೀಡುತ್ತಿದ್ದರು. ಅದರಲ್ಲಿ ಮಾಜಿ ಸಚಿವ ಜನಾರ್ದನ ರೆಡ್ಡಿ ಅವರಿಗೆ ರೂ 100 ಸಂದಾಯ ಆಗುತ್ತಿತ್ತು. 5 ರೂಪಾಯಿ ಕಂಪ್ಲಿ ಶಾಸಕ ಸುರೇಶ್ ಬಾಬು ಅವರ ಪಾಲಾದರೆ, ಮೆಹಫೂಜ್ ಅಲಿಖಾನ್‌ಗೆ ರೂ 2 ದೊರೆಯುತ್ತಿತ್ತು.



ಇದು ಅಸೋಸಿಯೇಟೆಡ್ ಮೈನಿಂಗ್ ಕಂಪೆನಿ (ಎಎಂಸಿ) ಹೆಸರಿನಲ್ಲಿ ರೆಡ್ಡಿ ಅವರ ಗುಂಪು ನಡೆಸಿರುವ ಅವ್ಯವಹಾರಗಳ ಬೆನ್ನುಹತ್ತಿರುವ ಸಿಬಿಐ ತನಿಖಾ ತಂಡ ಪತ್ತೆಹಚ್ಚಿರುವ ಸಂಗತಿ. `ಜೀರೋ ಮೆಟಿರಿಯಲ್~ ಹೆಸರಿನಲ್ಲಿ ನಡೆಯುತ್ತಿರುವ ಅಕ್ರಮ ವ್ಯವಹಾರದಲ್ಲೇ ರೆಡ್ಡಿ ಮತ್ತು ಅವರ ಗುಂಪು ಹತ್ತಾರು ಕೋಟಿ ಸಂಪಾದಿಸುತ್ತಿದ್ದರು ಎಂಬ ಆರೋಪಗಳನ್ನು ದೃಢಪಡಿಸಬಲ್ಲ ದಾಖಲೆಗಳೂ ತನಿಖಾ ತಂಡದ ಕೈಸೇರಿವೆ.



`ಬೀಜಿಂಗ್ ಒಲಿಂಪಿಕ್ ಕಾರಣದಿಂದಾಗಿ ಕಬ್ಬಿಣದ ಅದಿರಿನ ಬೆಲೆ ಗಗನಕ್ಕೆ ಏರಿದಾಗ ಬಳ್ಳಾರಿ ಜಿಲ್ಲೆಯಲ್ಲಿ ಎಲ್ಲಿ ಬೇಕೆಂದರಲ್ಲಿ ಭೂಮಿಯ ಒಡಲು ಬಗೆಯುವ ಕೆಲಸ ಆರಂಭವಾಗಿತ್ತು. ಅಲ್ಲಿ ಉತ್ಪಾದನೆಯಾದ ಅದಿರನ್ನು ಸುರಕ್ಷಿತವಾಗಿ ಮಾರಾಟ ಮಾಡಲು ಸೃಷ್ಟಿಸಿದ ಮಾರ್ಗವೇ `ಜೀರೋ ಮೆಟಿರಿಯಲ್~ ಅಥವಾ `ರಿಸ್ಕ್ ಮೆಟಿರಿಯಲ್~. ಈ `ಜೀರೋ ಮೆಟಿರಿಯಲ್~ ಸಾಗಣೆಗೆ ಪರ್ಯಾಯ ವ್ಯವಸ್ಥೆಯೊಂದು ನಿರಂತರವಾಗಿ ಕೆಲಸ ಮಾಡುತ್ತಿತ್ತು ಎಂಬ ಉಲ್ಲೇಖ ಹಿಂದಿನ ಲೋಕಾಯುಕ್ತರು ರಾಜ್ಯ ಸರ್ಕಾರಕ್ಕೆ ಸಲ್ಲಿಸಿದ ವರದಿಯಲ್ಲಿ ಇತ್ತು. ಅದೆಲ್ಲವೂ ಅಕ್ಷರಶಃ ನಿಜ ಎಂಬುದು ತನಿಖೆಯಲ್ಲಿ ಪತ್ತೆಯಾಗಿದೆ~ ಎನ್ನುತ್ತವೆ ಸಿಬಿಐ ಮೂಲಗಳು.



ಸಾರಿಗೆ ಮಾಫಿಯಾ:
`ಅಕ್ರಮವಾಗಿ ಗಣಿಗಾರಿಕೆ ನಡೆಸಿ ಅದಿರು ಸಂಗ್ರಹಿಸಿದರೂ, ಅದು ನಿಶ್ಚಿತವಾಗಿ ಒಂದು ಗುಂಪಿನ ಲಾರಿಗಳ ಮೂಲಕವೇ ಸಾಗಣೆಯಾಗಬೇಕಿತ್ತು. ಸಾಗಣೆ ವೆಚ್ಚದ ಜೊತೆ ಪ್ರತಿ ಟನ್‌ಗೆ 200 ರೂಪಾಯಿ `ರಿಸ್ಕ್ ಮನಿ~ (ಕಪ್ಪ) ಪಾವತಿಸಿದರೆ ಸರಾಗವಾಗಿ ಅದಿರು ನಿಗದಿತ ಸ್ಥಳ ತಲುಪುತ್ತಿತ್ತು. 



  `ಕಪ್ಪ~ ಕೊಡಲು ಇಚ್ಛಿಸದೇ ಬೇರೆ ಲಾರಿಗಳನ್ನು ಬಳಸಿದರೆ, ಸಂಪೂರ್ಣ ಅದಿರನ್ನೇ ಈ ಮಾಫಿಯಾ ತನ್ನ ವಶಕ್ಕೆ ತೆಗೆದುಕೊಳ್ಳುತ್ತಿತ್ತು ಎಂಬ ಸಂಗತಿಯನ್ನು ಜನಾರ್ದನ ರೆಡ್ಡಿ ಅವರ ಕೆಲ ಸಹಚರರು ಸಿಬಿಐ ಅಧಿಕಾರಿಗಳ ಮುಂದೆ ಬಾಯಿ ಬಿಟ್ಟಿದ್ದಾರೆ~ ಎಂದು ತನಿಖಾ ಸಂಸ್ಥೆ ಉನ್ನತ ಮೂಲಗಳು `ಪ್ರಜಾವಾಣಿ~ಗೆ ತಿಳಿಸಿವೆ. ಹೊಸಪೇಟೆಯ ಖಾರದಪುಡಿ ಮಹೇಶ್ ಮತ್ತು ಸ್ವಸ್ತಿಕ್ ನಾಗರಾಜ್ `ಜೀರೋ~ ಅದಿರು ಸಾಗಣೆ ಲಾರಿಗಳ ಮಾಲೀಕರನ್ನು ನಿಯಂತ್ರಿಸುತ್ತಿದ್ದರು. ಅವರಂತೆ ಇನ್ನೂ ಕೆಲವರು ಈ ಜಾಲದಲ್ಲಿದ್ದರು.



ಅದಿರನ್ನು ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಸುರಕ್ಷಿತವಾಗಿ ಸಾಗಿಸುವ ಜವಾಬ್ದಾರಿಯನ್ನು ನೋಡಿಕೊಳ್ಳುತ್ತಿದ್ದರು. ಬರುವ `ಕಪ್ಪ~ದಲ್ಲಿ ಅವರಿಗೂ ಒಂದು ಪಾಲು ಸಂದಾಯ ಆಗುತ್ತಿತ್ತು ಎಂಬ ವಿವರವೂ ವಿಚಾರಣೆ ವೇಳೆ ಬಹಿರಂಗವಾಗಿದೆ.



ಲೆಕ್ಕವೂ ಇತ್ತು: `ಜೀರೋ~ ಅದಿರು ಸಾಗಣೆ ಜಾಲ ಕೇವಲ ಮೌಖಿಕವಾಗಿ ನಡೆಯುತ್ತಿರಲಿಲ್ಲ. ಅಲ್ಲಿಯೂ ಲೆಕ್ಕಪತ್ರಗಳನ್ನು ಇಡಲಾಗುತ್ತಿತ್ತು. ಗಣಿಗಾರಿಕೆ ನಡೆಸಿದ ಸ್ಥಳ, ಅದಿರಿನ ಪ್ರಮಾಣ, ಅದಿರು ತಲುಪುವ ಸ್ಥಳ, ಸಾಗಣೆ ವೆಚ್ಚ, `ರಿಸ್ಕ್ ಮನಿ~ ಎಲ್ಲವನ್ನೂ ಕೆಲ ಸಂಕೇತಗಳ ಮೂಲಕ ನಮೂದಿಸಲಾಗುತ್ತಿತ್ತು. ಆದಾಯ ತೆರಿಗೆ ಇಲಾಖೆ 2010ರ ಸೆಪ್ಟೆಂಬರ್‌ನಲ್ಲಿ ನಡೆಸಿದ ದಾಳಿಯ ವೇಳೆ ಈ ಬಗ್ಗೆ ಮಹತ್ವದ ದಾಖಲೆಗಳು ದೊರೆತಿದ್ದವು. ಬಹಳಷ್ಟು ವಿಷಯಗಳನ್ನು ಹೊರತೆಗೆದಿದ್ದ ಆದಾಯ ತೆರಿಗೆ ಇಲಾಖೆಗೆ, ಇತ್ತೀಚಿನವರೆಗೂ ಕೆಲ ಸಂಕೇತಗಳ ವಿವರ ಅರಿಯುವುದು ಸಾಧ್ಯವೇ ಆಗಿರಲಿಲ್ಲ.



ಸಿಬಿಐ ಮೂಲಗಳ ಪ್ರಕಾರ, ತೆರಿಗೆ ಇಲಾಖೆ ಒದಗಿಸಿದ ದಾಖಲೆಗಳನ್ನು ಆಧರಿಸಿ, ಜನಾರ್ದನ ರೆಡ್ಡಿ, ಅಲಿಖಾನ್, ನಾಗರಾಜ್, ಮಹೇಶ್ ಸೇರಿದಂತೆ ಈ ಜಾಲದಲ್ಲಿ ಸಕ್ರಿಯವಾಗಿದ್ದ ಹಲವರನ್ನು ದೀರ್ಘಕಾಲ ಪ್ರಶ್ನಿಸಿರುವ ಡಿಐಜಿ ಆರ್.ಹಿತೇಂದ್ರ ನೇತೃತ್ವದ ಸಿಬಿಐ ತನಿಖಾ ತಂಡ, ಬಳ್ಳಾರಿಯಲ್ಲಿ ನಡೆಯುತ್ತಿದ್ದ `ಜೀರೋ~ ಅದಿರು ಸಾಗಣೆ ವೃತ್ತಾಂತದ ಪೂರ್ಣ ವಿವರವನ್ನು ಕಲೆಹಾಕಿದೆ. ದಾಖಲೆಗಳಲ್ಲಿ ಕಾಣುವ ಅಂಶಗಳೆಲ್ಲವೂ ಸತ್ಯ ಎಂಬುದನ್ನು ರೆಡ್ಡಿ ಮತ್ತು ಅಲಿಖಾನ್ ವಿಚಾರಣೆ ಒಪ್ಪಿಕೊಂಡಿದ್ದಾರೆ.



`ಮಾಸ್ಟರ್‌ಮೈಂಡ್~ ಖಾನ್:
`ಅಲಿಖಾನ್ ಈ ವ್ಯವಹಾರದ ಪೂರ್ಣ ಉಸ್ತುವಾರಿ ಹೊತ್ತಿದ್ದ. ಶಾಸಕ ಸುರೇಶ್‌ಬಾಬು ಇತರೆ ಜವಾಬ್ದಾರಿ ನಿರ್ವಹಿಸುತ್ತಿದ್ದರು. ಜನಾರ್ದನ ರೆಡ್ಡಿ ಅವರ `ನಾಮಬಲ~ದಲ್ಲೇ `ಜೀರೋ~ ಅದಿರು ಸಾಗುತ್ತಿತ್ತು.



ಈ ವ್ಯವಹಾರದಿಂದ ಸಂಗ್ರಹವಾದ ಮೊತ್ತ ಹಲವು ಅನಾಮಧೇಯ ಬ್ಯಾಂಕ್ ಖಾತೆಗಳನ್ನು ಸುತ್ತಿಕೊಂಡು, ರೆಡ್ಡಿ, ಸುರೇಶ್‌ಬಾಬು, ಅಲಿಖಾನ್ ಖಾತೆಗಳಿಗೆ ತಲುಪುತ್ತಿತ್ತು.



ಇದೆಲ್ಲಕ್ಕೂ ಬ್ಯಾಂಕ್ ಖಾತೆಗಳಲ್ಲೇ ಸಾಕ್ಷ್ಯವಿದೆ. `ಜೀರೋ~ ಅದಿರು ಸಾಗಣೆ ವಹಿವಾಟಿನಲ್ಲಿ ಜನಾರ್ದನ ರೆಡ್ಡಿ ಅವರಿಗೆ ಪ್ರತಿನಿತ್ಯ ಲಕ್ಷದ ಲೆಕ್ಕದಲ್ಲಿ ಕಪ್ಪ ಸಂದಾಯ ಆಗುತ್ತಿತ್ತು. ಸುರೇಶ್ ಬಾಬು ಮತ್ತು ಅಲಿಖಾನ್ ಗಳಿಕೆ ಸಾವಿರದ ಲೆಕ್ಕದಲ್ಲಿತ್ತು~ ಎಂದು ಮೂಲಗಳು ತಿಳಿಸಿವೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.